Kochi wa mu nkambi ya Karongi mu kyalo kya Rwanda wabingishe baana ba sukulu batanu na basatu Bakamonyi ba kwa Yehoba kuba’mba baji na luusa lwa kukasuluka mu bya bupopweshi. Bebapelemo mambo a kukana kufunda bya bupopweshi ku sukulu na mambo a jiwi jabo ja mu muchima.

Masukulu avula mu kyalo kya Rwanda beatangijila ku mabumba a bupopweshi. Ano masukulu amo akambizha baana basukulu kuba’mba bayenga mu chechi wabo ne kupana misonko ya mu chechi. Kutendeka mu 2008 kufika mu 2014, baana ba sukulu Bakamonyi ba kwa Yehoba 160 bebapangila sukulu ku bakulumpe ba pa masukulu. Nangwa kya kuba ano mambo aji mu byalo byonse, kyamwekele ku Karongi mu kibunji kya ku muzhika wa kyalo kya Rwanda kimwesha kuba’mba Kafulumende wa kino kyalo ubena kulekesha kumanyika bantu na mambo a bya bupopweshi.

Pa 12 May mu 2014, bakulumpe ba pa sukulu wa Groupe Scolaire Musango School mu nkambi ya Karongi bapangile baana basukulu batanu na basatu Bakamonyi baji na myaka 13 kufika ku 20 * na mambo a kukana kubako bya bupopweshi. Byo bebapangile bansemi babo bano baana bayile na kwisamba na munembeshi wa ku ofweshi wa Rwankuba Sector Executive Secretary, wakambizhe kuba’mba bano baana basukulu bebabwezha ku sukulu. Na mambo a kuba’mba kechi batemenwe byo bafuukwile bino ne, bakulumpe ba pa uno sukulu bapelemo bano baana basukulu mambo akwabo a kubula kunemeka kyalo na mambo a kukana kwimba lwimbo wa kishipa. Bakapokola baishile na kwibakwata pa 4 June mu 2014 byo papichiletu moba abiji kufuma po bebabwezhezhe ku kusukulu.

Bakapokola bakashile bano baana ba sukulu mu kaleya moba atanu asatu. Bakapokola bebayanjishenga bano baana ba sukulu ne kwibambila byatama. Kabiji baana ba sukulu babiji bakomejilepo bebapumenenga amba bo babena kulengela banyike kusatuka. Nangwa kya kuba bebamanyikilenga, bano bonse batanu na basatu kechi basankijilepo byo baitabilamo ne.

Pa 9 June mu 2014, bakapokola popo balekeleko baana ba sukulu batanu na babiji kabiji wajinga mwanyike bingi pa bano bamulekejileko mambo kwi Shabyambo. Nangwa byonkabyo, bakapokola batwajijile kukasa wajinga mukulumpe pa bano pa moba akwabo atanu na ana. Mutonyi wakambizhe kuba’mba bamufumyemo byo abena kupembelela kumutotolwesha pa 14 October mu 2014.

Byo bebatotolwesheshenga, mutonyi watebawishishe bonse baana ba sukulu. Umo waambile’mba kyo betupangila sukulu kechi na mambo kukana kwimba lwimbo wa kyalo ne. Betupanga na mambo akukana kupana misonko ya chechi ne kukana kuya na kupwila mu chechi iji pa sukulu.

Kepo mutonyi aambijile Shabyambo kuba’mba ambe bishinka bibena kumwesha kuba’mba “kechi banemekele lwimbo wa kishipa ne.” Shabyambo byo atendekele kwibepuzha, baana ba sukulu baambile’mba kechi baubangapo bintu byamweshanga’mba babena kulengulula lwimbo wa kishipa bakwabo byo baimbanga ne.

Pa 28 November mu 2014, kochi mucheche wa ku Karongi popo aambile byo bafuukwilepo. Waambile’mba, “kukana kwimba lwimbo wa kyalo kechi kulengulula kyalo ne.” Byachibile kochi byakoseshe uno muzhilo ne kubingisha bano banyike kabiji byakonsha kulekesha ne kuyanjisha baana ba sukulu mu kyalo kya Rwanda.

Bakamonyi ba kwa Yehoba mu Rwanda baumvwa bingi bulongo pa byapwile mambo a baana ba sukulu ba pa Groupe Scolaire Musango School. Bino mu mambo akwabo mwavwangwa Bakamonyi banyike bo bapanga sukulu na mambo a byo bataibilamo bavilukapo pa ano masukulu. Baana ba sukulu bamo kechi batwajijila kufunda ne, mambo masukulu a bantu aji bingi na mutengo, bansemi babo kechi bakonsha kupana mali ne.

Bansemi Bakamonyi nabo bakeba baana babo kufunda sukulu. Bakeba baana babo kufunda ne kwikala bangikazhi bawama mu kimasamasa. Bakamonyi ba kwa Yehoba baketekela kuba’mba byachibile kochi wa mu nkambi ya Karongi bikalengela masukulu a mu kyalo kya Rwanda kunemeka luusa lwa baana ba sukulu lwa kwisajila bupopweshi.