Bakamonyi ba kwa Yehoba * 16 mu muzhi wa Taganrog mu Russia bebapamo mambo a bumbanzhi na mambo a kupwila pamo mu mutende ne kuba byo baitabilamo. * Umvwe bakafwe nao ko kuba’mba bakapana mali afika ku 300,000 rubles (mu madola a kina America 10,000) nangwa kwibakasa myaka 8. Bano Bakamonyi 16 bebambila kubula kufuma mu Taganrog kufika kimye kochi kyo akachiba ano mambo.

Bakamonyi ba kwa Yehoba batendekele kwibakanya mu muzhi wa Taganrog mu June mu 2008 kimye shabyambo wa mu kafulumende mu Rostov po alobele kuba’mba jibumba ja Bakamonyi ba kwa Yehoba bejilekeshe kwingila mu muzhi wa Taganrog. Uno shabyambo waambile’mba mabuku a Bakamonyi muji byambo bimwesha’mba bakizhamo mu bya bupopweshi. Kochi wabingishe uno shabyambo, kabiji pa 8 December mu 2009 kochi mukatampe wa Russian Federation Supreme Court naye waishile kuswisha byachibile kochi mutanshi.

Kochi mukatampe wa Supreme Court naye byo aswishishe, ba mu kafulumende batendekela kwangata Mazubo a Bufumu (mazubo mo bapwijila) a Bakamonyi ba kwa Yehoba mu Taganrog. Kino kyalengejile Bakamonyi kutendeka kupwijila mu mazubo abo mu bufyamfya. Kochi waambijile ba mu kafulumende kunemba ne mabuku akwabo 34 a Bakamonyi ba kwa Yehoba pa mutanchi wa mabuku o bamona’mba atama. Bakamonyi ba kwa Yehoba bakaine bino byachibile uno kochi ne kutwala mambo abo ku kochi mukatampe wa European Court of Human Rights.

Bino byamwekele byalengela ba mu kafulumende ba mu muzhi wa Taganrog kumanyika ne kuyanjisha bingi Bakamonyi. Mu 2011 bakapokola bayile nakupikita mu mazubo a Bakamonyi lukelokelo ku ma 6 koloko, na kwibabusha, bakikulumpe ne banyike pamo, kimye kyo bakebelenga mabuku o bamba’mba atama. Batendekele kupikita lukelo kufikatu mabanga. Bakapokola basendelengatu mabuku onse aamba pa bupopweshi ne bipe bya bantu kumo. Ba mu kafulumende bakopele mu bufyamfya kupwila ne bajinga mu luonde pa kuba’mba kibulenga kwibakatazha kwibakwata. Ino milukuchi ya mu Taganrog yo batundaikanga ku kafulumende yalengejile kumanyika ne kuyanjisha Bakamonyi ba kwa Yehoba mu kyalo kya Russia kyonse. *

Jibumba ja Bakamonyi ba kwa Yehoba ke bupopweshi bwayukanyikwa ntanda yonse. Kochi wa Russian Constitution ne wa European Convention on Human Rights waswisha bantu kukasuluka mu bya bupopweshi. Kabiji makochi akatampe mwaya ntanda aswa kuba’mba Bakamonyi ba kwa Yehoba nabo baji na luusa. Nangwa byonkabyo babilolo ba mu kafulumende ba muzhi wa Taganrog bamona Bakamonyi nobe kechi baji na luno luusa ne.

Ano mambo o bebapamo a bumbanzhi, kechi apwane. Bakeachiba mu May inge kochi waumvwa byo bakamba japelako. Inge kochi akafuukulepo kukasa bano Bakamonyi 16, ko kuba’mba Bakamonyi ba kwa Yehoba 800 mu muzhi wa Taganrog kechi bakasuluka kuba byo baitabilamo ne. Kabiji kino kyakonsha kulengela Bakamonyi bakwabo bo bapamo mambo a bumbanzhi mu mapunzha akwabo mu kyalo kya Russia kubula kubinga na mambo.

Ba Grigory Martynov bambilako Bakamonyi ba kwa Yehoba mu Russia baambile’mba: “Kunyanchijila luusa lwa bantu mu bya bupopweshi kechi kwawama ne. Bakamonyi ba kwa Yehoba kechi bobapo bintu byatama nangwa byakonsha kubika kyalo ya Russia mu kizumba ne. Bebamanyika ne kwibayanjisha na mambotu a kuba’mba Bakamonyi ba kwa Yehoba.”