MU NOVEMBER mu 2014, mu muzhi wa ST. Petersburg mu kyalo kya Russia, Kamonyi wa kwa Yehoba umo aye Svetlana Nemchinova watolele enivulupu mu mukwakwa mwajinga mali 6,000 euros (mali a kina America kukila pa $6,800 U.S.). Uno kamonyi wakebele bingi mwinao ano mali pa moba avula kabiji kyapeleleko wamutaine ne kumupa mali anji. Bukishinka bwa ba Svetlana Nemchinova bebwaambilepo bingi pa TV, pa waileshi ne mu mapepala a byambo.

Ba Svetlana Nemchinova bengila mwingilo wa kuwamisha mu mikwakwa mu muzhi wa Vologda, uji palepa makilomita 450 (280 mi) ku buyeke musela na kyalo kya Moscow. Byo baingijilenga bamwene enivulupu ye babula kunembapo. Byo banshikwile mukachi bataine muji mali avula bingi. Ba Svetlana Nemchinova baji na baana basatu, kechi banonka ne kabiji bekala mu kazubo kachechetu bino baambile amba: “Kechi nalangulukilepo kwiaja ano mali ne. Nalangulukile pa mwinao byo kyamukola ku muchima pa kwela ano mali.”

Pa kukeba mwinao, ba Svetlana Nemchinova balamikile pepala pa kishimikwa kyajinga pepi. Na mambo a kuba’mba kafwako nangwa umo waishile na kwibamona ne, batwajile ano mali ku banki, mambo mu enivulupu mwajinga lishichi pajinga jizhina ja banki. Ba ku banki baambile’amba bena ano mali bajinga ba Pavel Smirnov. Pa moba avula ba ku banki batumijile foni ba Smirnov pano bino kechi bakumbwilenga ne. Byo bakumbwile, ba ku banki bebabujile amba kuji mwanamukazhi umo wa jizhina ja Svetlana Nemchinova watolele mali abo.

Kibaba kimo kya mu pepala wa byambo mu Russia utelwa amba Premier kyaambile amba: “Ba Svetlana kyo bauba, bene bamona amba kechi kyakukumya ne. Batemwa bingi kupopwela Lesa kabiji batanga jonse Baibolo.” Ba Svetlana Nemchinova balumbulwijile banembi bapepala wa byambo wa Premier amba, baubile bino mambo balondejile muzhilo utelwa’mba Muzhilo Wawama uji pa Mateo 7:12: waamba’mba:“Onkao mambo, bintu byonse byo mukeba amba bantu bemubile, ne anweba mwafwainwa kwibobilabyo.”

Ba Smirnov balenga bipikichala bataaine jishinda jawama ja kulengelamo penchi wawama bingi, kabiji balaminenga ano mali kuba’mba bapote mashinyi a kwibakwasha pa kupesapesa bya kulenga misombelo yapusana pusana. Ba Smirnov baambile’mba: “Byambo bya kusanchila ba Svetlana mfwabyo, bino byo bauba byalengela bantu kuyuka paimena lwitabilo lwabo. Kujitu kintu kimo kyo mbena kukeba kwamba: ‘Lesa kine ko aji!’”

Media Contact(s):

International: J. R. Brown, Office of Public Information, tel. +1 718 560 5000

Russia: Yaroslav Sivulskiy, tel. +7 812 702 2691