Dokotala wayuka bya kutumbula aye Vivek Murthy wa mu kyalo kya U.S waambile pa 17 June 2024 mu pepala wa byambo wa New York Times amba: “Twataana kuba’mba lukatazho lukatampe lubena kunengela banyike bavula kukolwa bikola bya ku bongo ke bya kutambatamba pa mafoni ne pa Intaneti kabiji luno lukatazho lubena kukebewa kumonapo jishinda ja kwilupwishishamo.”

 Bansemi mwafwainwa kuzhikijila byepi baana benu ku bizumba biji mu bya kutambatamba ne mashinda a kwisambilamo pa mafoni ne pa Intaneti? Baibolo waambapo mashinda awama afwainwa kwimukwasha.

 Ingijishai ano mafunde a mu Baibolo.

 “Muntu wajimuka ulangulukishapo pa bintu byo oba.”—Byambo bya Maana 14:15.

 Byo mwayuka bizumba biji mu bya kutambatamba ne mashinda a kwisambilamo pa mafoni ne pa Intaneti, kange muswishe baana benu kwingijishanga bino bintu kutama ne. Saka mukyangye kuswisha mwanenu kutendeka kwingijisha Intaneti nangwa kwikala na foni, monai kuba’mba mwanenu wafikilamo bulongo kuba’mba wafwainwa kulondela mizhilo yo mwamupa pa bya kwingijishanga kimye kyanji inge uji pa foni ne pa Intaneti. Kabiji mwafwainwa kumukwasha kwikala na balunda bawama ne kuchinuzhuka kutamba bintu byabula kufwainwa.

•   Pa kuba’mba muyukilepo byavula, tangai bibaaba bya Kizungu bya kuba’mba “Should My Child Use Social Media?” ne “Teaching Your Teenager Social Media Safety.”

 “Saka mwingijisha kimye kyenu bulongo.”—Efisesa 5:16.

 Inge mwaswisha mwanenu kwikala na foni, mubuulai mikambizho yo afwainwa kulondelanga kabiji mulumbulwilai kuba’mba kwingijisha bulongo foni nangwa Intaneti kukamuzhikijila bingi. Saka mutako bingi muchima inge mwamona byubilo bya mwanenu byatendeka kupimpulwa. Inge mwamona bino, byo bya kuyukilako’mba mwafwainwa kukwasha mwanenu kuyuka pa kupelela inge ubena kwingijisha Intaneti.

•   Ingijishai mavidyo a bipikichala byo babena kulenga Jimukai na Mashinda a Kwisambilamo pa Intaneti pa kukwasha mwanenu kuyuka ene mambo o mwamupeela mizhilo ya kulondela pa kutamba bya kutambatamba kwingijisha foni nangwa Intaneti.

 Baibolo witubuula’mba tubena kwikala mu ‘moba a kupelako akatazha.’ (2 Timoti 3:1-5) Kabiji witubuula ne mashinda awama afwainwa kwitukwasha kuyuka mwa kubila na bintu byakatazha. Kuji bibaaba kukila pa 20 byaamba pa Baibolo byafwainwa kukwasha bansemi ne baana biji mu uno mutwe byaamba pa banyike babena kukolwa bikola bya ku bongo.