MU KATHMANDU mu Nepal, byo mwapichile kitentanshi kikatampe, Bakamonyi ba kwa Yehoba ba ku Bangladesh, ba ku Germany, ba ku India, ba ku Japan, ba ku Switzerland, ne ba mu United States, batendekele kunengezha bya kukwasha bantu pa 25 April mu 2015, kabiji kino kitentanshi kyaipaile bantu bavula bingi kubikapotu ne Kamonyi umo wa mukazhi ne baana banji babiji. Pa 12 May mu 2015, mu Nepal mwapichile kitentanshi kya bubiji. Nangwa byonkabyo, Bakamonyi baambile’mba kitentanshi kya bubiji kafwakotu nangwa umo membala wabo ye bakozha, ye baonawina bipe nangwa kufwa ne.

Juba jalondejilepo kufuma pamwekejile kino kitentanshi, bemenako Bakamonyi ba kwa Yehoba ba pa ofweshi wa mu Nepal, bayile na kupempula bipwilo byonse biji mu Kathamandu Valley, ku mpunzha kwapichile kitentanshi kikatampe bingi pa kuba’mba bamone byo bafwainwe kukwasha bantu. Kino kitentanshi kyakulwile mazubo a Bakamonyi ba kwa Yehoba 38 ne konauna akwabo 126. Aba bo baonawijile mazubo bayile na kwikala mu mazubo aba bakwabo bapopweshi, mu mazubo mo bapwijila o beta’mba Mazubo a Bufumu kabiji bapopele ne matente pangye. Ofweshi wa mu Nepal watendekele kutwala kajo, kafumine ku Bangladesh, ku India, ne mu mizhi ya mu Nepali ku Birgunj, ka Damauli, ku Mahendranagar, ne ku Pokhara. Kavoto Kakwasha Baponenwa na bya Malwa ka bena kunengezha Bakamonyi bepana ba ku India, ku Japan ne ku Nepal ba kushimika mwakwikala kimye kicheche.

Bemenako Bakamonyi ba kwa Yehoba mu Nepal, ba Reuben Thapaliya baambile’mba: “Kechi twatatu muchima ku bintu bya ku mubiji bya bantu bamanama na kitentanshi ne, bino twata ne muchima ku bintu bya ku mupashi. Kununga pa kwibapa kajo, mansele a kutoma ne mwakulaala kabiji twanengezha ne kufunjisha bantu byambo bya Lesa.” Ba Gary Breaux bemenako Bakamonyi ba kwa Yehoba ba pa ofweshi mukatampe wa ntanda yonse, bayile ku ino mpunzha kwapichile kitentanshi pa 2 kufika pa 5 May mu 2015, kabiji bapempwile bipwilo ne bisemi. Pa 4 May mu 2015, ba Breaux baambile jashi ja mu Baibolo jo batelekeleko bavula mu bipwilo kwingijisha vidyo ku ino mpunzha. Kabiji wimenako ofweshi wa musampi wa ku Japan wa Bakamonyi ba kwa Yehoba, Kenji Chichii, wafikile pa 5 May mu 2015. Wayile na kupempula bisemi mu ino mpunzha ne kwibatundaika kupichila mu kwamba majashi a mu Baibolo.

Ofweshi wa musampi wa Bakamonyi ba kwa Yehoba mu Germany wanengezhe bayuka mingilo ya mu kipatela Bakamonyi bayuka bya kukwasha bantu kupema bulongo, bayuka bya kutumbulañana ne bakupana michi. Basendele muchi wapaine Bakamonyi ba ku Bangladesh, ku India, ne ku Japan, ne bingijishotu bikwabo bya kwingijisha pa kutumbulañana, jino jibumba jafumine ku Europe jaingijilenga pamo na Kavoto Kakwasha Baponenwa na bya Malwa kubuka balwazhi pa Mazubo a Bufumu mu mapunzha mwapichile kitentanshi.

Ba J. R. Brown ba pa ofweshi mukatampe wa ntanda wa yonse bemenako Bakamonyi ba kwa Yehoba, baambile’mba: “Twatwajijila kukwashañana mambo twayuka kuba’mba bano baponenwa na kino kitentanshi babena kukebewa bukwasho bwakila bwa ku mubiji ne bintu byabo byaonaika. Bapopweshi bakwetu mu Nepal ne bakwabotu bapuluka ku kitentanshi bafwainwa kushiinwa kuba’mba tubena kukebesha bingi kwibakwasha ku mupashi ne ku mubiji. Kimye kyonse twibalanguluka ne kwi balombelako.”

Media Contact(s):

International: J. R. Brown, Office of Public Information, tel. +1 718 560 5000

Germany: Wolfram Slupina, tel. +49 6483 41 3110

Japan: Ichiki Matsunaga, tel. +81 46 233 0005

Nepal: Reuben Thapaliya, tel. +977 9813469616