Pa Kibelushi pa 13 April 2024, Mukulumpe wa kipamo kya United Nations aye António Guterres byo aambilenga pa kulukukwa kwa kyalo kya Isalela ku kyalo kya Iran pa jonka jino juba, waambile’mba: “Kino kyo kimye kya kukepeshako malwañano. Kino kyo kimye kya kwilama.”

 Malwañano aji ku Middle East ke kyakumwenakotu kya bibena kubiwa mwaya ntanda yonse.

 Pa 26 January 2023, kipamo kya United Nations Security Council kyaambile’mba: “Milukuchi ibena kuvujilakotu mu ntanda kufumatu kimye kya Nkondo ya Bubiji ya Ntanda Yonse kabiji bantu bavula baji mu kizumba.”

 Byalo muji milukuchi ke Isalela, Gaza, Syria, Azerbaijan, Ukraine, Sudan, Ethiopia, Niger, Myanmar ne Haiti. a

 Nanchi malwañano akapwa ñanyi kimye? Nanchi bandamabyalo bakonsha kuleta mutende nyi? Baibolo waambapo’mba ka?

 Milukuchi iji mu ntanda lelo jino ke kiyukilo kibena kumwesha’mba katatakatu nkondo yonse ipwe. Ano makondo abena kufikizha bungauzhi bwa mu Baibolo bwaamba pa kimye kyo tujimo. Baibolo utela kino kimye’mba “mpelo ya buno bwikalo.”—Mateo 24:3.

•   “Mukomvwanga makondo ne nkuwa ya makondo. . . . Kisaka kikalukuka kisaka kikwabo ne bufumu bukalukuka bufumu bukwabo.”—Mateo 24:6, 7.

 Tangai kibaaba kya kuba’mba “Kiyukilo kya “Moba a Kupelako,” Nangwa’mba “Bimye bya ku Mpelo” kyo ki ka?” pa kuba’mba mumone makondo ajiko lelo jino byo abena kufikizha bungauzhi bwa mu Baibolo.

 Baibolo waambila jimo pa mpelo ya malwañano. Ñanyi kintu kikalengela kino kubiwa? Bulume bwa bantu kechi bwakonsha kuba kino ne. Bino nkondo ikapwatu pa Amagedonyi, “nkondo ya aja juba jikatampe ja Lesa wa Bulume Bonse.” (Lumwekesho 16:14, 16) Nkondo ya Amagedonyi inge yapwa, Lesa ukafikizha mulaye wanji wa kuletela bantu mutende wa myaka ne myaka.—Salamo 37:10, 11, 29.

 Pa kuba’mba muyukilepo byavula pa nkondo ya Lesa byo ikapwisha makondo onse, tangai kibaaba kya kuba’mba “Nkondo ya Amagedonyi yo i Ka?”