LABAINGA MUKENKENTENGA!
Mu Mwaka wa 2022 Mwavujile Bingi Makatazho—Baibolo Waambapo’mba Ka?
Mu mwaka wa 2022 masawakya a pa mwela onse aambilengatu pa makondo, kukanjila kwa mitengo ya bintu ne bintutu bikwabo byuba bantu bibena konauna ntanda. Baibolo ye yenkatu walumbulula mwatala bino bintu.
Mwatala bintu byamwekele mu mwaka wa 2022
Bintu byamwekele mwaka wapwa bimweshatu patoka kuba’mba tubena kwikala “mu moba a kupelako” byonka byaamba Baibolo. (2 Timoti 3:1) Ano moba a kupelako atendekele mu 1914. Monai bintu byamwekele byo byakwatankana na byaambijile jimo Baibolo:
“Makondo.”—Mateo 24:6.
“Mu 2022 ke mwaka nkondo po yatendekele jikwabo mu Europe.” a
Monai kibaaba kya kuba’mba “Kyalo kya Russia Kyalukuka Kyalo kya Ukraine.”
“Bipowe bya nzala.”—Mateo 24:7.
“Mu mwaka wa 2022 mwajinga kipowe kya nzala kyabaya bingi.” b
Monai kibaaba kya kuba’mba “Nkondo iji mu Ukraine Yaleta Kipowe kya Nzala Mwaya Ntanda.”
“Myalo.”—Luka 21:11.
“Kikola kya kalepu kyabwela jikwabo, kikola kya monkeypox kyabayile bingi kabiji mwalo wa COVID-19 naye watwajijila kumanyika bantu. Bino bikola byamweshatu patoka kuba’mba bikola bisambukilañana byatama bingi ne kuba’mba bantu kechi baji na bulume bwa kwizhikijila ne.” c
Monai kibaaba kya kuba’mba “Bantu 6 Milyonyi Bafwa na Mwalo wa COVID.”
“Bintu bilenga moyo pa kwibimona.”—Luka 21:11.
“Kutwa kyuya, kyaashi, mujilo ne miyulo. Mwaka wa 2022 tukamuvulukilanga ku bino bintu byamwekele byaipaile bantu bavula, konauna bintu byavula kuvwangakotu ne mazubo a bantu.” d
Monai kibaaba kya kuba’mba “Mute Ubena Kuzonga Mwaya Ntanda Yonse.”
“Malwañano.”—Luka 21:9.
“Mu mwaka wa 2022 bantu bazhingijile bingi na mambo a kubula mali, ne kukanjila kwa mutengo wa bintu. Bino bintu byalengejile bantu kwimena makafulumende. e
Monai kibaaba kya kuba’mba “Kukanjila kwa Mitengo ya Bintu Mwaya Ntanda Yonse.”
Ñanyi bintu bikamweka mu mwaka ubena kwiya?
Kafwako wayuka bulongo bintu bikamweka mu mwaka wa 2023 ne. Kyo twayukakotu ke kya kuba’mba, katatakatu Bufumu bwa Lesa, nangwa’mba kafulumende wa mwiulu akalete lupimpu pano pa ntanda. (Danyela 2:44) Uno kafulumende ukafumyapo bintu byonse bilengela bantu kuyanda ne kulengela kyaswa muchima wa Lesa kubiwa pano ntanda.—Mateo 6:9, 10.
Tubena kwimutundaika kulondela mukambizho wa kwa Yesu Kilishitu wa kuba’mba “labainga ne kukenkenta” pa kuba’mba muyuke bintu bibena kumweka mu ntanda byo bibena kufikizha bungauzhi bwa mu Baibolo. (Mako 13:37) Tubena kwimutundaika kwisamba ne atweba pa kuba’mba muyuke Baibolo byo afwainwa kwimukwasha anweba ne kisemi kyenu pa kino kimye ne kwimulengela kwikala na luketekelo lwa bintu byawama biji kulutwe.
a Pa 8 December 2022 ba Jill Lawless baambile pa AP News kuba’mba: “Mu 2022 ke mwaka nkondo po yatendekele jikwabo mu Europe.”
b Kipamo kya World Food Programme kyanembele’mba “Bipowe bya Nzala Byakumbana Ntanda Yonse.”
c Pa 22 September 2022 ba Lawrence O. Gostin, JD banembele mu pepala wa byambo wa JAMA Health Forum kuba’mba: “Tubena kwikala mu kimye kya myalo, patanshi kwaishile COVID-19 palondela Monkeypox, kalepu ne Disease X nangwa’mba twishi twakonsha kuleta mwalo kulutwe.”
d Pa 24 October 2022 ba Martina Igini ba mu kipamo kya Earth.Org baipwizhe’mba “Ñanyi Bintu Byalengejilenga Kwalauka Kwa Mwela mu 2022?”
e Pa 8 December 2022 ba Thomas Carothers ne ba Benjamin Feldman ba mu kipamo kya Carnegie Endowment for International Peace baambile’mba “Lukatazho lwa Mali Lwalengejile Bantu Bavula Kwimena Makafulumende mu 2022.”
Mwakonsha Kutemwa
MEPUZHO A MU BAIBOLO A KUMBULWA
Kiyukilo kya “Moba a Kupelako” Nangwa’mba “Bimye bya ku Mpelo” kyo ki ka”?
Baibolo waambijile jimo bintu byavula bingi bikekala ke “biyukilo” bimwesha’mba tuji mu moba a kupelako.
KYAMBA KYA USOPA
Katatakatu Lesa Akafumyepo Buyanji Bonse
Twayuka byepi kuba’mba Lesa katatakatu afumyepo buyanji ne shinji?
BINTU BYAAMBA BAIBOLO
Bufumu bwa Lesa bo bu ka?
Mu mwingilo wanji yense, Yesu wafunjishanga javula pa Bufumu bwa Lesa. Pa myaka yavula yapitapo, bakalume banji balombela’mba Bufumu bwa Lesa bwiye.
BAKAMONYI BA KWA YEHOBA
Lombai Lufunjisho lwa Baibolo
Ikalai na lufunjisho lwa Baibolo lwatutu pa kimye ne mpunzha yo mukeba.
