Kochi wa European Court of Human Rights (ECHR) waswa kuba’mba kafulumende wa kyalo kya Georgia wanyachijile luusa lwa Bakamonyi ba kwa Yehoba lwa kukasuluka mu bya bupopweshi ne kukasuluka kwikala mu jibumba muntu jo akeba mwine. Bakamonyi ba kwa Yehoba (Union of Jehovah’s Witnesses) ne Bakwabo balobejile kyalo kya Georgia pa kufuta jibumba jabo. Byo bakaine kuba bino, kyalengejile kukizhamo kumanyika Bakamonyi kutendeka mu 2001 kufika mu 2004.

Byo bachibile ano mambo pa 21 May mu 2015, * kochi wa ECHR waambile’mba, mu September mu 2014, kafulumende wanembele nkalata ne kwamba kuba’mba “twakeba kwimubula’mba yetu twalengejile kubula kunemeka” luusa lwa Bakamonyi ba kwa Yehoba. Kabiji banembele ne kuba’mba kyalo kya Georgia kyafuchile bipamo bya Bakamonyi ba kwa Yehoba mu 2000 kwa kubula kulondela mizhilo kabiji ne kuba’mba kubula mizhilo yaambapo ko kwalengejile kufuta jino jibumba jabo ja bupopweshi.

Kochi wa ECHR naye waswile kuba’mba uno kafulumende watamishe kabiji ano mambo pano bakonsha kwiachiba. Uno kochi wa ECHR wamwene kuba’mba.“Bakulumpe ba mu kafulumende byo bakaine makalata atumanga mabumba a bya bupopweshi ne kukana kwianembesha nangwa kwialekesha banyachijilenga luusa lwa bantu lwa kukasuluka mu bya bupopweshi ne kwikala mu jibumba muntu mwine jo asala kwesakana na byaamba Kibaba 11, muzhilo Nambala 9 (Article 11 of the Convention read in light of Article 9).” Kafulumende waswa kupana mali 6,000 euros pa bintu byaonaikile ne mali o baingijishe ku bintu bikwabotu.

Mu Georgia bipamo bibiji, kya Union of Jehovah’s Witnesses ne kya Representation of the Watch Tower Bible and Tract Society of Pennsylvania (USA), bebinembeshe mu 1998. Nangwa byonkabyo, ba mu nzubo mo balenga mizhilo bakebelenga kukanya Bakamonyi ba kwa Yehoba mu kyalo kyonse kya Georgia. Bantangi bamo ba mu chechi wa Orthodox ne bantu babo batundaikilenga uno mulanguluko ne kusampanya bya bubela byalengejilenga bantu kumanyika Bakamonyi.

Mu April mu 1999, ba mu nzubo mo balenga mizhilo, bemenako kipamo kya bumulwila ntanda, batwajile nkalata ya kwijizhanya ku kochi wa Isani Regional Court of Tbilisi ya kuba’mba bakanye Bakamonyi ba kwa Yehoba ne kufuuta bipamo byabo bibiji. Byo batendekele kwamba ano mambo mu June mu 1999, bantangi ba mu Orthodox ne bebatundaika bajinga mu mukochi. Pangye pajinga ntangi wa mu Orthodox wasatuka, aye Vasili Mkalavishvili ne bantu banji basokelenga mabuku a Bakamonyi ba kwa Yehoba.

Pa kupwisha kupitulukamo mu bishinka, kochi wa ku Isani-Samgori Circuit Court wakaine kuba byakebelenga ba mu nzubo ya mizhilo, mambo byo baambilenga byajingatu bya bubela. Bino walombele kuba’mba ano mambo bakeambe jikwabo. Pa 26 June mu 2000, ba mu kochi bapimpwile byo bachibile patanshi ne kwamba’mba bafwainwa kulekesha bipamo bya ba Bakamonyi ba kwa Yehoba. Byo baambile bino, kyalengejile bantu ba mu Orthodox kukizhamo kumanyika ne kulukuka Bakamonyi. Pa 22 February mu 2001, kochi mukatampe wa Supreme Court wa mu Georgia waambile’mba, baswa kulekesha bipamo bibiji bya Bakamonyi byonka byafuukwile kochi mutanshi mambo kafwako muzhilo wakanya kuba byobyo. Bakamonyi ba kwa Yehoba baingijishe mashinda avula bingi pano bino bapulwijilemotu mabula. Kepo batwajile ano mambo ku kochi wa ECHR pa 16 August mu 2001.

Byafuukwilepo kochi wa Supreme Court, byalengejile kukizhamo kuyanjisha ne kumanyika Bakamonyi. Bakulumpe balenga mizhilo bakankalwanga kuzhikijila Bakamonyi kabiji kimye kimo balenga mizhilo nabo bo bamanyikanga bingi Bakamonyi. Bakamonyi bavula bebakozhanga bingi. Bantu bakizhamo kushikwa bya bupopweshi bamanyikanga ne kuvulañanya kupwila, basokelenga mazubo ne kwi balukuka, baibile ne konauna bipe bya bantu ne kusoka mabuku a bya bupopweshi. Bakulumpe ba mu kafulumende bakaine kuswisha Bakamonyi kuletanga mabuku mu kyalo kabiji baangachile mabuku onse o baletele mu kino kyalo. Kabiji kechi baswishishe Bakamonyi kusonkela kishimikwa mwa kupwijila ne. Na mambo a kukizhamo kwibamanyika ne kafulumende kubula kukanya bantu kwibamanyika, Bakamonyi ba kwa Yehoba mu Georgia batwajile ano mambo ku kochi wa ECHR ne kwamba byo bebamanyikilenga ne byaubilenga ba mu kafulumende balenga mizhilo. Mu mambo abiji o batwajijile ku kochi wa ECHR, Bakamonyi bebabingishe ku uno kochi mu ano mambo onse. *

Bintu byo byaalukile mu Georgia, Bakamonyi pano banembeshe bipamo byabo jikwabo pa kuba’mba bekale na bishimikwa bya kyabo kyabo ne kwingilanga mwingilo wabo bulongo. Mu kyonka kino kimye, kafulumende wa mu Georgia momo akashile ne Mkalavishvili ne balunda nanji pamo bamanyikanga bantu. Bakamonyi balekele kwibamanyika mu 2004.

Nangwa kya kuba Bakamonyi ba kwa Yehoba kechi babena kwibayanjisha mu kyalo kya Georgia pa myaka yapitapo ne, bino mwingilo wabo batwajijila kumunyanchijila. Masawakya akatataka papo o batumine ku kipamo kya Organization for Security and Cooperation in Europe aambile kuba’mba, mu mwaka wa 2014 mwajinga mambo 63 akumanyika Bakamonyi ba kwa Yehoba mu Georgia na mambo a kwibashikwa.

Ba Michael Jones, bemenako Bakamonyi ba kwa Yehoba mu kino kyalo baambile’mba: “Twasanchila bingi kochi wa European Court of Human Rights pa kutalapo pa byo bebamanyikilenga Bakamonyi pa myaka yapitapo. Twatemwa bingi kyalo kya Georgia byo kyanemeka luusa lwa bantu. Kabiji twaketekela kuba’mba bino byo bafuukulapo ne makochi akwabo byo ebabingisha bisakulengela kuleka kwibamanyika, ne kulengela Bakamonyi ba kwa Yehoba kukasuluka mu bya bupopweshi mu kyalo kya Georgia.”