Pa 7 October mu 2014, kochi wa European Court of Human Rights (ECHR) wabingishe Bakamonyi ba kwa Yehoba mu kyalo kya Republic of Georgia. Mu mambo ba Begheluri ne Bakwabo bo balobejile kyalo kya Georgia, beatwajile kala ku kochi papita ne myaka 12, kabiji mwavwangilwe bantu 99 bo bapumine ne kwibasebanya mu mapunzha 30 apusana pusana. Umo pa bano wajinga Kamonyi wa kwa Yehoba. Ino milukuchi yatendekele kimye bakapokola kyo batendekele kulukuka ba mu bupopweshi bwapusana pusana, ko kyakayanga ne milukuchi ya kulukuka Bakamonyi ba kwa Yehoba mu mazubo abo mu bije ne mu mikwakwa ya uba ne woo.

Kochi wa ECHR wamwene kuba’mba bantu batumine makalata a kwijizhañanya 160, ku ba mu kafulumende kabiji kyatainwe kuba’mba bakapokola ne ba mu kafulumende bamo nabo bajinga pa bano balukukilenga bano bantu. Bano bantu bobalobejile kafwako kyobebobile. Kabiji na mambo akuba bano bamanyikilenga bantu kechi bebakabishe ne, kino kibalengejile kutwajijila kulukuka bantu.

Kulukuka kumo ke kokwa kwaubiwe pa 8 September mu 2000, kimye Bakamonyi nobe 700 kyo bebalukukile byo babuñenenga mu muzhi wa Zugdidi. Kwa kubula nangwa kuketekela, jibumba ja bakapokola jitelwa’mba SWAT jalukukile po bapwijilenga saka bavwala ne byakwizhikijila, basoka bishimikwa byo bashimikile bya kupwijilamo ne kupuma bapopweshi kukila pa 50. Bakamonyi ponkapotu bayile na kuloba. Nangwa byonkabyo ba mu kafulumende bakaine kukambula bano bantu, kabiji bantu bobalukukile mizhilo kechi ibazhikijile ne.

Na mambo a kuba’mba ba luusa batajilengapotu kwa kubula kukeba bishinka nangwa kukambula balengele mambo, mu 2002 aba bobalukukile bafuukwilepo kutwala mambo abo ku kochi wa ECHR.

Pa 7 October, kochi wa ECHR waambile’mba: “Kafulumende wa kyalo kya Georgia ye walengejile kuba’mba Bakamonyi ba kwa Yehoba mu kyalo kyonse bebalukukenga mambo kechi wakabishanga balenganga ano mambo ne.” Ino Kochi yaambile ne kuba’mba: “Bakamonyi ba kwa Yehoba bebalukukilenga mambo bebashikwa” kabiji ne ba luusa nabo bamwesheshe bino byubilo, “kyamwesheshetu patoka kuba’mba nabo bebashikwa . . . , ne kuba’mba basekelamo kwibamanyika bano bantu.”

Onkao mambo, kochi wa ECHR wazhachishe kafulumende wa kyalo kya Georgia mambo bayanjishe bantu 47 ne kunyanchijila luusa lwa bantu 88 lwa kukasuluka mu bya bupopweshi. Kochi wa ECHR wakambizhe kafulumende “kuleka kunyanchijila luusa lwa bantu byonka byaambile Kochi ne kuwamisha byonse byo batamisha” pa byo baubile pa “kuminatu pa milanguluko yabo.” Kochi wa ECHR waambijile kafulumende kufuta bakamonyi mali a ku Europe 45,000 bo bamanyikilenga ne bo baonawijile bintu ne mali o bapainenga ku bya mambo.

Nangwa kya kuba bakepesheko kwibamanyika mu 2004, pano bino Bakamonyi mu Georgia batwajijila na kwibamanyika ne kwibalukuka. Mu 2013, kwajinga masawakya 53 aambilenga pa kumanyikwa kwa Bakamonyi. Kochi pa kuchiba mambo aba Begheluri waambijile kafulumende wa kyalo kya Georgia kupelawizha kukebakeba bishinka bibena kulengela kumanyika bantu babo. Bakamonyi ba kwa Yehoba baketekela kuba’mba kafulumende ukakabisha ne kukambula bantu baji na muteeto wa kumanyika bantu kya nshiji.