LABAINGA MUKENKENTENGA!
Bamulwila Ntanda Baamba’mba Amagedonyi Katatakatu Ifike—Baibolo Waambapo’mba Ka?
Lukelo pa Kimo pa 10 October 2022, kyalo kya Russia kyaponeshele mabomba avula mu kyalo kya Ukraine na mambo a bomba watubikile ne konauna kyabu kikatampe kya kwantankenye kyalo kya Russia ne Crimea pa Kibelushi pa 8 October 2022. Bino bintu byamwekele aku bamulwila ntanda bambatu amba Amagedonyi katatakatu ifike.
Pa 6 October 2022, ndamakyalo wa mu U.S. aye Joe Biden waambile’mba: “Tukyangye kufwenyapo kwipi na Amagedonyi kufumatu kimye kyo kwajinga lukatazho lwa mabomba lwajinga mu kyalo kya Cuba kimye kyajingako Kennedy [John F wajinga ndamakyalo mu kyalo kya U.S.]. . . . Nalanguluka’mba kechi kyakonsheka kwingijisha mabomba a nyukiliya kwa kubula Amagedonyi kutendeka ne.”
Pa 8 October 2022, ba BBC News byo baipwizhe ndamakyalo wa ku Ukraine aye Volodymyr Zelensky pa byatama byakonsha kufumamo mu kwingijisha mabomba a nyukiliya, wakumbwile’mba: “Naswa kuba’mba kuba bino kwakonsha kulengela Amagedonyi kutendeka ne kubika ntanda yonse mu kizumba.”
Nanchi kwingijisha mabomba a nyukiliya kwakonsha kulengela Amagedonyi kutendeka nyi? Baibolo waambapo’mba ka?
Nanchi kwingijisha mabomba a nyukiliya ko kukalengela Amagedonyi kutendeka nyi?
Ine. Kyambo kya kuba’mba “Amagedonyi” kitanwatu jimo mu Baibolo pa Lumwekesho 16:16. Kechi kilumbulula nkondo yubiwa mu bisaka bya bantu ne, pakuba ke nkondo ya Lesa yo akalwa na “bamfumu ba pano pa ntanda ponse.” (Lumwekesho 16:14) Lesa ukengijisha nkondo ya Amagedonyi kupwishishamo bukalama bwa bantu.—Danyela 2:44.
Pa kuba’mba mufunjilepo byavula pa nkondo ya Amagedonyi, tangai kibaaba kya kuba’mba Nkondo ya Amagedonyi yo i Ka?
Nanchi nkondo ya mabomba a nyukiliya ikonauna ntanda ne bantu nyi?
Ine. Nangwa kya kuba bakalama ba ino ntanda bakengijishe mabomba a nyukiliya kulutwe, Lesa kechi ukaswisha’mba bonaune ntanda ne. Baibolo waamba’mba:
“Ntanda yaikala myaka ne myaka.”—Musapwishi 1:4.
“Baoloka bakaswana ntanda, kabiji bakekalangamo myaka ne myaka.”—Salamo 37:29.
Nangwa byonkabyo, bungauzhi bwa mu Baibolo ne bintutu bikwabo bibena kumweka bimwesha’mba katatakatu bintu bipimpule pano pa ntanda. (Mateo 24:3-7; 2 Timoti 3:1-5) Yukai byaamba Baibolo pa bintu bikamweka kulutwe kupichila mu kufunda Baibolo kyatutu.