LABAINGA MUKENKENTENGA!
Nanchi Baibolo Waambapo’mba ka pa Bupopweshi ne Nkondo Iji mu Ukraine?
Umvwai bino bishinka byaamba bantangi ba bupopweshi ne pa nkondo iji mu Ukraine:
Pa 7 March 2022, kipamo kya EUobserver kyaambile’mba: “Mukulumpe wa chechi ya Orthodox mu Russia aye Patriarch Kirill kechi waambapo kyambo nangwa kimo pa kintu kyauba Russia byo alukuka Ukraine ne . . . . Chechi wanji watwajijila na kwamba bya bubela pa Ukraine kabiji Putin ubena kwingijisha bino byambo bya bubela kufuma ku bantangi ba bupopweshi kwibingishishamo kyo abena kulwila nkondo na bena Ukraine.”
Pa 8 March 2022, pepala wa byambo wa AP waambile’mba: “Patriarch Kirill . . . waambile’mba byauba Russia kulukuka kyalo kya Ukraine kijitu bulongo mambo jo jishinda ja kupwishishamo bundengamambo.”
Pa 16 March 2022, pepala wa byambo wa mu Jerusalem waambile’mba: “Ntangi wa bupopweshi bwa Orthodox mu Ukraine aye Metropolitan Epiphanius I wikala mu muzhi wa Kyiv, pa Kimo wapesheshe bantu banji kuba’mba ‘mubena kuba bingi bulongo kulwa na bena Russia’ . . . kabiji waambile ne kuba’mba kwipaya bashilikale bena Russia kechi kulenga mambo ne.”
Pa 24 February 2022, kipamo kya UCCRO a kyaambile’mba: “Atweba [Kipamo Kitala pa Machechi mu Ukraine ne Bupopweshi (UCCRO)] twakwashishe bashilikale bena Ukraine ne bantu bonsetu babena kulwako ino nkondo kuba’mba bazhikijile kyalo kyetu. Tubena kwibasanchila bingi bashilikale bonse pa kwibikako kwabo kuba’mba bazhikijile kyalo kya Ukraine ku balwanyi betu kabiji tubena kwibalombelelako kuba’mba bashinde.”
Mwalangulukapo’mba ka pa bino byonse byaamba bano bantu? Nanchi bupopweshi bwitela’mba bubena kulondela Yesu Kilishitu bwafwainwa kutundaika bantu babo kuya ku nkondo nyi? Nga Baibolo waambapo’mba ka pa kutundaika nkondo?
Bupopweshi bwivwanga bingi mu bya nkondo kufumatu ne kala
Kufumatu ne kala bupopweshi javula bwamba’mba kijitu bulongo kuya ku nkondo akwe saka bwibepekezha kulamawizha mutende. Pa myaka yavula yapitapo, Bakamonyi ba kwa Yehoba bakwasha bantu kuyuka’mba byuba bupopweshi kwivwanga mu nkondo kechi kwawama ne.
Nanchi bupopweshi bwa bena Kilishitu bwafwainwa kutundaika nkondo nyi?
Yesu wafunjishe’mba: “Wafwainwa kutemwa mukwenu byonka byo witemwa obe mwine.” (Mateo 22:39) “Temwainga balwanyi benu.”—Mateo 5:44-47.
Akilangulukaipo pa buno bwipuzho: Nanchi bupopweshi bwitela’mba bukookela mikambizho ya kwa Yesu yaamba pa kwitemwa, bwafwainwa kutundaika bantu babo kuya na kwipaya bakwabo mu nkondo nyi? Pa kuba’mba mutaane mukumbu, tangai bino bibaaba “True Christians and War” ne “Is It Possible to Love One’s Enemies?”
Yesu waambile’mba: “Bufumu bwami kechi bwa pano pa ntanda ne. Umvwe Bufumu bwami bwajinga bwa pano pa ntanda, inge ba mingilo bami baji kundwilako kuba’mba babule kumpana.” (Yoano 18:36) “Bonse basenda mpoko bakafwa ku mpoko.”—Mateo 26:47-52.
Akilangulukaipo pa buno bwipuzho: Inge kya kuba bena Kilishitu kechi balwileko nangwatu kupokololako Yesu ne, abya nanchi bafwainwa kulwa nkondo na mambo a bintu bimo byamweka nyi? Pa kuba’mba muyuke bena Kilishitu batanshi byo balondelanga mu bukishinka byajinga Yesu ne byo afunjishenga, tangai kino kibaaba kya kuba’mba “Is War Compatible With Christianity?”
Ñanyi kintu kikamwekela bupopweshi butundaika nkondo?
Baibolo waamba’mba Lesa washikwa bingi bupopweshi bwitela’mba bubena kwimenako Yesu bino saka bubena kuba bintu byapusana na byo afunjishenga.—Mateo 7:21-23; Titusa 1:16.
Buku wa Lumwekesho waamba’mba Lesa umona buno bupopweshi amba bo bwaipayisha “bonse bo baipayile pa ntanda.” (Lumwekesho 18:21, 24) Pa kuba’mba muyuke ene mambo o kyaikela bino, tangai kino kibaaba kya kuba’mba “Babilona Mukatampe ye mu ka?”
Yesu waambile’mba bupopweshi bonse bo bakana kwi Lesa bakebonauna na mambo a byubilo byabo byatama, byonkatu biji kichi kipanga bipangwa byabola “bekitema ne kwikitaya mu mujilo.” (Mateo 7:15-20) Pa kuba’mba muyuke kino byo kikekala, tangai kino kibaaba kya kuba’mba “Mpelo ya Bupopweshi bwa Bubela Iji Pepi!”
Bene bena bino bipikichala, ku kipiko kufika ku kilujo: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Kipamo Kitala pa Machechi mu Ukraine ne Bupopweshi kuvwangakotu ne machechi 15 abena kwimenako chechi wa Orthodox, Greek ne chechi wa Bakatolika, chechi wa ba Polotesitanti, Evangelical, bupopweshi bwa Bayudea ne ba Mozilemu.
Mwakonsha Kutemwa
Kyalo kya Russia Kyalukuka Kyalo kya Ukraine—Nanchi Bungauzhi bwa mu Baibolo Bubena Kufika Nyi?
Funjilaipo bikwabo muyuke mwatala bintu bibena kumweka mu ntanda lelo.
ESSENTIAL BIBLE TEACHINGS
Bufumu bwa Lesa bo bu ka?
Mu mwingilo wanji yense, Yesu wafunjishanga javula pa Bufumu bwa Lesa. Pa myaka yavula yapitapo, bakalume banji balombela’mba Bufumu bwa Lesa bwiye.
