LABAINGA MUKENKENTENGA!

Bashayuka ba bya Sayansi Batangizhako Nkoloko Ibena Kumwesha Kimye Kyashalako—Baibolo Waambapo’mba Ka?

JIZHAI

Pa 24 January, 2023 Bashayuka ba bya sayansi batangizheko Nkoloko Ibena Kumwesha Kimye Kyashalako kunangijila ku 12 koloko wa bufuku a, kulumbulula’mba mpelo ya ntanda yafwenya pepi.

Kipamo kya AFP International Text Wire kyaambile’mba: “‘Nkoloko Ibena Kumwesha Kimye Kyashalako’ ibena kulumbulula bantu byo bakonsha kwiipaya abo bene. Pa Kibiji, Bashayuka ba bya sayansi batangizheko ino nkoloko na mambo a nkondo iji mu Ukraine, nkondo ya mabomba a nyukiliya yakonsha kutendeka ne ntanda byo iji mu kizumba na mambo a kwalauka kwa mwela.”
Ba ABC News baambile’mba: “Pa Kibiji, Bashayuka ba bya sayansi batangizheko ‘Nkoloko Ibena Kumwesha Kimye Kyashalako’ na masekondi 90, kumwesha’mba kwashalatu kimye kicheche bantu kwizhiya abo bene.”
Pepala wa byambo wa The Guardian waambile’mba: “Jibumba ja Bashayuka ba bya sayansi bafumine mu byalo byapusana pusana baambile’mba bintu byavula bibena kumwesha’mba bantu bakonsha kwiipaya abo bene kukila byo kyajinga kala.”

Nanchi mpelo ya bantu ne ntanda yetu ijitu pepi nyi? Nanchi twafwainwa kumvwa moyo pa bintu bikamweka kulutwe? Baibolo waambapo’mba ka?

Bintu bikamweka kulutwe

Baibolo waamba’mba “ntanda yaikala myaka ne myaka” ne kuba’mba bantu ‘bakekalangapo myaka ne myaka.’ (Musapwishi 1:4; Salamo 37:29) Onkao mambo, bantu kechi bakonauna ntanda nangwa kwiitamisha kya kuba bantu bakankalwa kwikalapo ne.

Nangwa byonkabyo, Baibolo waambapo pa mpelo. Waamba’mba: “Pano pa ntanda pabena kupita.”—1 Yoano 2:17.

Pa kuba’mba muyuke Baibolo byo alumbulula inge waamba pa mpelo ya ntanda, tangai kibaaba kya mu Kizungu kya kuba’mba: “Is the World Coming to an End? What Is the Apocalypse?”
Pa kuba’mba muyuke byaamba Baibolo pa bintu bikamweka ku mpelo ya ntanda, tangai kibaaba kya kuba’mba: “Mpelo ya Ntanda Ikeya Ñanyi Kimye?”

Ketekelai kuba’mba bintu bikawama

Baibolo wafwainwa kwitukwasha kwikala na luketekelo lwa kuba’mba bintu bikawama nangwa kya kuba mu ntanda mwavula makatazho. Wafwainwa kwitukwasha byepi?

Mu Baibolo muji maana etukwasha mu bwikalo bwetu. (2 Timoti 3:16, 17) Tangai kibaaba kya mu Kizungu kya kuba’mba “How to Control Worry” pa kuba’mba muyuke Baibolo byo afwainwa kwimukwasha kwikala na luketekelo lwa kuba’mba bintu bikawama nangwa kya kuba tubena kupita mu makatazho.
Baibolo waamba pa luketekelo lwa kuba’mba bintu bikawama kulutwe. (Loma 15:4) Waamba pa bintu byo twafwainwa kupitamo luno ne bikamweka kulutwe, bitukwasha kutwajijila kuchinchika nangwa kya kuba tubena kupita mu makatazho.

Pa kuba’mba mufunjilepo byavula byaamba Baibolo, tubena kwimutundaika kufunda Baibolo kyatutu kwingijisha mutanchi wetu.

a Pepala wa byambo wa Bulletin of the Atomic Scientists waambile’mba: “Nkoloko Ibena Kumwesha Kimye Kyashalako ilumbulula’mba kimye kyashalako bantu konauna ntanda kwingijisha bintu byashinta byo balenga abo bene. Ino nkoloko ke ñambilo ya kifwanyikizhotu imwesha byo twafwainwa kupwisha makatazho pa kuba’mba tutwajijile kwikala pa ntanda.”