Bakamonyi ba kwa Yehoba balomba byalo bikwabo kwibambilako ba Irina Zakharchenko ne ba Valida Jabrayilova bo bakasaka kya lunkanankana. Kochi wa Sabail District Court wakashile bano banabakazhi babiji bañondo basatu pa 17 February mu 2015 byo babena kupembelela kwibatotolwesha na mambo a kusampanya mabuku a bupopweshi kwa kubula kutambula luusa. Kabiji kochi katataka papo wanungileko bañondo babiji bakwibalamina mu kaleya byo babena kupembelela kwibatotolwesha.

Pa 5 December mu 2014, ba Zakharchenko ne ba Jabrayilova besambilenga na bobekala nabo kinkalankulo mu muzhi wa Baku pa bya mu Baibolo byo baitabilamo kimye kibakwachile bakapokola. Bakapokola baishile kulekako bano banabakazhi panyuma ya kupitapo maola avula, kabiji batwajijile kwibeta na kwibatebawisha pa kimye pa kimye. Pa 17 February mu 2015, bengila mu kipamo kya bukikizhi bwa kyalo kya Ministry of National Security (MNS) bebatotolweshe mu bufyamfya ne kwibapamo mambo a bumbanzhi. Mutonyi wibapelemo mambo amba “bakonsha kuleta bufinda mu kimasamasa,” amba o ene mambo o bafwainwa kwibalamina mu kaleya saka bakyangye kwibatotolwesha. Kipamo kya MNS kyakashile bano banabakazhi babiji baji pa kipikichala peulu mu kaleya kabo kakatampe.

Kufumatu kyo kya kimye, bengila mu kipamo kya MNS bapikichile mu mazubo abo ne kwangata mabuku a bya bupopweshi, mabuku mo banemba bintu byabo bene, kompyuta ne mafoni. Kochi wakaine kwamba ano mambo bano banabakazhi byo balombele kuba’mba beambe jikwabo kabiji wakaine ne kwibakashila pa mazubo babo.

Bashabyambo, ba mu kisemi, ne balunda nabo baakamwa mambo butuntulu bwa mubiji bwa bano banabakazhi buji mu kizumba, mambo bamona’mba babena kuyatu na kupwa mubiji pachepache. Ba Zakharchenko baji na myaka 55. Dokotala waambile’mba balemana na kikola kya kuvimba mu manungi ne kwibakozha ko bebakozhezhe ku kulu kwa kilujo.

Kabiji baakamwa amba kechi basakwikala bulongo ne, na mambo a binyenge. Kipamo kya MNS kyaswishatu bashabyambo babo kwiya na kwibapembula. Balongo babo bakonsha kulayisha bintu nabiji muchi, mulola, ne bivwalo jimo pa ñondo. Pa kuba’mba bebatekeneshe, balongo babo balombele kuba’mba bebape Baibolo, pano bino ba mu kipamo kya MNS bakaine.

Byo bakebelenga bishinka bya mambo a ba Zakharchenko ne ba Jabrayilova, kipamo kya MNS kyatebawishe ne Bakamonyi bakwabo kukila pa 20 ne kupikita mazubo abo. Kabiji bamingilo bengila mu kipamo kya MNS, ne ba mu kipamo kya State Committee for Work with Religious Associations, ne bakapokola bapikichile mu Mazubo a Bufumu mwayanga bano banabakazhi na kupwila.

Bakamonyi ba kwa Yehoba baloba ku ofweshi wa utala pa luusa lwa bantu wa Office of the High Commissioner for Human Rights, mambo kafulumende wa kyalo kya Azerbaijan kechi ubena kwibakwasha ne. Kabiji besamba ne na bipamo bya mu byalo bingi kuba’mba bitalepo pa kyalo kya Azerbaijan byo kibena kuyanjisha kya lunkanankana ba Zakharchenko ne ba Jabrayilova. Kyalo kya Azerbaijan kyalayañene na byalo bikwabo kuba’mba kisakunemekanga luusa lwa bantu ne kuba’mba kisakuleka bantu bakasuluke mu bya bupopweshi.

Bakamonyi ba kwa Yehoba balomba kyalo kya Azerbaijan kunemeka luusa lwa bantu ne kuswisha Bakamonyi kukasuluka mu bya bupopweshi. Balomba kafulumende wa kyalo kya Azerbaijan kuba’mba akasulule bano banabakazhi bobakasa kwa kubula mambo.