Mu uno mwaka wa 2024 mu byalo byavula musakwikala bunsaji. Nangwa byonkabyo, bantu bavula baleka kuketekela bamulwila ntanda.

•   Pa 19 September 2023, kipamo kya Pew Research Center kyataaine’mba bena America bavula bamba’mba “bantangi ba bumulwila ntanda bavula batatu muchima pa bintu byo bakeba abo bene,” kechi pa bikeba bantu bo bemenako ne. a

 Kabiji banyike bavula nabo kechi baketekela mu bamulwila ntanda ne.

•   Pa 29 January 2024, pepala wa byambo wa The New York Times waambile’mba: “Banyike bakebesha bingi kupwisha makatazho. Bino bamba’mba bamulwila ntanda kechi batako muchima ku makatazho apitamo bantu ne.”

•   Pa 22 January 2024, pepala wa byambo wa The Korea Times wanembele byaambile batala pa bya bunsaji’mba: “Banyike bavula baketekela mu bantu babika mavidyo pa intaneti kukila byo baketekela bamulwila ntanda.”

 Nanchi twafwainwa kuketekela’mba bamulwila ntanda bakawamisha bintu kulutwe nyi? Nanchi ñanyi ye twafwainwa kuketekela?

 Bantu kechi bafwainwa kuketekelatu muntu uji yense ne. Baibolo waamba’mba “muntu wabula kuyuka bintu ye kitabilambijinga, bino muntu wajimuka ulangulukishapo pa bintu byo oba.”—Byambo bya Maana 14:15.

•   Pa kuba’mba muyuke inge byambo byo mwatambwila byakine nangwa ne, tangai kibaaba kya mu Kizungu kya kuba’mba “Protect Yourself From Misinformation.”

 Nangwatu bamulwila ntanda ba kishinka kechi baji na bulume bwa kuba bintu byonse byo bakeba ne. O ene mambo Baibolo o etujimwinako’mba:

•   “Kange muketekele mu [bantangi bantu] nangwa mu mwana muntu ukabula kukonsha kwimupulusha ne.”—Salamo 146:3, Baibolo wa Binembelo bya Ntanda Ipya.

 Baibolo waamba’mba Lesa watongola ntangi wafikilamo kabiji waketekelwa aye Yesu Kilishitu. (Luka 1:32, 33) Yesu ye Mfumu wa Bufumu bwa Lesa, kafulumende ubena kulama mwiulu.—Mateo 6:10.

•   Yukai ene mambo o mwafwainwa kuketekela mwi Yesu ne byo akapwisha makatazho o tubena kupitamo. Tangai kibaaba kya kuba’mba “Ñanyi Mfumu wa Bufumu bwa Lesa?” ne kya kuba’mba “Ñanyi Bintu Bikoba Bufumu bwa Lesa?”