Mu July 2022 basampenye masawakya aambilenga pa kuzonga kwa mute mwaya ntanda yonse:

•   Pa July 25, 2022, televizhonyi wa CNN wabijikile sawakya wa kuba’mba, “Bantangi mu kyalo kya China babuula bantu ja bubiji’mba mu mizhi 70 mute usakuzonga.”

•   Pa July 17, 2022, pepala wa byambo wa The Guardian waambile’mba, “Na mambo a kuzonga kwa mute, biswa byavula mu byalo byavula bya mu Europe bibena kupya.”

•   Pa July 24, 2022, pepala wa byambo wa The New York Times waambile’mba, “Pa Mulungu mute wazongele mu mizhi yavula ya mu United States yaikela kumusela, ku kabeta ka ku bulenge ne pakachi ka kumuzhika byo akyangye kuzongapo kala.”

 Akino kibena kulumbulula ka? Nanchi kulutwe kikakatazha kwikala pano pa ntanda nyi? Baibolo waambapo’mba ka?

 Ee. Kuzonga kwa mute kwakwatankana na byaambile Baibolo bikamwekanga mu kimye kyo tuji mo. Yesu waawile’mba tukamonanga “bintu bilenga moyo.” (Luka 21:11) Na mambo a kuzonga kwa mute bavula baakamwa’mba bantu basakonauna ntanda.

 Ine. Lesa walengele ntanda kuba’mba bantu bakekalengapo myaka ne myaka. (Salamo 115:16; Musapwishi 1:4) Lesa kechi ukaswisha bantu konauna ntanda ne, pakuba walaya “konauna boba babena konauna ntanda.”—Lumwekesho 11:18.

 Monai bungauzhi bubiji bwaamba pa bintu bikwabo byalaya Lesa:

•   “Bisanzangala ne ntanda yauma bikasangalala, ne kiselebwa kikasekela ne kwikala na maluba avula.” (Isaya 35:1) Lesa kechi ukaleka ntanda yonse kwikala kiselebwa ne, bino ukawamisha ponse paonaika.

•   “Mulama bulongo ntanda, ne kwiilengela kumenesha bintu byavula byawama.” (Salamo 65:9) Lesa ukalula ino ntanda kwikala paladisa.

 Pa kuba’mba mufunjilepo bikwabo pa kwalauka kwa mwela byo kubena kufikizha bungauzhi bwa mu Baibolo, tangai kibaaba kya mu Kizungu kya kuba’mba “Climate Change and Our Future—What the Bible Says.”

 Pa kuba’mba mufunjilepo bikwabo pa milaye ya mu Baibolo yaamba pa ntanda byo bakeiwamisha, monai kibaaba kya mu Kizungu kya kuba’mba “Who Will Save the Earth?”