Lukelokelo pa 24 February 2022, bashilikale bena Russia balukukile kyalo kya Ukraine nangwa kya kuba bantangi mu byalo byavula baesekesha kukanya Russia kuba’mba kange balwe ne. Nanchi aye milukuchi isakulengela ntanda kwikala byepi? António Guterres mukulumpe wa kipamo kya United Nations, waambile moba acheche apitapo kuba’mba: “Aye nkondo ne milukuchi iji mu Ukraine isakuleta bingi makatazho ne buyanji ku bantu mwaya ntanda kabiji mutende usakulubankana bingi.”

•   Yesu Kilishitu waambijile jimo kala kuba’mba “kisaka kikalukuka kisaka kikwabo ne bufumu bukalukuka bufumu bukwabo.” (Mateo 24:7) Tangai kibaaba kiji na mutwe wa kuba’mba “Kiyukilo kya ‘Moba a Kupelako,’ nangwa’mba ‘Bimye bya ku Mpelo’ kyo Kyepi?” pa kuba’mba mumone Baibolo byo aambilepo kala kuba’mba makondo o tubena kumvwa ne kumona luno abena kufikizha bungauzhi bwa kwa Yesu.

•   Buku wa mu Baibolo wa Lumwekesho wamwesha muntu waikala pa “mbili uchila” kabiji wafumyapo “mutende pano pa ntanda.” (Lumwekesho 6:4) Tangai kibaaba kiji na mutwe wa kuba’mba “Nanchi Mwayuka Bambili Bana byo Bemenako Nyi?” pa kuba’mba muyuke buno bungauzhi byo bubena kwimenako makondo lelo jino.

•   Buku wa mu Baibolo wa Danyela waambijile jimo kala kubula kumvwañana kwa “mfumu wa ku kabeta ka ku bulenge” na “mfumu wa ku kabeta ka ku buyeke.” (Danyela 11:25-45) Tambai vidyo wa kuba’mba Bungauzhi Bwafika Kala—Danyela Kitango 11 pa kuba’mba muyukilepo byavula ene mambo kyalo kya Russia ne byalo bikwabo byakwatankana nakyo o byaikela mfumu wa ku kabeta ka ku buyeke. a

•   Buku wa Lumwekesho waamba ne pa “nkondo ya aja juba jikatampe ja Lesa wa Bulume Bonse.” (Lumwekesho 16:14, 16) Pano bino, aye nkondo ya Lesa yapusana bingi na nkondo ibena kulwa bisaka bya bantu nabiji yo tubena kumona luno. Tangai kibaaba kiji na mutwe wa kuba’mba “Nkondo ya Amagedonyi yo i ka?” pa kuba’mba muyukilepo bishinka byavula pa kikamweka pa ino nkondo iji kulutwe.

•   Baibolo waamba’mba Lesa ukapwisha “nkondo pa ntanda ponse.” (Salamo 46:9) Tangai kibaaba kiji na mutwe wa kuba’mba “Ketekelai Kuba’mba Kulutwe Bintu Bikawama Bingi” pa kuba’mba mufunjilepo byavula pa bintu byawama byalaya Lesa.

•   Yesu wafunjishe baana banji ba bwanga kulombanga’mba Bufumu bwa Lesa bwiye. (Mateo 6:9, 10) Abuno Bufumu ke kafulumende uji mwiulu ukeya na kuba kyaswa muchima wa Lesa pano pa ntanda, kabiji kyaswa muchima wa Lesa ke kuleta mutende pano pa ntanda ponse. Pa kuba’mba muyuke bintu byawama bikaleta buno Bufumu, tambai vidyo wa kuba’mba Bufumu bwa Lesa bo bu Ka?

 Mu Ukraine muji Bakamonyi ba kwa Yehoba kukila pa 129,000. Byonkatu biji Bakamonyi mu byalo bikwabo, abano nabo babena kulondela byajinga Yesu kubula kwivwanga mu milukuchi ya ntanda ne kukana kulwako nkondo. (Yoano 18:36) Bakamonyi ba kwa Yehoba ntanda yonse batwajijila kusapwila “mambo awama a Bufumu” kuba’mba bo bonkatu bukapwisha makatazho onse a bantu, kuvwangakotu ne nkondo. (Mateo 24:14) Tubena kwimutundaika kwitunembela kuba’mba mufunjilepo byavula pa byaamba Baibolo pa bintu byawama biji kulutwe.