Lukatazho lwa mazhikakanwa mu bantangi ne babiloolo ba mukafulumende lujitu ntanda yonse kabiji mubena kufuma makatazho avula bingi. a Mu kimye kya mwalo wa kolona, babiloolo mu byalo byavula bebapeelemo mambo a kwingijisha mali o bafwainwe kwingijisha kukwashishamo bantu ku uno mwalo wa kolona, bino abo bafuukwilepo kwiengijisha abo bene. Na mambo a buno bwivi ne mazhikakanwa bantu bavula bakolelwe ne kufwa ku uno mwalo.

 Na mambo a mazhikakanwa mu makafulumende, buyanji bubena kuyilakotu palutwe. David Cameron wajinga ntomesha mu kyalo kya United Kingdom, waambile bino amba: “Mazhikakanwa ajitu nobe tangatanga watabakana konse kabiji byalo byonse bikobamo.”

 Onkao mambo, twashiinwa kuba’mba katatakatu mazhikakanwa onse aji mu makafulumende a bantu akapwe. Mambo ka o twaambila bino? Monai byaamba Baibolo pe Lesa byo akoba.

 Baibolo walumbulula bino byambo byaambile mwine Lesa amba: “Amiwa Yehoba natemwa bunchibamambo bwaoloka; nashikwa bwivi ne bintu byatama.” b (Isaya 61:8) Bantu byo babena kuyanjilamo na mambo a bwivi bwa bantu bakwabo, Lesa ubena kumona. (Byambo bya Maana 14:31) Lesa walaya’mba: “Na mambo a kuba bakajilwa bebamanyika, . . . Amiwa nkemana ne kwibakwasha.”—Salamo 12:5.

 Ñanyi bintu Lesa byo akooba? Aye kechi ukafumyapotu makafulumende ajipo ne, bino ukaletapo kafulumende wanji wa mwiulu utelwa’mba “Bufumu bwa Lesa.” (Mako 1:14, 15; Mateo 6:10) Baibolo waamba’mba: “Lesa wa mwiulu ukaleta bufumu . . . bukavingakanya ne kupwisha buno bufumu bonse kabiji abo bukekala myaka ne myaka.” (Danyela 2:44) Onkao mambo, Lesa ukafumyapo mazhikakanwa ne bwivi bo tubena kumona lelo jino.

 Twayuka byepi kuba’mba mu kafulumende wa Bufumu bwa Lesa kechi mukekalapo mazhikakanwa ne? Akyumvwai bino bishinka.

1.  1. Bulume. Bufumu bwa Lesa bufumya bulume kwi Lesa wa bulume bonse.—Lumwekesho 11:15.

    Kikapwisha lukatazho: Pa kuba’mba makafulumende a bantu engile bulongo atambula mali ku bangikazhi kupichila mu misonko ne mashindatu akwabo. Akino javula babinemanga mu kafulumende batambula mazhikakanwa, kwiba ne kwingijisha bintu kutama. Pakuba Bufumu bwa Lesa bebukwasha kwi Lesa wa Bulume Bonse. Onkao mambo, abuno bufumu bukapa muntu yense bintu byo akeba.—Salamo 145:16.

2.  2. Kalama. Lesa wasala Yesu Kilishitu kwikala Kalama wa buno Bufumu.—Danyela 7:13, 14.

    Kikapwisha lukatazho: Bakalama ba bantu nangwa bawamepotu byepi bebatwala mungi ku bakwabo ne kwibalengela kuba bintu byatama. (Musapwishi 7:20) Pakuba Yesu kafwako wafwainwa kumupa mazhikakanwa ne. (Mateo 4:8-11) Mambo bintu byonsetu byo obila bangikazhi banji wibyuba na mambo a kwibatemwa kabiji wibakwasha mu makatazho onsetu o bapitamo.—Salamo 72:12-14.

3.  3. Mizhilo. Mizhilo ya Bufumu bwa Lesa yaoloka kabiji bonse beikookela ibakwasha bingi.—Salamo 19:7, 8.

    Kikapwisha lukatazho: Mizhilo ya bantu javula yakatazha bingi kabiji kechi beingijisha bulongo ne. Akino kilengela bantu kutendeka kwiba bintu. Pakuba mizhilo ya Lesa yawama bingi kabiji ikwasha bantu mu bwikalo bwabo. (Isaya 48:17, 18) Ino mizhilo ya Lesa kechi yambatu pa byubilo ne, bino yamba ne pa kine kintu kitulengela kulondela mizhilo yanji. (Mateo 22:37, 39) Lesa uyuka biji mu muchima kabiji wingijisha mizhilo yanji na lusa.—Yelemiya 17:10.

 Tubena kwimutundaika kufunjilapo byavula pa milaye ya mu Baibolo yaamba pa kafulumende wa Lesa mukabula mazhikakanwa.

•   Pa kuba’mba mufunjilepo bishinka bisatu byaamba pa ene mambo mu Bufumu bwa Lesa o mukabujila mazhikakanwa, tangai uno mutwe wa kuba’mba “Bufumu bwa Lesa Kafulumende Wabula Mazhikakanwa.”

•   Pa kuba’mba mufunjilepo byavula pa kafulumende wa Lesa ne bintu byo bukooba pano pa ntanda, tambai vidyo wa kuba’mba Bufumu Bwa Lesa bo bu Ka?

•   Kebaipo muntu wa kwimufunjishanga Baibolo pa kuba’mba mwimwene bintu byo mwafwainwa kumwenamo mu milaye iji mu Baibolo.