Mu kimye kya kisalo mu 2024 kimye kya makayo a kwikyombesha kwa byalo bantu nobe mabilyonyi 5 bo baketekelwa kutamba bantu bakekyombeshanga bakafuma mu byalo 206. Mukulumpe wa kavoto katala pa makayo a kwikyombesha kwa byalo ka International Olympic Committee aye Thomas Bach waambile’mba: “Bintu byo tubena kuba bibena kukwatakanya bantu mwaya ntanda ne kuleta mutende. Twayai tutundaike ano makayo mambo abena kutundaika mutende ne lukwatankano mwaya ntanda, nangwa kya kuba twafuma mu byalo byapusana pusana.”

 Nanchi makayo a kwikyombesha kwa byalo akonsha kukwatankanya bantu ne kuleta mutende nyi? Nanchi bantu bakakwatankanapo ne kwikala mu mutende nyi?

 Makayo a uno mwaka kechi aimenatu pa kwikyombesha ne. Mu ano makayo bantu babena kwamba bingi pa makatazho abena kupitamo bantu ne pa bya bumulwila ntanda bibena kuleta mabano. Babena kwamba pa bintu na biji luusa lwa bantu, misalululo ya bikoba, misalululo ya bupopweshi ne kubula kunemeka banabakazhi.

 Makayo a kwikyombesha kwa byalo aleta kisangajimbwe. Nangwa byonkabyo, ano makayo atundaika mabano ne kulengela bantu kulanguluka’mba bakila bakwabo. Abino kechi bileta mutende ne lukwatankano ne.

 Baibolo waambijile jimo kuba’mba bantu bakekala na byubilo bibula kutundaika lukwatankano. (2 Timoti 3:1-5) Pa kuba’mba muyukilepo byavula pa buno bungauzhi bwa mu Baibolo, tangai kibaaba kya mu Kizungu kya kuba’mba “Did the Bible Predict the Way People Think and Act Today?”

 Mu Baibolo muji byambo byaamba pa mutende ne lukwatankano lwa kine lwa ntanda yonse. Waamba’mba bantu bonse pa ntanda bakebakwatankanya ku kafulumende wa mwiulu utelwa’mba “Bufumu bwa Lesa.”—Luka 4:43; Mateo 6:10.

 Mfumu wa buno Bufumu aye Yesu Kilishitu ukaleta mutende pano pa ntanda ponse. Baibolo waamba’mba:

•   “Baoloka bakekalanga bulongo, ne mutende ukavula.”—Salamo 72:7.

•   “Aye ukapokolola muyanji ukeba bukwasho . . . Ukebapokolola ku lumanamo ne ku bukapondo.”—Salamo 72:12, 14.

 Lelo jino, bintu byafunjishanga Yesu bibena kukwatankanya bantu bavula baji mu byalo 239. Bena Kilishitu abo Bakamonyi ba kwa Yehoba, bafunda kwikala mu mutende na bantu bakwabo. Pa kuba’mba muyuke byo bafunda bya kwikala mu mutende, tangai magazini wa Kyamba kya Usopa uji na mutwe wa kuba’mba “Bya Kupwisha Lupato.”