Mu July pa 30, mu 2014, kochi wa mu Taganrog wakashile Bakamonyi 7 pa boba 16 bobatotolwesheshenga na mambo a kunengezha ne kupwila pamo mu mutende. Bebatotolwesheshe na mambo a kuba bya mu bupopweshi bwabo byuba Bakamonyi ba kwa Yehoba ntanda yonse. Kochi byo achibile ano mambo byalengejile kunyanchijila mwingilo wa Bakamonyi ba kwa Yehoba mu Russia monse.

Mutonyi waambile’mba bakabijika byo bachiba ano mambo pa 28 July mu 2014, pano bino babijikile juba jalondejilepo. Pa 29 July mutonyi watangile mapa 100 juba jonse. Wapwishishe kutanga lukelo pa juba jalondejilepo pa 30 July. Uno mutonyi wakashile bakulumpe mu kipwilo bana myaka 5 ne bañondo 6 ne kwibatongwela kupana mali 100,000 rubles pa muntu pa muntu (a kina Amarica ke madola 2,800). Kabiji Bakamonyi bakwabo basatu wibambijile kupana mali pakachi ka 50,000 kufika ku 60,000 rubles (a kina America ke pakachi ka madola 1,400 kufika ku 1,700) pa muntu pa muntu. Uno mutonyi waishile kwibalekelako mambo, mambo kwesakana na mizhilo moba akwambilamo mambo apwile. Onkao mambo wakasulwile ne bonse bo akashile. Bakamonyi bakwabo batanu na bana nabo wibakasulwile.

Pa kuchiba ano mambo, mutonyi walondejile byo bachibile mambo ajingako mu September mu 2009 mu Kochi wa Rostov Regional Court kuba’mba bafwainwa kulekesha Jibumba ja Bakamonyi ba kwa Yehoba mu Taganrog. Nangwa kya kuba byo bachibile ano mambo mu 2009 byaambilengatu pa jibumba jo bengijisha, bino mutonyi waambile’mba Bakamonyi ba kwa Yehoba kechi bafwainwa kwingilanga mingilo yabo ya bupopweshi mu Taganrog ne mizhi ikwabo iji kipi kipi ne.

Mu ano mambo o batotolwelele pa bañondo 15, Bakamonyi ba kwa Yehoba bo batotolwesheshenga bakaine kusankilapo lwitabilo lwabo kabiji batwajijile kupwila pamo. Aba bo bakashile nabo bayukile kuba’mba inge batwajijile basakwibakasa kuba’mba bandengamambo babula kuleka kulala mizhilo.

Ba Victor Zhenkov, bashabyambo Bakamonyi ba kwa Yehoba baambile’mba: “Naakamwa, mo bachibila mambo mukalengela Bakamonyi ba kwa Yehoba kubula kwikala bulongo mu kyalo kya Russia. Ba luusa mu muzhi wa Taganrog ne mu kyalo kyonse kya Russia bakalondelanga byaambile kochi pa kumanyika Bakamonyi ba kwa Yehoba ne kwibakasa na mambo a kulondela byo baitabilamo.”

Bakamonyi ba kwa Yehoba mu Taganrog babwezha ano mambo ku kochi wa Rostov Regional Court.