Pa 1 April mu 2015, Bakamonyi ba kwa Yehoba batendekele mukwekele wa kwisamba na bakulumpe ba bakapokola, bakulumpe ba mu kafulumende mu mataunyi, ne ba mu makochi mu kyalo kya Republic of Georgia. Uno mukwekele wajinga wa kubuula bonse kuba’mba bayuke byachibile mambo kochi wa European Court of Human Rights (ECHR), mambo a kumanyika Bakamonyi ba kwa Yehoba alobele ba Begheluri ne Bakwabo kulobela kyalo kya Georgia. Mu uno mukwekele babujile batala pa mizhilo bishinka bya ano mambo, byo beachibile ne biji mwingilo wa Bakamonyi ba kwa Yehoba.

Kutendeka mu 1999 kufika mu 2003, pulishiti wa mu chechi wa Georgian Orthodox mwaviluka bantu bavula watendekele kulenga mabumba bantu bakulukuka Bakamonyi ba kwa Yehoba. Nangwa kya kuba Bakamonyi balobele bimye 784 ku bakapokola na mambo a kwibalukuka ne mambotu akwabo, batala pa mizhilo kechi bateleko ne muchima ne. Kabiji kimye kimo ne abo bene ba luusa mu kafulumende balukukanga Bakamonyi. Kafwakotu nangwa mambo amo alobele Bakamonyi o baubilepo kimo ne. Na mambo a kuba’mba ba luusa mu kyalo ya Georgia batalangapotu, kyalengejile aba balukukanga Bakamonyi kukizhamo ne kupwa moyo, batendekele ne kupuma Bakamonyi mu makochi, pa kupwila kukatampe ne mu mikwakwa.

Bakamonyi ba kwa Yehoba mu kyalo ya Georgia balobele jibiji ku kije kya ECHR ano mambo akwibalukuka. Uno kochi wachibile ano mambo jitanshi mu May mu 2007, * kabiji mu October mu 2014 beambile jibiji, popo bachibile mambo alobele ba Begheluri ne Bakwabo kulobela kyalo kya Georgia. Mu ano onse mambo abiji, kochi wa ECHR wapelemo mambo kyalo kya Georgia a kutundaika bantu kulukuka Bakamonyi mu kyalo kya Georgia. Kochi wa ECHR waambile pa mambo alobele ba Begheluri amba, “ba luusa mu kafulumende wa kyalo ya Georgia bo balengejile kuba’mba bakizhemo kwibalukuka Bakamonyi ba kwa Yehoba mu kino kyalo kyonse.” *

Kyawaminekotu ke kya kuba’mba juba jalondejilepo kufuma po babijikijile byo bachibile mambo alobele ba Begheluri, kyalo kya Georgia kyabijikile kuba’mba:

“Kyalo kya Georgia kyafuukulapo kuzhikijila luusa lwa bantu lwa kwifuukwila bintu, lwa kukasuluka mu bya bupopweshi, ne luusa lwa bantu lukwabotu. Kyalo kya Georgia kisakumona kuba’mba mambo a bantu bonse achibiwa monka mo aolokela kabiji bonse banyanchijila luusa luji na bakwabo basakwibakambulanga. Kabiji kyapwa kechi bakatalangapotu inge bya uno mutundu ke byubiwe mu kyalo ne.”

Bakamonyi ba kwa Yehoba luno mu kyalo kya Georgia bintu bibawamina kukila mu myaka ya kunyuma kwe. Luno Bakamonyi bakasuluka kupwila pamo kabiji batemwa bingi mambo ba luusa ba mu kafulumende babena kuzhikijila luusa lwabo. Bakamonyi ba kwa Yehoba pano babena kushimika ne bishimikwa bya kupwijilamo kabiji babaisha ne ofweshi wabo wa mu kino kyalo.

Nangwa byonkabyo, bakulumpe ba mu kafulumende bamo kechi bebayuka bulongo Bakamonyi ba kwa Yehoba ne byo baitabilamo ne. Kabiji kechi bayuka byo bachibile mambo alobele ba Begheluri nangwa byaambile ba luusa mu kafulumende ne. Ne lunotu bantu ba mu bupopweshi bukwabo batwajijila kulukuka Bakamonyi kabiji kechi babena kwibakwata pa byo babena kuba ne. Mu 2014, Bakamonyi balobele bimye kukila pa 30 mambo a kwibapuma ne kwibakozha. Bakamonyi ba kwa Yehoba baloba ne jikwabo ku kochi kya ECHR kuba’mba bakatalepo pa ano mambo. *

Mukwekele wa mu April wa kwisamba na batala pa mizhilo usakulengela batepo muchima kuzhikijila luusa lwa bantu mu kyalo kyonse kya Georgia. Bakamonyi ba kwa Yehoba batemwa bingi mambo kyalo kya Georgia kyafuukulapo kubula kulekatu boba bino, kabiji Bakamonyi baketekela kuba’mba kafulumende usakutwajijila kukambula balala mizhilo na mambo a kushikwa ba mu bupopweshi bungi.