ACCRA, Ghana—Kumpelo ya August 2015 Bakamonyi ba kwa Yehoba momo bapwishishe mwingilo wa kukwasha bayujilwemo mu muzhi mukatampe wa Accra. Uno muyulo waipaile bantu kukila pa 200 ne konauna bishimikwa byavula bingi.

Nangwa kya kuba kafwako Kamonyi nangwa umo wafwile ne, bino Bakamonyi kukila pa 250 bashajiletu kwa kubula mwakulaala. Pa June 4, mu 2015 jo juba kwajinga uno muyulo. Ofweshi wa musampi wa Bakamonyi ba kwa Yehoba mu Ghana walengele kavoto ka kutala pa mwingilo wakukwasha bayujilwamo. Kano kavoto kapotejile bajinga mu bino bya malwa myemba, bivwalo, ne kwibatwajila mema. Kabiji batangijile ne mwingilo wa kuwamisha mazubo mwayujile mema. Bakamonyi ba mu Accra balamine bakwabo ba mu lwitabilo mu mazubo abo pa moba acheche.

Uno muyulo walengejile ne po balamina manyi a mu myotoka kutubika kya kuba ne mipaipi ya mema yaya ku Adabraka konaika. Kino kyalengejile ino mpunzha kwikala kwa kubula mema. Ofweshi wa musampi watwajileko tanki wa mema pa Nzubo ya Bufumu (kishimikwa mo bapopwela Lesa) pa kuba’mba Bakamonyi ne bantu baji kwipi batapulengapo mema.

Pa Kibelushi pa 6 June, ofweshi wa musampi watumine badokotala batanu ne bamanase babiji bakuya na kukwasha bakwabo ba mu lwitabilo ne bantutu ba mu muzhi wa Alajo ne mu Adabraka. Babukile bavula bingi, bakolelwe malelya, bikola bya mu kyaji ne kupolomya. Kabiji bakwimenako musampi ne balongo bakonkakwa bayilenga na kutundaika bakwabo ba mu lwitabilo na mambo a Lesa ne kwibatekenesha.

Bemenako Bakamonyi ba kwa Yehoba mu kyalo kya Ghana abo ba Nathaniel Gbedemah baambile’mba: “Kyamweka mu Accra, bantu kufwa ne mazubo a kupumauka na mambo muyulo kyatama bingi. Atweba Bakamonyi ba kwa Yehoba byonka byo tukelwa kuba ne mu byalo bikwabo, tubena kwingila papelela bulume bwetu kwibatekenesha, kwibabuka ne kutundaika bantu ba uno muzhi mwajinga muyulo na mambo a Lesa.”

Media Contact(s):

International: J. R. Brown, Office of Public Information, tel. +1 718 560 5000

Ghana: Nathaniel Gbedemah, tel. +223 30701 0110