Pa 12 May mu 2015, kochi wa Gwangju District Court wachibile kuba’mba Bakamonyi ba kwa Yehoba basatu kechi balengele mambo pa kukana kutwela bushilikale ne. Mutonyi mukulumpe aye Judge Choi, Chang-seok waambile’mba: “Kyawama kunemeka jiwi ja muchima ja bantu mwayila mizhilo kwa kubula kulubako kuzhikijila kyalo.” Kabiji waambile ne kuba’mba: “Inge luusa lwa bantu lwabula kuyila mumo na byafwainwa kuba bangikazhi, kyawama kuchiba mambo mu jishinda jibula kulengululapo lubaji lumo.” Bakamonyi babena kuketekela Shabyambo wa kafulumende kubwezha ano mambo ku kochi jikwabo moba atanu na abiji saka akyangye kupwa.