Pa 22 January mu 2014, banchibamambo basatu ba mu kochi wa ku Tver Regional Court bakaine byachibile kochi mucheche kuba’mba bashinke keyala wa jw.org wa Bakamonyi ba kwa Yehoba. * Bino kupusanako na byafuukwilepo makochi a mu Russia pa myaka yapitapo kunyuma kwe, kochi wa Regional Court walondejile byaamba mizhilo, kabiji wakaine byaambilenga bano banchibamambo bakebelenga kushinka uno keyala.

Kino kyalengejile bantu kukizhamo kumanyika Bakamonyi ba kwa Yehoba mu Russia kabiji kwakijilemo bingi pa 7 August mu 2013. Kochi mucheche uji ku Tver paji makilomita 160 ku muzhika wa Moscow byo afuukwilepo kushinka keyala wa jw.org mu mambo o bambiletu mu maminiti 25. Bemenako Bakamonyi ba kwa Yehoba kechi bebabujile kuba’mba bakeye na kumvwako ano mambo, ne kuba’mba bambepo pa ano mambo o batwajile ku kochi ne. Bakamonyi ba kwa Yehoba baumvwine uno sawakya pa mwela saka kwashalatu maola acheche kuba’mba kimye kya kulombelamo kwamba ano mambo jikwabo kipwe pa 12 September mu 2013. Ponkapotu batwajile nkalata ya kuba’mba ano mambo bakeambepo jikwabo ku kochi wa ku Tver Regional Court.

Ano mambo beambile pa 22 January mu 2014, kochi wa Regional Court waambile pa muzhilo waambile’mba, luusa lwa ba Watchtower Bible and Tract Society of New York, Inc lwa kwikala na keyala belunyachijile kabiji baambile kuba’mba ano mambo bakeambepo jikwabo pa kuba’mba bakomvwe ku mbaji yonse ibiji. Nchibamambo wingijila pamo na kipamo kya Ministry of Justice ne kya Ministry of Interiorne walombele kochi kuba’mba bambe pa uno keyala paji bintu byatama bingi ne kuba’mba bafwainwa kushinka uno keyala mu Russia monse. Bino kochi wa Regional Court kechi waswile kuba bino ne.

Bakamonyi ba kwa Yehoba batendekele mukwekele wa kulekesha kwibamanyika, balumbulwilenga kuba’mba muzhilo waamba pa kukizhamo mu bya bupopweshi bamwingijishenga bibi. Ba luusa mukafulumende wa mu kyalo kya Russia batendekele mu 2009 kwingijisha bibi muzhilo wa Federal Law on Combating Extremist Activity wakanya kukizhamo mu bya bupopweshi. Kino kyo baubile kyalengejile Bakamonyi ba kwa Yehoba batendeka kwibamanyika kya kine kine mu kino kyalo kyonse. Ba luusa mu kafulumende babena kwingijisha bibi uno muzhilo kabiji bauba bino byalondelapo:

• Bakamonyi ba kwa Yehoba kukila pa 1,600 bebakwata;

• bakanya mabuku 70 a bya bupopweshi;

• bapikichile mu mazubo 171 ne mu mazubo a bupopweshi; kabiji

• bapalañenye kupwila 69.

Mu mambo a ku Tver, shabyambo wa kafulumende wakebelenga kushinka uno keyala amba mambo panji mabuku atanu na umo “akizhamo mu bya bupopweshi.” Kochi wa Tsentralniy District Court wa mu Tver wafuukwilepo kushinka keyala wa jw.org pa 7 August mu 2013 kwingijisha uno muzhilo wa Federal List of Extremist Materials waamba pa bintu byakizhamo.

Bino byo bafuukwile kechi byaijilemo nangwa pachechetu ne, mambo bakankelwe kumonapo jishinda jikwabo ja kukainyamo mabuku o bamona’mba “akizhamo mu bya bupopweshi” pa uno keyala. Kochi wa Regional Court byo ataine kuba’mba bafumyapo ano mabuku onse o bamwenenga’mba akizhamo mu bya bupopweshi pa jw.org kabiji amba atama bingi ku bantu bekala mu Russia. Kochi kyamupelejile kubula kushinka uno keyala. Bachiba ano mambo nangwa kya kuba shabyambo wa kafulumende bamupa bañondo 6 bakunembelamo nkalata ya kulomba kubwezhapo ano mambo jikwabo. Ano mambo beapwishishe kabiji kochi kechi wafwainwa kubwezhapo ano mambo jikwabo ne.

Kuji bintu byavula bya kuba pa kupwisha luno lukatazho. Kochi wa ku Tver Regional Court waambile kuba’mba byo bachibijile mambo Bakamonyi ba kwa Yehoba mu kochi wa Russian courts kechi byaijilemo ne. Kochi mukatampe utala pa luusa lwa bantu wa European Court of Human Rights (ECHR) pa bimye byavula upamo mambo bena Russia pa kubula kupa Bakamonyi luusa mu bya bupopweshi. Kyalo kya Russia kechi kilondela muzhilo wa bikako kochi mukatampe wa ECHR ne, pano bino batwajijilatu kubula kunemeka luusa lwa bantu. Pa kuba’mba bazhikijile luusa lwabo lwa kupopwela, Bakamonyi ba kwa Yehoba banembele makalata 23 a kulobela kyalo kya Russia kabiji ano mambo akiji ku kochi mukatampe wa ECHR.

Nanchi mukafuma byawama mu bikafuukula kochi wa ku Tver Regional Court nyi? Bakamonyi ba kwa Yehoba babena kukebesha bingi kumona bikoba kyalo kya Russia inge ano mambo beachiba ku kochi mukatampe wa ECHR.