ST. PETERSBURG, mu Russia—Pa July 21, mu 2015, kochi wa Russian Federation washinkile keyala wa intaneti wa jw.org wa ba Bakamonyi ba kwa Yehoba ne kwamba’mba yense mu kino kyalo wamushinkula bakamupamo mambo a bumbanzhi. Pa byalo byonse mwaya ntanda, kyalo kya Russia kyo kyonkatu kyakanya keyala wa jw.org.

Shayuka wafunda bya bupopweshi kabiji mukulumpe pa sukulu mukatampe wa Academy of Labor and Social Relations mu Moscow, abo ba Yekaterina Elbakyan, baambile pa jw.org amba: “Namona uno keyala wawama bingi mambo paji byambo bya Bakamonyi ba kwa Yehoba byo baamba pa jibumba jabo kechi byaambatu bantu ne. . . . Kechi Bakamonyi bobonkatu batemwa uno keyala ne, ne bonsetu batemwa kupesapesa pa bupopweshi bwapusana pusana. Kechi mbena kwambatu pa bafunda bya bupopweshi nabiji amiwa ne, bino ne bantapatwambo ne banemba mabuku pa bya bupopweshi.”

Ba shayuka wa mizhilo pa kipamo kitala pa luusa lwa bantu kya Human Rights Institute mu Moscow, abo ba Lev Levinson, baambile pa byafwainwa kuba kafulumende kwesakana na mizhilo ya mu kyalo pa kino kimye amba: “Pa kino kimye buku wa mizhilo mu kyalo kya Russia waswisha bantu kukasuluka mu bya bupopweshi ne kwisajila bupopweshi bo bakeba abo bene. Bino byonka byo baubanga kala, kyalo kya Russia kyatendeka kunyanchijila luusa lwa bantu lwa kubulako bakwabo byo baitabilamo mambo babena kwangata mabuku ne kulekesha makeyala a pa intaneti. Babena kuba kyanshiji mambo bamitonyi bayuka byaamba mizhilo pano bino babena kufyamina mu muzhilo wakanya kukizhamo mu bya bupopweshi.”

Mitotololo ya kushinka uno keyala yatendekele mu 2013. Pa August 7 mu uno mwaka, kochi wa mu nkambi imo mu Russia waambile’mba uno keyala “wakizhamo” mu kavoto ka ku mbajitu. Bino byo bafuukwile bebifumishepo ku kochi mukatampe pa January 22, mu 2014. Nangwa byonkabyo, shabyambo wa kibiji mu kyalo aye Deputy of the Prosecutor General of the Russian Federation watwajile ano mambo ku kochi mukatampe wa Supreme Court mu kyalo kya Russia ko bakabwezhezhe byafukwile kochi mutanshi. Pa December 2, mu 2014, kochi wa Supreme Court watelekele ku byaambile uno shabyambo kwa kubula kwita Bakamonyi kwiya na kwiambila. Kochi wa Supreme Court wabwezhezhe byafukwile kochi mutanshi ne kushinka uno keyala amba “wakizhamo” nangwa kya kuba kochi waswile kuba’mba pa uno keyala kafwapo mabuku o bakanya mu kyalo kya Russia ne. Bakamonyi batwajile ano mambo ku wakumupando mu kochi mukatampe wa Supreme Court, bino kafwako kyamwekele ne. Kino kyo kyalengejile pa July 21, mu 2015, kipamo kitala pa mizhilo kya Ministry of Justice mu kyalo kya Russia kubika uno keyala pa mutanchi paji bintu byo bakanya ne kushinka uno keyala mu Russia.

Ba Yaroslav Sivulskiy, baambilako Bakamonyi ba kwa Yehoba mu Russia, baambile pa kino amba: “Kyatama bingi mambo kafulumende mu Russia walekesha uno keyala kwakubula kulondela mizhilo. Kushinka uno keyala kwalengela Bakamonyi baji mu kino kyalo kukila pa 170,000 kubula kwikala na bwana bwa bene mu bya bupopweshi. Bino bantu kukila pa 285,000 mu Russia bo bashinkulanga uno keyala pa juba pa juba. Onkao mambo, baipailamo ne bantu bakwabotu babula Bakamonyi bamwenangamo mu uno keyala ufunjisha bantu byaamba Baibolo.”

Ba J. R. Brown bemenako Bakamonyi ba kwa Yehoba ntanda yonse baambile ku ofweshi mukatampe wa ntanda yonse ku Brooklyn, mu New York amba: “Keyala wetu wa jw.org, paji mavidyo awama bingi, mabuku alumbulula Baibolo mu milaka yavula ne magazini ye tusampanya mwaya ntanda yonse wa Kyamba kya Usopa ne Labainga! Uno keyala bamwambapo bingi ku kupwila kukatampe mu byalo byavula ko batambisha mabuku kabiji bamwingijisha bingi mu masukulu avula. Uno keyala wakwasha bantu bavula mwaya ntanda kabiji bamwingijishanga bingi mu Russia. Onkao mambo, uno keyala bafwainwa kumuleka watwajijila.”

Media Contact(s):

International: J. R. Brown, Office of Public Information, tel. +1 718 560 5000

Russia: Yaroslav Sivulskiy, tel. +7 812 702 2691