Balongo pa ofweshi mukatampe wa ntanda yonse wa Bakamonyi ba kwa Yehoba babena kwingila na ngovu kukeba kuyuka bibena kwenda uno mwalo wa COVID-19. Twayuka kuba’mba mwalo ke kiyukilo kya kuyukilako kuba’mba tuji mu moba a kupelako. (Luka 21:11) Inge mwalo wafika mu kyalo mo twikala twafwainwa kwizhikijila ne kuzhikijila bakwetu.—Byambo bya Maana 22:3.

Bamo kechi bayuka byo kiji ku balongo ne banyenga bekala mu byalo mwafika uno mwalo ne. Mwalo wa COVID-19 walengela maofweshi a misampi ne bipwilo mu Italy, Japan, South Korea, ne byalotu bikwabo kupimpulako mitanchi imo. Mitanchi imo yo bapimpulako ke kubula kuswisha bantu bafuma kungi kwiya na kulaalapo pa musampi nangwa kufwakasha. Kabiji kafulumende wakanya kupwila bantu bavula pa mpunzha imo, kino kyalengela ofweshi wa musampi naye kufumyako kubuñana kwa mwanzo. Bipwilo nabyo byafwainwa kupimpulako mashinda a kusapwilamo ne kupwila. Nangwa kya kuba kuji uno mwalo, balongo batwajijila na kukwasha balongo ne banyenga kwikala na bulunda bwakosa ne Lesa ne kutwajijila kwitundaika mulwabo.—Yuda 20, 21.

Mu bino bimye bya makatazho balongo babena kwingijisha mafunde a mu Baibolo aji panshipo, abena kwibakwasha kuchinchika. Bino bishinka byafwainwa kwimukwasha ne anweba inge mwalo wafika mu mpunzha yenu.

• Kubula Kulukusha Muchima. Inge kwamweka mwalo nabiji uno mwalo wa Colona, javula tukeba kubapo kimo pa kuba’mba twizhikijile. Bino kechi kyawama kulukusha muchima ne.—Byambo bya Maana 14:15; Isaya 30:15.

• Kulondelanga Mikambizho Yanengezha Kipamo Kitala pa Bumi. Kipamo kitala pa bumi kinengezha mashinda afwainwa kukwasha bantu pa kwizhikijila. Mwafwainwa kukookela bibena kwimubuula kafulumende.—Loma 13:1.

• Ikalai ba Butooto. Mwafwainwa kowanga ku maboko na sopo kimye kyonse nangwa kwingijisha muchi wipaya twishi. Mwafwainwa kumona kuba’mba ponse po mwakwata mu Nzubo ya Bufumu nangwa pa mazubo penu mwawamishapo. Kabiji batala pa bumi bwa bantu kechi baswisha kwiimuna mu maboko ne, mambo kino kilengela kusambula nangwa kusambwisha bakwenu kikola inge mwakolwa. Kabiji kipamo kitala pa bumi kya World Health Organization kyanengezha mashinda bantu o bafwainwa kulondela pa kwizhikijila.

• Temwai Bakwenu. Twayuka kuba’mba kupwila ne kusapwila kwanema bingi, bino inge twakolwa, twafwainwa kwikalatu pa nzubo kuchina kusambwisha bakwetu. Kuba bino kumwesha’mba twatemwa bakwetu kabiji tukeba kuzhikijila balongo ne banyenga ne bantu babula Bakamonyi ba kwa Yehoba bo twikala nabo kinkalankulo.—Mateo 22:39.

• Londelainga Byonse byo Babena Kwimubuula ku Kipwilo. Mu mapunzha muji mwalo, ofweshi wa musampi wakonsha kukambizha’mba baleke kupwila, kubuñana, ne kuleka mitanchi ikwabo yanengezha jibumba ja Lesa. Byobyo bauba mu byalo bimo mwafika mwalo wa COVID-19, mu Italy, Japan, ne South Korea bipwilo bimo baleka kupwila. Kwesakana na byo kiji mu kyalo kyenu, bakulumpe bakonsha kukopololanga kupwila ne kupa basapwishi saka batamba ku mazubo abo. Basapwishi bakonsha kusapwilanga kwingijisha foni, kutumina bantu byambo pa foni nangwa kwingijisha makalata.

Mu ino mitwe muji mafunde akonsha kwimukwasha kwizhikijila ku bikola.

• “Izhikijilainga ku Bikola” Labainga! Na. 6 2016, mapa 4-6

• “Bya Kuba pa Kuwamishako Butuntulu bwa Mubiji” Labainga! June 2015, mapa 2-7

• “You Can Improve Your Health: Key 4—Protect Your Health” Labainga! March 2011, jipa 7