Pa myaka 30 yapitapo, bantu bavula bamwene’mba bulunda pakachi ka byalo byapusana pusana bwabayijilengako. Pano bino, bintu bibena kubiwa luno byamwesha’mba bulunda bwakepa.

•   Pa 6 January 2024, kipamo kya Reuters kyaambile’mba: “Bantu baakamwa na nkondo iji mu Gaza mambo byalo biji ku bwipi byakonsha kwikala mu kizumba inge bena Isalela ne Hezbollah batendeka kulwila ku mupaka wa Lebanon.”

•   Pa 7 January 2024, pepala wa byambo wa New York Times waambile’mba: “Mazhita a bashilikale bo batangijila ku kyalo kya Iran abena kulwila mu mapunzha apusana pusana. Kabiji kyalo kya Iran kyatendeka jikwabo kulenga bilwilo byashinta bingi. Kunungapo, kyalo kya Russia ne China byakwatankana na Iran. Kino kyalengela byalo bikwabo kwakamwa.”

•   Pa 11 January 2024, ba UN News baambile’mba: “Kyalo kya Russian kyatwajijila na kutuula bulemo kyalo kya Ukraine.”

•   Pa 9 January 2024, pepala wa byambo wa Japan Times waambile’mba: “Bukomo mu kyalo kya China ne kulenga bilwilo bya nkondo byayilako palutwe. Kabiji kyalo kya Taiwan kibena kukeba kwiimena kine, inge kino kyaubiwa kikaleta malwañano pakachi ka kyalo kya China ne United States.”

 Nanchi Baibolo waambapo pa kutaminako kwa bintu mu ntanda lelo jino nyi? Abya kino kikalengela nkondo ya ntanda yonse kutendeka nyi?

 Baibolo kechi watongwejile jimo mu kushinkamika nkondo ijiko lelo jino ne. Nangwa byonkabyo, waambijile jimo kuba’mba kukekala makondo mu byalo byavula ne “kufumyapo mutende pano pa ntanda.”—Lumwekesho 6:4.

 Buku wa Danyela waambijile jimo kuba’mba “mu moba akapelako” bufumu bukatampe bwa ntanda yonse bwikyombesha ‘bukalwa’ nangwa’mba kwilwisha pa kuba’mba bwikale na bulume pa bakwabo. Mu kuno kwilukuka mwavwangwa ne kumwesha patoka bulume buji na mazhita a bashilikale ne kwingijisha “bya buneme” nangwa bya bunonshi byavula bingi.—Danyela 11:40, 42, 43.

 Baibolo waamba’mba bintu pano pa ntanda bisakutaminangakotu. Pano bino, bintu bikawama kulutwe. Yesu waambijile jimo amba “kukekala malwa akatampe, akyangye kumwekapo kala kufumatu ku ntendekelo ya pano pa ntanda.” (Mateo 24:21) Ano “malwa akatampe” o akakolomona nkondo ya Amagedonyi. Aino nkondo beilumbulula’mba “nkondo ya aja juba jikatampe ja Lesa wa Bulume Bonse.”—Lumwekesho 16:14, 16.

 Onkao mambo, nkondo ya Amagedonyi ikapulusha bantu kechi kwibonauna ne. Lesa ukengijisha ino nkondo kufumyapo bukalama bwa bantu bwaleta makondo avula. Pa kuba’mba muyuke Amagedonyi byo ikaleta mutende, tangai bino bibaaba:

•   “Nkondo ya Amagedonyi yo i Ka?”

•   “Tubena Kutengela Amagedonyi!”