Pa 11 December mu 2014, mu kochi wa Rostov Regional Court bakambanga mambo a Bakamonyi ba kwa Yehoba 16 bobapelemo mambo a bumbanzhi mu muzhi wa Taganrog, mu Russia. Bebakwachile mambo banengezhanga ne kupwila pamo mu mutende.

Bakamonyi ba kwa Yehoba batendekele kwibalondalonda mu 2011 kimye baluusa ba mu kafulumende po batendekele kupikita mu mazubo abo ne kukopa mu bufyamfya byaubiwanga kimye kya kupwila. Kuba bino ko kwalengejile kuba’mba bebapemo mambo a bumbanzhi. Bañondo 15 byo bapwile na kutotolola, pa July 30 mu 2014 kochi wa mu muzhi wa Taganrog wazhachishe Bakamonyi batanu na babiji. Nchibamambo waambijile bano batanu na babiji kupana mali ne kukasapo bana pa bano moba avula bingi. Bino wabwezhezhemo muchima ne kwibalekelako mambo, kabiji bobashi bakakase nabo bebalekeleko. Nchibamambo walekejileko mambo ne bakwabo Bakamonyi batanu na bana. Nangwa byonkabyo wachibile kuba’mba baji na mambo akukizhamo bya bupopweshi. A bano bonse 16 batwala jikwabo mambo abo ku kochi, kulomba kuba’mba bebaleke mambo kechi bajinga na mambo a bumbanzhi ne.

Shabyambo wa kafulumende naye watwala ano mambo jikwabo ku kochi. Ubena kulomba kochi wa Rostov Regional Court kuba’mba akase Bakamonyi bana, bakulumpe ba jino jibumba ja bupopweshi mu kaleya kufikatu ne kimye kyo bakamba ano mambo. Kabiji ubena kulomba ne kuba’mba bebapemo mambo jikwabo o bebalekejileko Bakamonyi bakwabo batanu na bana ne kwibazhachisha na mambo a kukizhamo mu bya bupopweshi.

Ba Vasiliy Kalin bemenako Bakamonyi ba kwa Yehoba mu Russia ba pa ofweshi wabo mukatampe baambile’mba: “Naketekela kochi wa Rostov Regional Court ukatalapo pa byamanama Bakamonyi 16 bobazhachisha kya lunkanankana na mambo a bupopweshi, kabiji ukalekesha kwibapamo mambo a bumbanzhi.”