Pa 19 May 2022, kipamo kya United Nations Security Council kyatambwijile sawakya kufuma ku babiloolo kukila pa 75 wa kuba’mba “nkondo iji mu Ukraine ibena kubayisha kipowe kya nzala kyatendekele na mwalo wa COVID-19 ne kwalauka kwa nkilo.” Pepala wa byambo wa The Economist waambile’mba “na mambo a kuba’mba mu ntanda muji makatazho avula bingi, nkondo isakulengela bantu bavula kwikala kwa kubula kajo.” Baibolo waambijile jimo kuba’mba kukekala bipowe bya nzala mu kino kimye kyetu, pano bino witukwasha ne kuyuka bya kuba na ano makatazho.

•   Yesu waawile’mba: “Kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala.”—Mateo 24:7.

•   Buku wa mu Baibolo wa Lumwekesho walumbulula bantu bana baikele pa bambili ba kifwanyikizho. Umo pa bano bantu wimenako nkondo. Walondejilepo wimenako kipowe kya nzala, kimye kajo kyo kakakepa ne kwikapotesha pa mutengo mukatampe. “Namwene mbili ufiita, kabiji awa waikelepo wajinga na shikelu wa kupiminako mu kuboko kwanji. Kabiji naumvwine kyaumvwanyikilenga nobe jiwi . . . saka kyamba’mba: ‘Kipimo kya kwachi kya wichi kipotwa ndenali umo ne bipimo bisatu bya kwachi bya mbaale nabyo bipotwa ndenali umo.’”—Lumwekesho 6:5, 6.

 Bungauzhi bwa mu Baibolo bwaamba pa bipowe bya nzala bubena kufika luno mu kimye Baibolo kyo atela’mba “moba a kupelako.” (2 Timoti 3:1) Pa kuba’mba muyukilepo byavula pa “moba a kupelako” ne bilumbulula bantu bana baikala pa bambili bo balumbulula mu Lumwekesho, tambai vidyo wa mu Kizungu wa kuba’mba The World Has Changed Since 1914, kabiji tangai kibaba kya kuba’mba “Nanchi Mwayuka Bambili Bana—Byo Bemenako Nyi?”

•   Mu Baibolo muji mafunde akonsha kwitukwasha kuyuka bya kuba na makatazho apusana pusana, kubikapotu ne bipowe bya nzala nangwa kukepelwa kwa kajo. Monai mafunde amo mu kibaaba kya mu Kizungu kya kuba’mba “How to Live on Less.”

•   Kabiji Baibolo witupa luketekelo lwa kuba’mba bintu bikawama kulutwe na lwendo. Witulaya kuba’mba “kajo kakavula bingi pano pa ntanda,” kabiji bantu bonse bakekala na kajo kavula. (Salamo 72:16) Pa kuba’mba muyuke byavula pa luketekelo lwitupa Baibolo lwa kulutwe ne ene mambo o mwafwainwa kuketekela byo aamba, tangai kibaaba kya kuba’mba “A Real Hope for a Better Tomorrow.”