Mu 2023, batala pa bumi bwa bantu bataaine’mba mukose ke lukatazho lukatampe lo bafwainwa kwingijilapo bukiji. Nanchi mukose wakonsha kupwa nyi?

•   Bakulumpe ba badokotala batala pa kutumbula bantu mu U.S. abo ba Vivek Murthy, baambile’mba: “Inge ketulanguluke’mba tujitu bunke kabiji twaleka kupwanañana na bantu, bumi bwetu bwakonsha kwikala mu kizumba kabiji kechi twakonsha kwikala na lusekelo ne. Kabiji banungilepo’mba: “Kuji byo twakonsha kuba pa kino.” Ñanyi bintu byonkabyo? “Pa juba pa juba twafwainwa kubilangapo bakwetu tubintu tucheche tukosesha bulunda.” a

 Mukose kechi wiyatu inge tuji bunke ne. Bamo bomvwa mukose nangwatu inge po baji paji bantu bavula. Baibolo wakonsha kwitukwasha kushinda mukose. Mambo muji mafunde awama afwainwa kwitukwasha kuyuka bya kukosesha bulunda na bakwetu ne kuleka kukizhamo kumvwa mukose.

 Yukai bya Kwisamba na Balunda Nenu. Kino kibena kulumbulula’mba kechi twafwainwa kukebangatu’mba bakwetu batelekenga ku byo tubena kwamba ne, bino twafwainwa kutelekanga ne bibena kwamba bakwetu. Inge ketumweshe’mba twata muchima bakwetu, bulunda bwetu bukakosa bingi.

•   Jifunde ja mu Baibolo: “Saka muta muchima ku bintu bya bakwenu kabiji kange mulangulukengatu pa bintu byenu byonka ne.”—Filipai 2:4.

 Ikalai na Balunda Bapusana Pusana. Lengai bulunda na bantu ba mafumbi apusana pusana, nangwa baji na nkomeno ne mitundu yapusana pusana.

•   Jifunde ja mu Baibolo: “Shinkwishai michima yenu.”—2 Kolinda 6:13.

 Inge mukeba kuyukilapo byavula pa bya kwikala na bulunda bwawama na bakwetu, tangai kibaaba kya mu Kizungu kya kuba’mba:“Satisfying Our Hunger for Friendship.”