Ano moba kyakatazha bingi bantu bavula mwaya ntanda kwikala na mwakumwena mali avula a kwikwashishamo. Kabiji luno lukatazho lubena kutwajijilatu.

•   Kwesakana na sawakya waamba pa bibena kumweka mwaya ntanda, a waamba’mba “bantu babena kupotatu bintu bicheche na mambo a kukepa kwa mali o babena kufola.” Uno yenka sawakya waamba ne kuba’mba inge luno lukatazho lwa kubula mali babule kwingijilapo bukiji, kinetu “bintu bisakutamina bonsetu banonshi ne bayanji” kabiji “bisemi byavula kechi bisakwikalanga na bintu byafwainwa bya mu bwikalo ne.”

 Nanchi makafulumende a bantu akapwisha buyanji bwa kubula mwakumwena mali nangwa kuwamishakotu pacheche nyi?

 Baibolo walumbulula’mba kujitu kafulumende umo uji na bulume bwa kupwisha buyanji bonse kuvwangakotu ne kubula mwakumwena mali ne kuba’mba bantu bonse bakekala na bintu byonse byo bakeba mu bwikalo bwabo kukila byo kiji lelo jino kya kuba bamo banonshi bakwabo bayanji. Baibolo waamba’mba: “Lesa wa mwiulu ukaleta bufumu.” Uno kafulumende ye ukapwisha makatazho onsetu aji pano pa ntanda. (Danyela 2:44) Mu uno kafulumende wa Lesa, kafwako muntu nangwa umo ye bakavulamamo nangwa ukakajilwa kintu ne. (Salamo 9:18) Bantu bonse bakekala mu Bufumu bwa Lesa bakekala na bintu byonse bya kwibaletela lusekelo. Bonse bakekalamo bakamwenamo bintu byawama mu mingilo yo bakengilanga.—Isaya 65:21, 22.