Abino byambo bimutekeneshe bya kuba’mba: Lesa ubena kumona bantu byo babena kuyanda mu ntanda lelo jino kabiji wakebesha kwikufumyapo. (Salamo 72:13, 14) Mu Mambo anji Baibolo, Lesa walaya kuba’mba, “anweba mubena kupita mu bya malwa luno, bakemwamunako ku bino bya malwa.” Ñanyi kimye? “Kimye Nkambo Yesu kyo akamweka kufuma mwiulu pamo na bamalaika banji . . . byo akeya na kushinkanya nabo aba babula kuyuka Lesa ne boba babula kukookela mambo awama a Nkambo yetu Yesu.” (2 Tesalonika 1:7, 8) Kuno kumweka Yesu ko akamweka, kukobiwa kulutwe ko batongola mu Baibolo amba “nkondo ya aja juba jikatampe ja Lesa wa Bulume Bonse,” nangwa’mba Amagedonyi.—Lumwekesho 16:14, 16.

Mu ino nkondo ya kulutwe, Lesa kechi ukengijisha bantu ne, bino ukengijisha Mwananji aye Yesu Kilishitu ne bamalaika ba bulume kushinda bantu batama. Bilengwa bya mwiulu bikafumyapo kumanama konsetu.—Isaya 11:4; Lumwekesho 19:11-16.

Ne lelo jino, jishinda Lesa jo amwenamo nkondo kechi jaaluka ne. Ne luno umona’mba kulwa nkondo jo jishinda ja kupwishishamo kumanama ne bubi. Byonkatu byo kyajinga ne kala, Lesa mwine ye wafuukulangapo kimye kya kulwa nkondo ne wafwainwa kulwako. Byonkatu byo twisambapo kala, Lesa  wafuukulapo kala kufumyapo bubi ne kupokolola bantu babena kumanama, kabiji ukengijisha Mwananji, aye Yesu Kilishitu kulwa ino nkondo kulutwe. Kino kibena kulumbulula’mba, nkondo yonse yo babena kulwa ano moba Lesa kechi wiiswisha ne, nangwa kya kuba paji kilengela’mba balwe.

Akifwanyikizhai kino: Bankasa ne kolo babena kulwa shabo saka afumapo. Baleka kulwa ne kutumina shabo foni. Umo waamba’mba, awe ye waji kumbala, mukwabo naye amba, awe ye waji kunzhingijisha. Bonse baloba kwi shabo, bonse babena kuketekela kwibabingisha. Nangwa byonkabyo, shabo byo aumvwa ku bonse babiji, wibakanya kulwa ne kwibambila’mba mumpembelele nkeye na kupwisha lolo lukatazho. Bano bankasa ne kolo baleka kulwa. Katanda kano batendeka jikwabo kulwa. Shabo byo abwelele ku nzubo, kechi watemenwe byaubile bano baana ne, kabiji bonse wibakambwile mambo kechi bamukookejile ne.

Mu ano moba, bisaka bya bantu pa kulwa nkondo, bilomba kwi Lesa kuba’mba ebikwashe. Bino Lesa kechi ukwasha bantu babena kulwa nkondo lelo jino ne. Mu Mambo anji Baibolo, aye waamba’mba: “Kange mushinkanyenga kibi na kibi ku muntu nangwa umo ne,” kabiji “kange mushinkanyenga ne.” (Loma 12:17, 19) Pakuba wabuula bantu amba bafwainwa ‘kumutengelanga saka batekanya’ kuba’mba afumyepo bino bintu kabiji ukooba kino pa Amagedonyi. (Salamo 37:7) Umvwe bisaka bya bantu byabula kupembelela Lesa kwingijilapo, bino byafuukulapo kulwa nkondo, aye umona kuno kulwa nkondo amba kwitota kukebilengela kubula kumona byawama. Pa Amagedonyi, Lesa ukamwesha kuzhingila kwanji ne kupwisha mitotololo yonse ya bisaka bya bantu ne ‘kupwisha nkondo pa ntanda ponse.’ (Salamo 46:9; Isaya 34:2) Ibyo, Amagedonyi yo nkondo ikafumyapo makondo onse.

Kupwisha nkondo ke mapesho avula akaleta Bufumu bwa Lesa. Yesu waambile pa uno kafulumende mu lulombelo lwa kuba’mba: “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:10) Bufumu bwa Lesa kechi bukafumyapotu nkondo ne, bukafumyapo ne bubi bulengela bantu kulwa nkondo. * (Salamo 37:9, 10, 14, 15) O ene mambo baana ba bwanga ba kwa Yesu o babena kupembelela mapesho akaleta Bufumu bwa Lesa.—2 Petelo 3:13.

Myaka inga yo tusakupembelanga Bufumu bwa Lesa kufumyapo buyanji bonse, kumanama ne bubi? Kufika kwa bungauzhi bwa mu Baibolo kubena kumwesha’mba tubena kwikala mu “moba a kupelako” a buno bwikalo. (2 Timoti 3:1-5) * Katatakatu Bufumu bwa Lesa bukafumyepo bintu byonse byatama pa nkondo ya Amagedonyi.

Byonkatu byo twakwisambapo kala, bantu bakafwa mu nkondo yapelako ke boba babula “kukookela mambo awama a Nkambo yetu Yesu.” (2 Tesalonika 1:8) Yukai kuba’mba, Lesa kechi usekela mu lufu lwa bantu ne, nangwatu babi. (Ezikyo 33:11) Mambo “kechi usaka muntu nangwa umo amba akafwe” mu ino nkondo ikapelako ne, aye ubena kukeba’mba mambo awama abena kwamba pe Nkambo yetu Yesu ‘bakeasapwile pano pa ntanda ponse kwikala bukamonyi ku bisaka byonse bya bantu,’ mpelo saka ikyangye kwiya. (2 Petelo 3:8, 9; Mateo 24:14; 1 Timoti 2:3, 4) Na mambo a kuba Bakamonyi ba kwa Yehoba babena kusapwila ntanda yonse, bantu lelo jino babena kufunda pe Lesa, kumvwina mambo awama aamba pe Yesu ne kutengela kimye nkondo kyo ikabulako.