Bantu bavula mwaya ntanda babena kumanama na mambo a miyulo. Akimonai ano masawakya:

•   Pa 2 August 2023 ba AP News baambile’mba: “Pa moba acheche apitapo, mu muzhi mukatampe wa mu China mwanokele mvula mukatampe ukyangye kunokapo kala pa myaka 140 yapitapo. Kutendeka pa Kibelushi kufika pa Kisatu, kwanokele mvula wabayile mamilimita 744.8 (mainchi 29.3).”

•   Pa 3 August 2023, mulabasa wa Deutsche Welle waambile’mba: “Kinkunkwila kitelwa’mba Khanun kyaletele mvula ne mwela mukatampe ja bubiji ku kabeta ka ku bulenge bwa Japan pa Kina. Na mambo akino, bantu babiji bafwile. . . . Uno kinkunkwila waketekelwa kunokesha mvula wabaya mamita 0.6 mu mizhi ya mitumba iji mu central Taiwan.”

•   Pa 24 July2023, ba BBC News baambile’mba: “Mvula mukatampe ukyangye kunokapo kala pa myaka 50 yapitapo wanokele mu kijiiji kya Atlantic Canada, waletele muyulo pa Kibelushi ne pa Mulungu mu muzhi wa [Nova Scotia].”

 Baibolo waambapo’mba ka pa ino miyulo?

 Baibolo waamba’mba tubena kwikala mu bimye bitelwa’mba “moba a kupelako.” (2 Timoti 3:1) Yesu waawile’mba mu ano moba mukekala “bintu bilenga moyo” nangwa’mba bintu bizakamisha. (Luka 21:11) Kwalauka kwa mwela kubena kuleta binkunkwila bikatampe byavula bya kubula kuketekela.

 Baibolo witubuula’mba binkunkwila byavula bibena kumweka byafwainwa kwitulengela kwikala na luketekelo lwa kuba’mba bintu bikawama. Mambo ka? Yesu waambile’mba: “Umvwe mwamona bino bintu na kumweka, yukai’mba Bufumu bwa Lesa buji pepi.”—Luka 21:31; Mateo 24:3.

 Bya malwa bibena kumweka ke kiyukilo kya kuba’mba Bufumu bwa Lesa katatakatu bukapwishe ne kukanya binkunkwila byonse kuvwangakotu ne luvula.—Yoba 36:27, 28; Salamo 107:29.

 Pa kuba’mba muyuke Bufumu bwa Lesa byo bukawamisha ino ntanda, tangai kibaaba kya mu Kizungu kya kuba’mba “Who Will Save the Earth?”