Bya bumulwila ntanda byaleta mabano mu byalo byavula mwaya ntanda. Sawakya wa Pew Research Center survey wa mu 2022 waambile’mba: “Bakulumpe bavula bo baipwizhe mu byalo 19 baambile’mba bantu baji mu bipanyi bya bumulwila ntanda bepachika na bantu ba mu bipanyi bikwabo mu byalo byabo.”

 Nanchi mwamona’mba bantu bekala mu nyaunda yenu babena kwabenamo na mambo a bya bumulwila ntanda nyi? Mambo ka? Nanchi luno lukatazho lwakonsha kupwa nyi? Umvwai byaamba Baibolo.

 Baibolo waambijile jimo pa ano moba atelwa’mba “moba a kupelako” kuba’mba bantu bavula bakekala na byubilo bilengela kubula kukwatankana.

•   “Mu moba a kupelako kukeya bimye byakatazha. Mambo bantu bakekala betemwatu abo bene, . . . babula kukeba kumvwañana.”—2 Timoti 3:1-3.

 Nangwa kya kuba bantu babena kwingila na ngovu, makafulumende kechi abena kwingila bulongo ne. Bantu babula kuyila mumo bakankalwa kwingijila pamo ne kupwisha makatazho. Abino byo byaambijile jimo Baibolo.

•   “Bantu . . . balama bantu bakwabo na kwibayanjisha.”—Musapwishi 8:9.

 Nangwa byonkabyo, Baibolo waamba pa kafulumende utangijilwa na kalama ukapwisha makatazho abena kupitamo bantu lelo jino.

 Baibolo waamba pa kalama uji na bulume bwa kupwisha ano makatazho aye Yesu Kilishitu. Yesu uji na bulume, luusa kabiji ukebesha bingi kukwatankanya bantu ne kwibaletela mutende.

•   “Mu kimye kya bukalama bwanji baoloka bakekalanga bulongo, ne mutende ukavula.”—Salamo 72:7.

•   “Bisaka byonse bya bantu bikamwingijilanga.”—Salamo 72:11.

 Yesu kalama wafikilamo mambo wata muchima bantu kabiji ukeba kwibakwasha, kikatakata bantu bo bafwa nshiji.

•   “Aye ukapokolola muyanji ukeba bukwasho, ne mulanda ne yense wabula wa kumukwasha. Ukobila lusa mulanda ne muyanji, kabiji ukapulusha bumi bwa bayanji. Ukebapokolola ku lumanamo ne ku bukapondo.”—Salamo 72:12-14.

 Fundai byavula pa Bufumu wa Lesa, kafulumende wa mwiulu utangijilwa na Yesu. Yukai byo mwafwainwa kumwenamo ne kutundaika buno Bufumu.

•   Tambai vidyo wa kuba’mba Bufumu bwa Lesa bo bu ka?

•   Tangai kibaaba kya kuba’mba “Bufumu bwa Lesa Kafulumende Wabula Mazhikakanwa.”