Kusambakana kwa byalo ko besamba pa Kwalauka kwa Mwela kutelwa’mba COP27 kwapwile Pa Mulungu pa 20 November 2022. Bantangi ne bashayuka batainwe ku kuno kusambakana baswile kupana mali ku byalo byayanda akwingijisha pa kupwisha makatazho eya na mambo a kwalauka kwa mwela. Nangwa byonkabyo, bantu bavula baambile’mba kupana mali kechi kwakonsha kupwisha makatazho ne.

•   Pa 19 November 2022 secretary-general wa United Nations aye António Guterres waambile’mba: “Natemwa bingi kuba’mba twafuukulapo kulamanga mali a kukwasha byalo byaponenwa na makatazho eya na mambo a kwalauka kwa mwela. Bino twayuka’mba kino kechi kikapwisha makatazho ne . . . Ntanda yonse iji mu kizumba.”

•   Pa 20 November 2022 Mary Robinson wajinga Ndamakyalo wa mu Ireland kabiji Ntomesha wa UN Utala pa Luusa lwa Bantu waambile’mba: “Ntanda yonse iji mu kizumba.”

 Bakyanyike baakamwa pa bikekala ntanda kulutwe. Nanchi byalo byakonsha kwingijila pamo pa kupwisha makatazho eya na mambo a kwalauka kwa mwela ne kufikizha byo balaya nyi? Baibolo waambapo’mba ka?

 Baibolo waamba’mba nangwa makafulumende akonsha kupwishako makatazho amo eya na mambo a kwalauka kwa mwela, bino kechi akonsha kupwisha makatazho onse ne. Monai ene mambo o kyaikela bino:

•   “Kintu kyakonkomana kechi bakonsha kwikyolola ne.”—Musapwishi 1:15.

   Mwatala bino byambo: Makafulumende kechi akonsha kuba bintu byo akeba kuba ne, mambo bantu kechi baji na bulume bwa kwitangijila abo bene ne. (Yelemiya 10:23) Nangwatu byalo byaesekesha na ngovu kwingijila pamo, kechi byakonsha kupwisha makatazho onse ne.

•   “Mambo bantu bakekala betemwatu abo bene, batemwa mali, . . . babula kukeba kumvwañana.”—2 Timoti 3:2, 3.

   Mwatala bino byambo: Baibolo waambijile jimo kuba’mba bantu bavula mu ano moba bakekala betemwatu abo bene ne kubula kukeba kwingijila pamo pa kuba’mba bakwashe bantu bonse.

 Nangwa byonkabyo bintu bikamwekela ino ntanda kulutwe kechi byaimena pa makafulumende a bantu ne. Lesa wasala kalama wa ntanda wafwainwa aye Yesu Kilishitu. Baibolo waamba pa uno kalama kuba’mba:

•   “Bakamupa kafulumende. Bakamutela’mba Upana Maana, Lesa wa Bulume, Shetu wa Myaka, Mfumu wa Mutende.”—Isaya 9:6, tubyambo twa munshi.

 Yesu ye Mfumu wa Bufumu bwa Lesa, nangwa’mba kafulumende wa mwiulu. (Mateo 6:10) Aye uji na bulume, maana kabiji wata muchima ntanda yetu ne bekalapo. (Salamo 72:12, 16) Mu bukalama bwanji, kafulumende wa mwiulu ukafumyapo bantu “babena konauna ntanda” ne kuwamisha ntanda.—Lumwekesho 11:18; Isaya 35:1, 7.

 Pa kuba’mba muyuke bikapwa makatazho onse eya na mambo a kwalauka kwa mwela, tangai kibaaba kya mu Kizungu kya kuba’mba: “Climate Change and Our Future—What the Bible Says.”