Bantu bavula kechi bamwesha mushingi ne. Balwazhi baji na manjindango bakajipila badokotala; bantu baja kajo mu bishimikwa mwakujiila balengulula bamingilo bapana kajo; bantu bakanjila madeke bapuma bamingilo ba mu ndeke; baana bakosama bendeleka, kuchinya ne kulukuka bafunjishi; kabiji bamulwila ntanda bamo balukuka bamulwila ntanda bakwabo, pakuba bamulwila ntanda bamo bebepekezha kwikala na mushingi.

 Baibolo walumbulula bulongo byo twafwainwa kwikala na mushingi. Kabiji walumbulula ne ene mambo bantu bavula o babujila mushingi lelo jino.

 Kubula kwikala na mushingi nangwa amba byubilo byawama kabiji byanemeka bantu, kubena kumweka mwaya ntanda yonse.

•   Mu bunsaji bwa kuyuka byubilo bya bantu bwajingako katataka mu America, bantu baambile’mba bantu bavula mu kyalo kya United States kechi baji na byubilo byawama ne, kukila byo kyajinga myaka 22 yapitapo.

•   Mu sawakya mukwabo mo baipwizhe bantu kukila pa 32, 000 bekala mu byalo 28, bantu mapesenti 65 baambile’mba bantu bavula lelo jino kechi na baji mushingi byonka byo kyajinga kala ne.

 Baibolo waambijile jimo byubilo byo tubena kumona mu bantu lelo jino.

•   “Bino uyuke kino amba mu moba a kupelako kukeya bimye byakatazha. Mambo bantu bakekala betemwatu abo bene, batemwa mali, bejantula, belundumika, ba mwenga, babula kukookela bansemi, babula kusanta,  . . . bashinta, [kabiji] babula kutemwa kyawama.”—2 Timoti 3:1-3, Baibolo wa Binembelo bya Ntanda Ipya.

 Pa kuba’mba muyuke buno bungauzhi byo bubena kufika lelo jino, tangai kibaaba kya mu Kizungu kya kuba’mba “Did the Bible Predict the Way People Think and Act Today?”

 Nangwa kya kuba bantu bavula mu ntanda kechi bamwesha mushingi ne, Baibolo ubena kukwasha bamo kwikala na mushingi. Mafunde ajimo aamba pa byubilo byawama, ‘kimye kyonse aketekelwa, pa kino kimye ne myaka ne myaka.’ (Salamo 111:8) Akilangulukai pa amo:

•   Byaamba Baibolo: “Bintu byonse byo mukeba’mba bantu bemubile, ne anweba mwafwainwa kwibobilabyo.”—Mateo 7:12.

   Mwatala bino byambo: Twafwainwa kubilanga bakwetu lusa ne kwibanemeka umvwe tukeba bakwetu kwitubila lusa ne kwitunemeka.

•   Byaamba Baibolo: “Pano byo mwaleka kwamba bubela, iambilainga bya kine anwe bene na bene.”—Efisesa 4:25.

   Mwatala bino byambo: Twafwainwa kwikala ba kishinka mu bintu byonse byo twamba ne kuba.

 Pa kuba’mba muyukilepo byavula pa uno mutwe, mwane tangai:

•   Kyamba kya Usopa kiji na mutwe kuba’mba “Mwakonsha Kuyuka Byepi Kyawama ne Kyatama?”

•   Kibaaba kya mu Kizungu kiji na mutwe wa kuba’mba “Tolerance—How the Bible Can Help.”