Nasemekejilwe muzhi wa Paddington, mu London, mu kyalo kya England. Mu uno muzhi muji bantu bavula bingi. Naikalanga na bamama ne bakolojami babakazhi basatu. Batata javula betushanga bingi na mambo a kutoma malwa.

Byo najinga mwanyike bamama bafunjishe kulomba kimye kyonse bufuku pa kuya na kulaala. Najinga naka Baibolo kakacheche mwajingatu buku wa Masalamo. Kabiji ano masalamo ne alwile ke nyimbo yo naimbanga. Juba jimo natangile byambo byandengejile kwakamwa bya kuba’mba: “Juba jimo kechi bukakya ne.” Bino byambo byandengejile kutoñama bufuku bonse na kulanguluka pa bya kulutwe. Nalangulukilenga’mba: ‘Kwafwainwa kuji bintu byanema byo nafwainwa kubanga mu bumi bwami.’ Neipwizhenga ne kuba’mba, ‘Mambo ka o naikelako?’ Nachinanga bingi lufu.

Natendekele kulanguluka bingi pa bingelekezha. Nakebanga kwisamba na bantu bafwa, twayanga na bakwetu baana basukulu ku bilende kabiji twatambanga mafilimu atama a bingelekezha. Twaumvwanga bulongo kuba bino pano bino pa bimye bimo, twaumvwanga moyo.

Natendekele kuba byatama saka njitu na myaka jikumi. Napepanga fwanka kabiji kyankatezhe bingi kuleka. Mu kuya kwa moba, natendekele ne kupepa jamba. Byo nafikizhe myaka 11, natendekele kutoma malwa. Nangwa kechi naumvwanga bulongo byo aumvwanyikanga ne, bino naumvwanga bingi bulongo kupendwa. Natemenwe bingi kuteleka ku nyimbo ne kuzha. Nayanga ku bijiilo ne mu bishimikwa bya malwa. Nabombokanga bufuku ne kubwela ku makya. Javula nashalanga ku sukulu na mambo a kukoka. Inge naya ku sukulu, natomanga malwa inge bafunjishi bafuma mu kalashi.

Byo napwishishe sukulu, nafwelukile bingi. Bamama kibakolele bingi ku muchima mambo kechi bayukile byatama byo naubanga ne. Twatobokele kabiji nafumine ne pa nzubo. Nayile na kwikala na mukambwe wami Tony, wapepanga jamba kabiji walamine nsuki yavula bingi. Uno mwanamulume wazhingilanga bukiji, wajinga ngivi kabiji wapoteshanga bingi bizhima. Byo nafikizhe myaka 16, nasemene mwana wa mulume.

Bakamonyi ba kwa Yehoba besambile ne amiwa kimye kitanshi kyo naikalanga mu kishimikwa mwikala bazhike baji na baana. Mu kino kishimikwa kafulumende momo ampele kibamba mwakwikala. Banabakazhi babiji Bakamonyi ba kwa Yehoba bafunjishanga banabakazhi bamo baikalanga mu kino kishimikwa. Juba jimo natainwepo kimye bano Bakamonyi kyo bafunjishenga bano banabakazhi kabiji nakebelenga kwibashiina kuba’mba byo baitabilamo byajinga bya bubela. Bino bano Bakamonyi baingijishe Baibolo pa kukumbula mepuzho onse o najinga nao. Bajinga bingi na kifyele ne lusa. Kyo byandengejile kuswa kufunda Baibolo.

Byo nafunjile mu Baibolo byandengejile kupimpula bwikalo wami. Kufumatu kimye kyo najinga mwanyike, nachinanga bingi kufwa. Pano luno nayuka bukine bwafunjishe Yesu pa lusanguko. (Yoano 5:28, 29) Nayuka ne kuba’mba Lesa wanta bingi muchima. (1 Petelo 5:7) Byambo biji pa Yelemiya 29:11 byamfikile bingi pa muchima, paji byambo bya kuba’mba: “‘Mambo amiwa nayuka bintu byo mbena kulanguluka kwimubila, mbena kulanguluka kwimuletela mutende kechi bya malwa ne, kwimulengela kwikala na luketekelo ne bwikalo bwawama bwa kulutwe,’ byo byaamba Yehoba.” Popo naitabijile kuba’mba nakonsha kwikala na bumi bwa myaka ne myaka mu Paladisa pano pa ntanda.—Salamo 37:29.

Bakamonyi ba kwa Yehoba bantemenwe bingi. Byo nayile na kupwila nabo kimye kitanshi, bantambwijile bingi bulongo kabiji bonse bankasulukijile. (Yoano 13:34, 35) Ku machechi ko nayanga kechi byobyo baubanga ne. Bakamonyi bantambwijile nangwa kya kuba najinga na byubilo byatama. Bantekenyanga bingi ne kunkwasha kimye kyonse. Kino kyandengejile kumvwa bingi bulongo kabiji naumvwangatu nobe nji mu kisemi kikatampe kyakwatankana.

Byo nafunjilenga mu Baibolo byandengejile kufuukulapo kuleka kuba bintu byakanya Lesa. Pano bino kuleka kupepa fwanka kwankatezhe bingi. Nyimbo imo yandetelanga kilaka kya kupepa jamba. Onkao mambo nalekele kuteleka ku ino nyimbo. Nalekele kuya ku bijiilo ne mu bishimikwa bya malwa mambo nafuukwilepo kuleka kutoma malwa. Kabiji nasajile balunda bankwashishe kwikala na byubilo byawama.—Byambo bya Maana 13:20.

Byo papichile kimye, ba Tony nabo batendekele kufunda Baibolo na Bakamonyi ba kwa Yehoba. Bakamonyi byo bakumbwile mepuzho aba Tony kwingijisha Baibolo, ba Tony popo bashiinwe kuba’mba byo bafunjilenga byajinga bya kine. Bapimpwile byubilo byabo, balekele kupwanañana na bakwabo bajinga bambanzhi, kabiji balekele kwiba ne kupepa jamba. Twakookejile byaamba Yehoba ne kuleka bintu byatama byo twaubanga pa kuba’mba tukomeshe mwanetu wa mulume bulongo. Twisongwele mu July 1982.

Mvuluka byo naubanga, nakebanga mitwe imo mu Kyamba kya Usopa ne Labainga! * yaamba pa bantu bapimpwile byubilo byabo. Kino kyandengejile kuleka byatama byo naubanga. Byo baubile byantundaikile bingi. Kino kyandengejile ne amiwa kwibikako kuleka byubilo byatama. Natwajijile kulomba kuba’mba Yehoba ankwashe. Ba Tony ne amiwa twabatizhiwe ne kwikala Bakamonyi ba kwa Yehoba mu July 1982.

Kwikala mulunda ne Yehoba Lesa kwanzhikijila bingi. Ba Tony ne amiwa twimwena Yehoba byo etukwasha mu bimye byakatazha. Tuketekela mwi Lesa nangwatu inge bintu byakatazha, kabiji kimye kyonse witukwasha bingi.—Salamo 55:22.

Nebikileko bingi kufunjisha mwanetu wamulume ne wamukazhi kuyuka Yehoba byonkatu byo na muyuka. Ñumvwa bingi bulongo, mambo nabo babena kufunjisha baana babo kwikala balunda ne Lesa.

Pano naleka kutoñama bufuku bonse na kulanguluka pa bya kulutwe ne pa lufu. Ba Tony ne amiwa tufwakesha bipwilo bya Bakamonyi ba kwa Yehoba na kwibatundaika. Twingijila pamo na balongo ne banyenga kufunjisha bantu byo bakonsha kwitabila mwi Yesu pa kuba’mba nabo bakeyowe bumi bwa myaka ne myaka.