Kashimbi uji na myaka ina wamwene bwishi bwafutumukilenga mu mupaipi wajinga peulu ya kishimikwa bwamwekelenga nobe makumbi. Aye wapwishishe’mba ko kampanyi kalenga makumbi. Kuno kubula kukwatakanya bintu kwa banyike kwakonsha kwitusekesha. Pano bino kubula kumvwisha bintu bimo kwakonsha kwituletelela. Inge mwabula kumvwisha bya kutoma muchima mwakonsha kufuma byatama.

Kubula kumvwisha byaamba mambo a Lesa ko kwakilamo ne kutama. Bantu bamo kechi baumvwishishe byafunjishenga Yesu ne. (Yoano 6:48-68) Kino kyalengejile bavula kukana byo afunjishanga. Kyatamine bingi mambo basankijilepo bintu byakosheshe kwibakwasha bingi.

Nanchi mutanga Baibolo kuba’mba emutangijilenga nyi? Inge byobyo muba, mutwajijile. Pano nanchi mwakonsha kumvwina mungi bintu bimo byo mwatanga nyi? Bantu bavula byo kikala. Akimonai bino bintu bisatu bantu byo bakaulapotu bwishi.

• Bantu bamo bomvwina mungi mukambizho wa mu Baibolo wa kuba’mba, “akamwainga Lesa.” Balanguluka’mba kilumbulula kuchina Lesa. (Musapwishi 12:13) Bino Lesa kechi ukeba bapopweshi banji kumuchina ne. Lesa waamba’mba: “Kange uchine ne, mambo amiwa nji ne obewa. Kange wakamwe ne, mambo amiwa yami Lesa wobe.” (Isaya 41:10) Kwakamwa Lesa kulumbulula kumupa mushingi mukatampe.

• Bakwabo bomvwina mungi byambo byanembelwe na lutangijilo lwa mupashi bya kuba’mba: “Bintu byonse biji na kimye kyabyo, . . . Kuji kimye kya kusemwa ne kimye kya kufwa.” (Musapwishi 3:1, 2) Kino kinembelo kyaambatu pa kintu kiketumwekela atweba bonse kuba’mba juba jimo tukafwa. Mambo a Lesa aamba ne kuba’mba byo tufuukula byakonsha kwitulengela kwikala myaka yavula nangwa ne. Baibolo waamba’mba: “Kwakamwa Yehoba kulengela kwikala moba avula.” (Byambo bya Maana 10:27; Salamo 90:10; Isaya 55:3) Mu ñanyi jishinda? Kulondela byaamba Mambo a Lesa kwitulengela kubula kuba bintu bileta bikola nabiji kupendwapendwa ne bulalelale.—1 Kolinda 6:9, 10.

• Bamo balanguluka’mba Lesa ukonauna ino ntanda mambo Baibolo waamba’mba meulu ne ntanda “byalaminwa mujilo.” (2 Petelo 3:7) Bino Lesa walaya kuba’mba kechi ukonauna ino ntanda ne. Lesa “waikajika ntanda pa bitendekesho byayo; kabiji ikekalanga pa mpunzha yayo myaka ne myaka.” (Salamo 104:5; Isaya 45:18) Ntanda yo bakonauna ke bantu boba byatama, kechi ino ntanda ne. Baibolo inge yaamba pa meulu kechi ilumbululatu bya mwiulu nangwa mwiulu mwikala Lesa ne. Abino kechi byo bikonaunwa ne.

Byonkatu byo mwakutanga peulu, bantu bavula bomvwina mungi byo batanga mu Baibolo. Pano mambo o kyaikela bino? Bamo balanguluka’mba, ‘Inge Lesa uji na maana kabiji wayuka bintu byonse, mambo ka o abujile kwitupa buku wapela kumvwa? Mambo ka o abujile kuba bino?’ Monai bino bishinka bisatu bilengela bamo kumvwina mungi byaamba Baibolo.

1. Bantu bakonshatu kumvwa byaamba Baibolo ke boba bepelula baji na muchima wa kukeba kufunda. Yesu waambijile Shanji amba: “Nemutota patoka anweba Tata, Nkambo wa mwiulu ne ntanda, mambo mwafya bino bintu  ku ba maana ne ku ba milangwe ne kwibisolola ku baana ba bacheche.” (Luka 10:21) Bantu bakonshatu kumvwa byaamba Baibolo ke boba bepelula. Bantu betota bemona amba ‘ba maana ne milangwe’ javula bomvwina Baibolo mungi. Pakuba bepelula nobe “baana ba bacheche,” bo bomvwisha byaamba mambo a Lesa. Jishinda jo banembelamo Baibolo jimwesha maana a Lesa.

2. Bantu bakonshatu kumvwisha byaamba Baibolo inge balomba Lesa kwibakwasha. Yesu waambile’mba bantu bakonshatu kumvwa byo afunjisha inge balomba bukwasho bwa Lesa. Wakonsha kwibakwasha byepi? Yesu waambile’mba: “Nkwasho, mupashi wazhila ye bakatuma Batata mu jizhina jami, ukemufunjisha bintu byonse ne kwimuvululamo bintu byonse byo nemubuujile.” (Yoano 14:26) Lesa upa mupashi wazhila bantu bamulomba. Bo bulume bukwasha bantu kumvwisha byo batanga mu Baibolo. Bino Lesa kechi upa mupashi wazhila bantu babula kumuketekela ne. O ene mambo bantu ba uno mutundu o babujila kumvwisha byaamba Baibolo. Kabiji mupashi wazhila ukwasha ne bena Kilishitu bayuka bulongo Baibolo pa kufunjisha bantu bakeba kuyuka byaamba Baibolo.—Byubilo 8:26-35.

3. Bibaaba bimo bya mu Baibolo bantu bakonshatu kwibyumvwisha inge kimye kyafika kya kuba’mba bebyumvwishe. Ngauzhi Danyela bamubuujile kunemba pa bikamweka kulutwe. Malaika wamwambijile’mba: “Danyela, lama bino byambo ne kubikapo katetesho pa buku kufikatu ne kimye kya ku mpelo.” Bantu batanga buku wa mu Baibolo wa Danyela pa myaka yavula, bino kechi bomvwa mwatala byo batanga ne. Danyela naye kechi waumvwine byambo bimo byo anembelenga ne. Waswile kuba’mba: “Pakuba amiwa naumvwine, bino kechi nakwatakenye mo byatala ne.” Bantu bakomvwishatu bungauzhi bwanembele Danyela pa kimye kyanji mwine Lesa. Malaika waambijile Danyela amba: “Obewa Danyela, yanga mambo bino byambo bebifya kabiji bebishinka na katetesho kufikatu ne ku mpelo.” Bañanyi bakonsha kumvwisha byaamba Lesa? Baibolo waamba’mba: “Kafwako muntu mubi ukakwatakanya bino byambo ne; pakuba baji na maana bo bakebyumvwisha mo byatala.” (Danyela 12:4, 8-10) Lesa usolola byafyamika byaamba Baibolo pa kimye kyafwainwa.

Nanchi Bakamonyi ba kwa Yehoba kuji bimo bya mu Baibolo byo babula kumvwisha nyi? Ee. Bino inge Lesa watokeshapo pa bintu bimo pa kimye kyanji mwine, Bakamonyi nabo bapimpula byo baitabilamo. Boba bino mambo baitabila kuba’mba ne batumwa ba kwa Kilishitu nabo byobyo baubanga. Bapimpulanga byo baitabijilemo inge Yesu wibololako.—Byubilo 1:6, 7.

Kubula kuyuka bilengwa makumbi kechi kwakonsheshe kumuletela byatama awa kashimbi ne. Bino biji mu Baibolo byanema bingi. Onkao mambo, atweba bonse kechi twafwainwa kutangangatu Baibolo bunke bwetu ne kulanguluka’mba tusa kumumvwisha mo atala ne. Lombainga bukwasho pa kuba’mba mumvwishenga byo mutanga. Ipuzhainga bantu bepelula batanga Baibolo, balomba mupashi wa Lesa kwibakwasha kumvwisha mwatala Baibolo. Ipuzhainga bantu baitabila kuba’mba tubena kwikala mu moba Lesa mo abena kukeba bantu kumvwisha byaamba Baibolo. Isambai na Bakamonyi ba kwa Yehoba nangwa tangai mabuku abo alumbulula Baibolo aji pa keyala wa jw.org/kqn. Baibolo walaya’mba: “Inge wajijila maana a kuyuka bintu . . . , ukamuyuka Lesa.”—Byambo bya Maana 2:3-5.