Mambo a bumbanzhi o bapelemo Bakamonyi ba kwa Yehoba 16 batwajijile kwiamba mu kochi wa Taganrog City Court kufikatu ne mu May 2014. Ano o mambo atanshi mu kyalo kya Russia mo babena kukanjikizha bangikazhi ba mu Russia kusankilapo lwitabilo lwabo kupichila mu kwibapamo mambo a bumbanzhi. Kamonyi umo ye bapamo mambo waambile’mba: “Bakeba’mba ngikalenga byonka bikala bantu bonse. Kechi bakeba’mba mpusaneko ne. Babena kunkanya kwisamba na bantu pa bya mu Baibolo. Kechi nayuka kyo babena kukeba kuba ne.”

Ba luusa mu kyalo Russia babena kwingijisha bibi muzhilo waamba pa kukizhamo mu bya bupopweshi kufumatu mu 2009 po batendekele kukalakanya Bakamonyi ba kwa Yehoba. (Law on Counteracting Extremist Activity) Ba Victor Zhenkov, bashabyambo ba Bakamonyi baambile’mba: “Napesapesa mambo onse o bapamo Bakamonyi ba kwa Yehoba, nataana kuba’mba batala pa mizhilo bakebatu kukanya Bakamonyi ba kwa Yehoba kuba byo baitabilamo.” Ba luusa mu Taganrog baimena kuntundwa Bakamonyi ba kwa Yehoba kabiji bamona nobe Bakamonyi bupopweshi bwabo kechi bwafwainwa kutwajijila mu kino kibunji ne. Nangwa kya kuba Bakamonyi ba kwa Yehoba banembeshe jibumba jabo ku kipamo kya Russian Federation mu 1992. Kibena kukeba kuba bakulumpe ba mu kafulumende ba mu Taganrog kechi kyalubwa ne. Kamonyi mukwabo waambile’mba: “Umo waingijilenga pa mambo waambile mu ofweshi wanji amba: ‘Saina pa uno pepala kuba’mba kechi ukekala Kamonyi wa kwa Yehoba ne. Mambo obe asakupwa kabiji usakukasuluka kwikala konse ko wakeba.’”

Kechi twayuka bikafuukula kochi ne. Bakamonyi 16 kampe bakebambila kupana mali nangwa kwibambila kwingila mingilo yakosa nangwa kwibakasa mu kaleya. Inge bebakasa, ko kuba’mba bantu kechi bakasuluka mu Russia kuba byo baitabilamo ne. Inge kyaikala bino, ko kuba’mba Bakamonyi ba kwa Yehoba bonse mu Russia bakekala mu kizumba kya kwibapamo mambo a bumbanzhi inge batwajijila kuba byo baitabilamo nangwa kya kuba boba bino mu mutende. Ba Alyona Borodina, bashabyambo bakwabo ba Bakamonyi baambile’mba: “Bakamonyi bebamanyika bingi ku ba mu kafulumende. Mabuku abo aji pa mutanchi wa bintu byo bamona’mba byatama. Inge kochi waamba’mba buku wakizhamo mu bya bupopweshi, beonauna kwesakana na byaamba kochi. Unemba mabuku umo waambile’mba: “Inge batendeka kusoka mabuku, juba jimo ne bantu bakebasoka.’ Luusa lwa kukasuluka mu bya bupopweshi babena kwilunyanchijila bingi.

Mutonyi ukachiba ano mambo mu June mu 2014. Bakamonyi ba kwa Yehoba mwaya ntanda yonse ne bonse batemwa buno bupopweshi babena kutengela kumvwa byobakachiba ano mambo.