Nasemekejilwe mu muzhi mucheche wa Poland, kwipi na mupaka wa German. Naikalanga bingi bulongo ku mpunzha kwajinga majimi avula ne biswa. Bansemi bami bantundaikanga kwikala bwikalo bwawama, kuta maana ku sukulu ne kufunda kufika palepa.

Makatazho atendekele kimye kyo nayile na kufunda bya bunchibamambo pa sukulu mukatampe mu muzhi wa Wrocław. Byo naikelenga bunke, nasajile balunda batama. Natemenwe mpila, bino na mambo a balunda nami bakatataka, nakizhizhemo kutemwa mpila. Jibumba ja mpila jo natemenwe, jafumanga ku Warsaw, kabiji ku mpelo ya mulungu nayanga nabo konse ko bayanga na kupama mpila. Konse ko twayanga, twatomanga bingi maalwa, kwingijisha bizhima ne kulwa na bakwetu batundaikanga jibumba jingi. Naubanga bino pa kuba’mba mpwishe bijikila, bino nayukile’mba umvwe bakapokola bankwata kakankalwa kupwisha sukulu wami.

Amiwa ne balunda nami twatemenwe bingi kuya mu bishimikwa mo bakayila bufuku. Inge twaya kokwa, twalwanga bingi na bantu. Bakapokola bankwachile bimye byavula, bino kechi bankasanga ne, mambo nebapanga mazhikakanwa. Nalangulukilenga’mba naikelenga bwikalo bwawama. Nangwa byonkabyo, mu muchima wami nayukile’mba mbena kutamisha. Nayanga kimye kyonse ku chechi pa Mulungu kuba’mba ngwamisheko jiwi jami ja mu muchima.

Mu 2004, Bakamonyi ba kwa Yehoba babiji baishile pa nzubo yami kabiji naswile kwisamba nabo bya mu Baibolo. Byo nafunjile byavula byo kilumbulula kwikala mwina Kilishitu wa kine, jiwi jami ja mu muchima jatendekele kunkatazha. Nayukile namba nafwainwa kuleka kutoma maalwa, kwingijisha bizhima ne kupwanañana na bantu babula kulondela mizhilo ya mu Baibolo. Kabiji namwene kuba’mba nafwainwe kupimpula byubilo byami byatama. Nangwa kya kuba nakebelenga kupimpula byubilo byami, natwajijiletu kuba bintu byatama.

Napimpwile byubilo byami kimye bantu batanu na basatu kyo bampumine. Mbena kuvuluka byo nalaajiletu sulubya mu mukwakwa, byo bampumine ne kunyanta bibaka ku mutwe. Byo namwene’mba  mbena kufwa, nalombele namba: “Anweba Yehoba ndekelaiko mambo pa kubula kumvwina Byambo byenu. Umvwe mbule kufwa, nsakutendeka kufunda Baibolo na Bakamonyi, kabiji nsakupimpula ne byubilo byami.” Kine, kechi nafwile ne. Kabiji natendekele kufunda Baibolo byonkatu byo naambile.

Mu 2006, navilukijile ku England. Nayile kokwa kuba’mba nkamoneko mali avula a kubwelela ku Poland ne kutwajijila na sukulu wami. Byo natwajijile kufunda Baibolo, kinembelo kimo kyamfikile bingi pa muchima. Mutumwa Paulo wanembele’mba: “Bintu byonse nebimona kwikala ke byatutu na mambo a kuwama kwine kwa kuyuka Kilishitu Yesu Nkambo yami. Na mambo a aye naela bintu byonse ne kwibimona kwikala binchatu kuba’mba mmwenemo Kilishitu.” (Filipai 3:8) Byonkatu byonji, ne mutumwa Paulo naye wafunjile kufika palepa, kabiji naye watamine bingi muchima. (Byubilo 8:3) Pano bino, wapimpwile byubilo byanji: waingijile Lesa ne kwibikako kwikala byajinga Yesu. Byo nalangulukilenga pa bintu byapichilemo Paulo, namwene’mba kufunda kufika palepa ne kwikala na byubilo byatama, kechi kuleta lusekelo ne. Nashiinwe kuba’mba inge Paulo wapimpwile byubilo byanji, ne amiwa nafwainwa kupimpula. Nafuukwilepo kwikala mu England ne kuleka kukeba kufunda kufika palepa.

Byo nafunjilenga byavula pe Yehoba, nafwenyenye kwipi ne aye. Mulaye wanji wa kulekelako mambo boba bakeba kupimpula byubilo byabo wamfikile pa muchima. (Byubilo 2:38) Kabiji byo nalangulukilenga pa kinembelo kya 1 Yoano 4:16 kyaamba’mba, “Lesa butemwe,” natendekele kuyuka ene mambo Lesa o ashikilwa bukapondo.

Kabiji natundaikilwe bingi na byubilo bya Bakamonyi. Nemwenejile kuba’mba balondela mizhilo ya mu Baibolo. Nakebele kupwanañana na bano bantu ba lusekelo. Byo nebikileko kupimpula byubilo byami, mu 2008, nabatizhiwe kwikala Kamonyi wa kwa Yehoba.

Baibolo wankwasha kwikala kalume watemwa kufunjisha bantu Baibolo, kabiji wandengela kubula kukizhamo kukeba bintu, kubula kwikala muntu washinta, kwingijisha bizhima, kukizhamo kutoma maalwa ne kutemwa bingi mpila. Nakitemwa mpila ne luno, bino kechi nkizhamo kwiitamba ne.

Nasongola Esther, mukwetu wa mwingilo wa kwa Yehoba wawama. Tusekela bingi kufunjisha bantu Baibolo bamba mulaka wa Kipolishi kuno ku muzhika buyeke bwa England. Kyo kimye kitanshi kwikala na lusekelo mu bwikalo bwami. Nji na jiwi ja mu muchima jawama kabiji mbena kwikala bwikalo bwawama bingi.