10 JANUARY, 2019
GERMANY

Kipamo Kitala pa Kulenga Bintu bya Kuvulukilako Bantu Bafwile mu Germany Kyanengezhezhe Kintu kya Kunemekelamo Bakamonyi ba kwa Yehoba bo Bamanyikile

JIZHAI

Kipamo kitala pa bya kuvulukilako bantu mu muzhi wa Ravensbrück kyanengezhezhe kumwesha bintu byo batelelenga’mba “Bakamonyi ba kwa Yehoba byo Bebakainye Kwingila Mwingilo Wabo ne Kwibamanyika mu Makampu a Lumanamo mu Ravensbrück ne mu Tuleya ku Musela wa Germany.” Bamwesheshenga Bakamonyi ba kwa Yehoba byo bebamanyikilenga mu Germany ku makafulumende asatu apusana-pusana. Ano makafulumende ajinga Weimar Republic (1918-1933), kafulumende wa Nazi (1933-1945) ne kafulumende wa German Democratic Republic (1949-1990). (Monai kakitenguluzha ka kuba’mba “ Bakamonyi ba kwa Yehoba byo Bebamanyikilenga ku Makafulumende Asatu a mu Germany.”) Batendekele kutambisha bino bintu pa Mulungu pa 22 April, 2018, pa mpunzha pajinga Kampu wa Lumanamo wa Ravensbrück mu Fürstenberg, Germany. Mu 2019 bamwesheshenga bino bintu mu mizhi ya Erfurt, Rostock ne mu Potsdam mu bakebimweshesha mu nzubo ya mizhilo mu kibunji kya Brandenburg.

Jishimikila ja bwikalo bwa kamonyi umo ye bamanyikile ku makafulumende abiji aye Adolf Graf, bejibikile pa bintu byo bamwesheshenga.

Bamwesheshenga byapichilemo balongo ne banyenga 12 bo bamanyikilenga ku makafulumende abiji a mu Germany, ko kuba’mba kafulumende wa Nazi ne kafulumende wa German Democratic Republic. Bantu baishilenga na kumona bino bintu batekelekenga ne byambo byo bakopa byalumbulula byapichilemo Bakamonyi ne makalata o banembele kimye kyo bebazhachishe kuba’mba bebepaye, ne kutanga byambo byajinga mu mapepala a byambo ne byanembelwe kala mu kimye kya kafulumende wa Nazi. Abino bintu byamwesheshe kuba’mba kupusanako na bantu bavula bo bakashile na mambo a mikoka, bya bumulwila ntanda, nangwa mambotu akwabo, balongo betu bebakashile na mambo a lwitabilo lwabo.

Mu byambo byanji bya kushinkwila, shayuka wa bintu bya kala aye Dr. Detlef Garbe walumbulwile’mba: “Kufumatu kimye kyo batendekele, Bakamonyi ba kwa Yehoba bamwesheshe lwitabilo lwakosa ne luketekelo, bakwatankene, kabiji kechi basankilangapo lwitabilo lwabo nangwa kya kuba bebashikilwe bingi ku bashilikale ba SS . . . Luketekelo lwabo lwakosa mu mulaye wa Lesa wa kwibapulusha ne kwitundaika bene na bene byakwashishe Bakamonyi ba kwa Yehoba kuchinchika ne kutwajijila kwikala ba kishinka ku bintu byo baitabilamo nangwatu kimye kyo bajinga mu makampu a lumanamo.

Nangwatu luno, inge Bakamonyi ba kwa Yehoba ke bebamanyike ku kafulumende nangwa kwibashinkila mwingilo wabo, byonka byo kiji mu Russia, baketekela kuba’mba Yehoba usakutwajijila kwibakwasha.—Isaya 54:17.

Bakamonyi ba kwa Yehoba byo Bebamanyikilenga ku Makafulumende Asatu a mu Germany

Weimar Republic (1918-1933)

Mu kyalo kyonse kya Germany, bantangi ba bupopweshi baesekele kwingijisha bije bya mambo kulwisha Bakamonyi ba kwa Yehoba, batelwanga pa kyo kya kimye amba Bafunda Baibolo. Kutendeka mu 1922, balongo bebapelemo mambo a “kupotesha mabuku kwa kubula kulondela mizhilo ne kubula kupana misonko,” kabiji aba bo bazhachishe na mambo bebamanyikilenga bingi. Mu myaka pakachi ka 1927 ne 1930, ku bije byambo kwajinga mambo a Bafunda Baibolo 5,000.

Mu 1928, Dipatimenti utala pa Misonko ya kyalo wafuukwilepo kuba’mba kipamo kya Watch Tower Bible and Tract Society kisakutendeka kupananga misonko. Palutwe kacheche, bantangi ba machechi baambile’mba kyo bakebelenga ke kulengela Bafunda Baibolo kukankalwa kwingila mwingilo wa kusapwila. Balongo batwajile ano mambo ku kije kya mambo, kabiji kije kya mambo kibalwijileko.

Mu November 1931, bakapokola ba mu muzhi mukatampe wa Munich bakainye Bafunda Baibolo kasampanya mabuku abo mu kibunji kya Bavaria. Mu February 1932, kafulumende wa Upper Bavaria waswishishe byafuukwile bakapokola, kabiji mu March mu yenka uno mwaka kafulumende wa Bavarian wafuukwilepo kuba’mba Bafunda Baibolo kechi bafwainwe kutwala ano mambo ku kije ne.

Kafulumende wa Nazi (1933-1945)

Pa 30 January, 1933, Adolf Hitler waikele ndama kyalo mu Germany kabiji watendekele kukanya kupwila ne kupulinta mabuku etu. Kimye kyo kwajinga mukwekele wa kusampanya kabuku ka Crisis kutendeka pa 8 kufika pa 16 April, bakainye mwingilo wa Bakamonyi ba kwa Yehoba mu Bavaria. Uno mukwekele byo apwile, mizhi ikwabo nayo yakainye mwingilo wa Bakamonyi.

Bantangi babupopweshi bavula batundaikilenga Hitler ne byo amanyikilenga Bakamonyi ba kwa Yehoba. Pa 20 April, 1933, juba jo bavulukilenga kusemwa kwa kwa Hitler, ntangi wa muchechi wa Lutheran aye Otto waambile pa waileshi amba:

“Chechi wa Lutheran wa mu muzhi wa Saxony mu Germany walangulukapo bingi pa kafulumende wakatataka wa Nazi kabiji waswisha byafuukulapo uno kafulumende, kabiji uno chechi usa kwingijila pamo na uno kafulumende kukosesha kyalo ne Mambo Awama akwa Yesu Kilishitu. Kintu kitanshi kyo twaingijila pamo na kafulumende ke kulekesha jibumba ne mwingilo wa Bafunda Baibolo mu Saxony.”

Mu 1933 bakanyishe mwingilo wa Bakamonyi ba kwa Yehoba mu mizhi yavula ya mu German (pa 1 April, 1935 ba bikileko muzhilo wa kukanya mwingilo watu) kabiji bashilikale ba kwa Hitler baangachile ofweshi wa musampi wa Bakamonyi ba kwa Yehoba. Bimye byavula bayanga na kupikita mazubo a balongo, kabiji Bakamonyi bavula bebakashile.

Nkondo ya Bubiji ya Ntanda Yonse byo yapwile, mu Germany mwajinga Bakamonyi ba kwa Yehoba 25,000. Mu 1945, Bakamonyi 10,700 bebamanyikilenga ku kafulumende wa Nazi, bakwabo 2,800 bebatwajile mu makampu a lumanamo, kabiji bakwabo 1,000 bo bafwile.

Kafulumende wa German Democratic Republic (1949-1990

Kabiji uno kafulumende utelwa ne kuba’mba Musela wa Germany. Baambanga’mba wajinga kafulumende walamanga bantu bulongo, bino saka amanyikilenga Bakamonyi ba kwa Yehoba byonka byajinga kafulumende wa Nazi.

Myaka pakachi ka 1950 ne 1985, bije bya mambo byapelemo mambo Bakamonyi kukila pa 5,000 a kuba’mba baingijilenga mwingilo wakainye kafulumende, kwamba byambo byatama pa kafulumende ne kutundaika nkondo. Balongo ne banyenga bebakashilenga myaka itanu ne kichika.

Bakamonyi 62 bafwijile mu kaleya kimye kyalaminenga kafulumende wa German Democratic Republic

MASAWAKYA