Pa 8 October mu 2014, kochi mukatampe wa Russian Federation Supreme Court wachibile mambo abwezhezhe Bakamonyi ba kwa Yehoba ku kochi mambo bebalekesha kwingila mu Samara. Patanshi, kochi mucheche wachibile’mba Bakamonyi ba mu Samara bakizhamo bya bupopweshi. Inge kochi mukatampe wa Supreme Court wabula kupimpula byachibile kochi mutanshi, ko kuba’mba bintu bikebatamina bingi Bakamonyi kukila pa 1,500 bekala mu Samara.

Mambo o balobejile Bakamonyi ba mu Samara atendekele mu April mu 2014 kimye Shabyambo wa Regional Prosecutor’s Office kyo ebalobejile ku kochi wa Samara Regional Court amba bebalekeshe mambo “bakizhamo bya bupopweshi.” Ano mambo saka akyangye ne kufika ku uno kochi, uno shabyambo walekeshe Bakamonyi kwingila ne kwibangata bishimikwa byabo. Kipamo kya Russian Federation Ministry of Justice byo kyaumvwine bino kyanembele Bakamonyi ba mu Samara pa mutanchi wa bupopweshi bobalekesha na mambo a kukizhamo nangwa kya kuba ano mambo kechi beachibile mu kochi ne. Mu May pa 29 mu 2014, Mutonyi aye Shabayeva wazhachishe Bakamonyi ne kubingisha uno shabyambo, ne kukambizha kuba’mba Bakamonyi bebangate bishimikwa.

Kino kechi kyo kimye kitanshi ofweshi wa Samara Regional Prosecutor’s Office kyo akeba kulekesha Bakamonyi ba kwa Yehoba mu Samara ne. Mu 2009, uno yenka ofweshi walobejile Bakamonyi, bino ano mambo babwelele beafumya ku kochi abo bene. Bino mu ao mambo, batala pa mizhilo mu Samara baingijishe jishinda jikwabo pa kuba’mba bobe kyo bakebelenga.

Bakapokola bapikichile bishimikwa mwapwijilanga Bakamonyi bya kusonkela mu January mu 2013 ne mu January mu 2014 mo “bataine” mabuku o banembele pa mutanchi wa mabuku o babajijile ku bintu bimwesha kukizhamo. Shabyambo wa mu Samara City Prosecutor’s Office wasopeshe Bakamonyi kwesakana na byo bataine mu 2013, kabiji bakapokola byo bataine mabuku a bya bupopweshi mu January mu 2014, uno shabyambo popo atwajile ano mambo ku kochi. Pa 7 March mu 2014, kochi wa mu Sovetskiy District Court of Samara wazhachishe Bakamonyi ne kwibambila kupana mali afikile ku 50,000 rubles (madola akina America 1,383). Bakamonyi ba mu Samara bashiinwa kuba’mba bakapokola bo babikilemo ano mabuku o bataine pa bino bimye bibiji byo bapikichile. Kabiji Bakamonyi ba kwa Yehoba bakaine byachibile kochi wa mu Russia kuba’mba mabuku abo akizhamo mu bya bupopweshi kabiji batwala ano mambo ku kochi wa European Court of Human Rights.

Shabyambo wa Samara Regional Prosecutor’s Office byo abingile na mambo mu kochi wa Sovetskiy District Court, watwajile ano mambo ku kochi wa Samara Regional Court kuba’mba Bakamonyi bebapemo mambo a kukizhamo bya bupopweshi. Waubile bino kuba’mba Bakamonyi bebalekeshe. Shabyambo wa Bakamonyi ba kwa Yehoba wakaine ku meso a Mutonyi aye Shabayava amba Bakamonyi mu Samara bebalekesha kwa kubula luusa lwa kochi kabiji kafwako byatama mu bupopweshi bwa Bakamonyi ba kwa Yehoba ba mu Samara ne. Kabiji wakaine ne kuba’mba bakapokola bo babikile mabuku o bataine mu bishimikwa byo bapikichile. Nangwa byonkabya, Mutonyi aye Shabayeva wafuukwilepo kwibalekesha Bakamonyi kwingila mu Samara.

Jishinda jo bachibijilemo mambo mu Samara jipasha na jo bachibijilemo mambo o bazhachishe Bakamonyi ba kwa Yehoba mu Russia ku Taganrog. Ba luusa batwajile mungi muzhilo waamba pa bakizhamo bya bupopweshi. (Federal Law on Counteracting Extremist Activity) Ba luusa ba mu kafulumende balekeshe Bakamonyi ba kwa Yehoba mu Taganrog mu mwaka wa 2009, ne kwibalobela pa muntu pa muntu amba bambanzhi. Ano mambo o alengejile kukasa Bakamonyi batanu na babiji na mambo a kutanwakotu ku kupwila. Kyamweka kino kyo kikamwekela ne Bakamonyi ba kwa Yehoba ba mu Samara.

Nanchi kafulumende wa kyalo kya Russia ukaleka kumanyika Bakamonyi ba kwa Yehoba nyi? Mu mapunzha avula, mu June mu 2014, kafulumende wa kyalo kya Russia watendekele kupamo mambo Bakamonyi ba kwa Yehoba a kusampanya mabuku o bamwenenga’mba akizhamo bya bupopweshi. Bakamonyi ba kwa Yehoba mu Samara baketekela kuba’mba kochi wa Russian Federation Supreme Court ukachibila mambo mo a olokela.