Mu sawakya wa mu June 2022, mukulumpe wa kipamo kya World Bank Group waambile’mba: “Bukomo bwa ntanda yonse bwaikala mu kizumba jikwabo. Mitengo ya bintu ibena kukanjila bingi lubilo, kabiji bantu kechi baji na mali avula a kupotamo bintu ne.”

 Kipamo kya International Monetary Fund kyaambile’mba: “Mutengo wa manyi ne kajo ubena kukanjila bingi bukiji, kabiji kyalengela bantu baji mu byalo biyanji bwikalo kukatazha bingi.”

 Baibolo witukwasha kuyuka ene mambo o tubena kupichila mu ano makatazho, byo twakonsha kuba, ne kwitupa luketekelo lwa kuba’mba ano makatazho onse akapwa.

•   Baibolo utela kino kimye kyo tubena kwikalamo amba “moba a kupelako.”—2 Timoti 3:1.

•   Yesu waambile’mba mu moba a kupelako, kukamwekanga “bintu bilenga moyo.” (Luka 21:11) Bantu bomvwa moyo inge mitengo ya bintu keikanjile. Bakamwa pa bwikalo bwabo bwa kulutwe ne kuba’mba kechi bakakonshanga kukebela bisemi byabo bintu bya mu bwikalo ne.

•   Buku wa Lumwekesho waambijile jimo amba mitengo ya kajo ikabaya bingi mu moba a kupelako. “Naumvwine kyaumvwanyikilenga nobe jiwi . . . saka kyamba’mba: ‘Kipimo kya kwachi kya wichi kipotwa ndenali umo ne bipimo bisatu bya kwachi bya mbaale nabyo bipotwa ndenali umo.’”—Lumwekesho 6:6.

 Pa kuba’mba muyukilepo byavula pa “moba a kupelako” ne bungauzhi buji mu buku wa Lumwekesho, tambai vidyo wa mu Kizungu wa kuba’mba The World Has Changed Since 1914 ne kutanga kibaaba kya kuba “Nanchi Mwayuka Bambili Bana—Byo Bemenako Nyi?”

•   “Bakashimika mazubo ne kwikalamo, kabiji bakajimba miñanzañanza ne kuja bipangwa byayo. Kechi bakashimika mazubo ne muntu ungi waikalamo ne, kabiji kechi bakajimba miñanzañanza ne muntu ungi waja bipangwa byayo ne.”—Isaya 65:21, 22.

•   “Kajo kakavula bingi pano pa ntanda; kakekala ne peulu ya mitumba.”—Salamo 72:16.

•   “Yehoba waamba’mba, ‘Na mambo a kuba bakajilwa bebamanyika, ne na mambo a kubinza kwa bayanji, amiwa nkemana ne kwibakwasha.’”—Salamo 12:5. a

 Katatakatu Lesa akafumyepo buyanji bonse, kechi mu kyalo kimotu ne, bino mwaya ntanda yonse. Pa kuba’mba muyuke byo akoba bino, tangai kibaaba kya mu Kizungu kya kuba’mba “Is a Fair Economic System Possible?”

 Bino nangwatu kyonka kino kimye, Baibolo wakonsha kwitukwasha kuyuka bya kuba na mitengo ya bintu ibena kukanjila. Wakonsha kwitukwasha byepi? Muji mafunde aamba pa byo twafwainwa kwingijishanga mali bulongo. (Byambo bya Maana 23:4, 5; Musapwishi 7:12) Pa kuba’mba muyukilepo byavula, tangai kibaaba kya kuba’mba “Zhikijilai Bintu Byanema mu Bwikalo” ne kya mu Kizungu kya kuba’mba “How to Live on Less.”