Saka mukyangye kuba kintu kyonse, mwakonsha kwishikisha’mba, ‘Nsakumwenamo ka?’ Nanchi kyatama kwiipuzha bino pa lulombelo nyi? Ine. Tukeba kuyuka umvwe tukamwenamo byawama nangwa ne. Nangwatu muntu wawama aye Yoba waipwizhe’mba: “Umvwe namwita, nanchi wakonsha kungitaba nyi?”—Yoba 9:16.

Mu bibaaba byafumako, twaji kwisamba pa bintu bimwesha’mba lulombelo lwanema kechi kuyatu ku chechi nangwa’mba muchi ukwasha milanguluko ya muntu ne. Lesa wa kine umvwa milombelo. Inge twalomba mu jishinda jafwainwa ne pa bintu byawama, uketumvwa. Aye witukambizha kufwenya kwipi ne aye. (Yakoba 4:8) Pano tukamwenamo ka inge saka tulomba kimye kyonse? Twayai twisambe pa bintu bimo byawama byo twakonsha kumwenamo.

Nanchi mwakamwa umvwe ke mupite mu makatazho mu bwikalo bwenu nyi? Mu bimye bya uno mutundu, Baibolo witutundaika ‘kulomba kimye kyonse’ ne ‘kusolola kwi Lesa bintu byo tukeba.’ (1 Tesalonika 5:17; Filipai 4:6) Baibolo witubuula’mba inge twalomba kwi Lesa, ‘mutende wa Lesa wakila milanguluko ya bantu ukalama michima ne milanguluko yetu.’ (Filipai 4:7) Twakonsha kwikala na mutende inge saka tumubuula Shetu wa mwiulu makatazho etu onse. Aye witutundaika mu Salamo 55:22 amba: “Twika Yehoba kisendwa kyobe, ne aye ukakukosesha.”

Bantu bavula mwaya ntanda baji na uno mutende. Hee Ran, wikala mu South Korea waamba’mba: “Nangwa kya kuba naikala na makatazho avula, inge nalombapo, nkasuluka kabiji  ngikala na bulume bwa kuchinchika.” Cecilia, wikala mu Philippines waamba’mba: “Byo nji nsemi, ngakamwa bingi pa baana bami ba bakazhi ne bamama babena kukankalwa kungyuka na mambo a kukolwa. Bino na mambo a lulombelo, mbena kuba bintu bya mu bwikalo bwami kwa kubula kukizhamo kwakamwa. Nayuka’mba Yehoba ukebalama.”

Nanchi bijikila bimuvujila kya kuba’mba byakonsha ne kubika bumi bwenu mu kizumba nangwa mu bintutu bikwabo byakatazha nyi? Kulomba kwi “Lesa wa lutekenesho lonse” kwakonsha kwitukwasha. Baibolo waamba’mba aye “witutekenesha mu meseko etu onse.” (2 Kolinda 1:3, 4) Kimye kimo, Yesu byo aikele na bulanda bukatampe, “wafukamine ne kutendeka kulomba.” Ki ka kyamwekele? “Kwaishile malaika kufuma mwiulu ne kumukosesha.” (Luka  22:41, 43) Muntu mukwabo wa kishinka Nehemiya, bamuzakamishe ku bantu batama bamukainyenga kwingila mwingilo wa Lesa. Walombele’mba: “Nalomba namba, koseshai maboko ami.” Bintu byamwekele bimwesha’mba Lesa kine wamukwashishe kubula kuchina ne kwingila mwingilo wanji bulongo. (Nehemiya 6:9-16) Reginald, wikala mu Ghana walumbulula lulombelo byo lwamukwashishe mu bintu byo apichilemo amba: “Inge nalomba mu bimye bya makatazho, ñumvwa bingi bulongo kuba’mba nabuula makatazho ami muntu wakonsha kunkwasha ne kumbuula’mba kange wakamwe ne.” Kine, Lesa wakonsha kwitutekenesha inge twamulomba.

Bintu bimo byo tufuukula byakonsha kwitukwasha atweba ne balunda netu nangwa ne. Twakonsha kufuukula byepi bulongo? Baibolo waamba’mba: “Umvwe umo mwi anweba wakepelwa maana [kikatakata na mwa kubila na makatazho], alombenga kwi Lesa, mambo aye upana na muchima yense ku bonse kwa kubula kunenañana, kabiji ukamupao.” (Yakoba 1:5) Inge twalomba maana, Lesa uketupa mupashi wanji wazhila kwitukwasha kufuukulapo bulongo. Kabiji twakonsha kumulomba kwitupa mupashi wazhila, mambo Yesu witulayile’mba “Shenu wa mwiulu [ukapana] mupashi wazhila ku boba bamulomba!”—Luka 11:13.

Nangwatu Yesu naye walombele kwi Shanji kumukwasha kufuukulapo bintu byanema bingi. Baibolo witubuu­la’mba kimye kyo asajilenga banabalume 12 kwikala batumwa banji, “walombele kwi Lesa bufuku bonse.”—Luka 6:12.

Byonkatu byaubanga Yesu, bantu bavula lelo jino nabo bemwena Lesa byo akumbula milombelo yabo yo balomba kuba’mba ebakwashe kufuukulapo bulongo. Regina, wikala mu Philippines waamba pa makatazho avula o apitamo, nabiji kumona mwa kwikwashisha ne kisemi kyanji kimye kyafwile bamwatawanji, byapwile nkito ne makatazho pa kukomesha baana. Ñanyi kintu kyamukwashishe kufuukulapo bulongo? Waambile’mba, “Naketekejile Yehoba kunkwasha byo namulomba.” Kwabena, wikala mu Ghana witubuula kyo alombejile kwi Lesa kumukwasha, waamba’mba, “Bampangile nkito ya buntungi yo nafolelangapo mali avula.” Byo akilangulukilenga bya kuba, waam­ba’mba, “Nalombanga kimye kyonse kwi Yehoba kunkwasha ku­ba’mba mfuukulepo bulongo.” Watwajijila kwamba’mba, “Naswa’mba Yehoba wankwashishe kusala nkito yawama, mambo ino nkito inkwasha kuta muchima kwi Lesa ne bintu byo nkeba mu bwikalo.” Ne anwebatu Lesa wakonsha kwimukwasha kufuukulapo bulongo inge mwalomba pa bintu byakonsha kwimukwasha kukosesha bulunda bwenu ne aye.

Twisambakotu bintu bicheche pa lulombelo byo lwakonsha kwimukwasha. (Inge mukeba kuyukilapo byavula, monai kakitenguluzha kaamba’mba “ Lulombelo Lwitukwasha Bingi.”) Pa kuba’mba mumwenemo mu bino bintu byonse, mwafwainwa patanshi kuyuka Lesa ne kyaswa muchima wanji. Umvwe byo byo mukeba, tubena kwimutundaika kwambila Bakamonyi ba kwa Yehoba kwimukwasha kufundanga Baibolo. * Akino kyo kintu kitanshi kyo mwafwainwa kuba pa kufwenya kwipi na ‘Umvwa milombelo.’—Salamo 65:2.