Pa ñondo pa ñondo ba mitonyi ba mu South Korea bapita mu bintu bya uno mutundu. Inge nsongwalume waiya mukochi na mambo a kukana kutwela bushilikale na mambo a byo aitabilamo, mutonyi wafwainwa kumukasa bañondo 18. Mutonyi aye Young-sik waambile pa umo wakaine kutwela bushilikale na mambo a byo aitabilamo amba: “Bamitonyi kechi baswa’mba babena kukasa ‘mbanzhi’ inge babena kuchiba mambo a bakana kutwela bushilikale ne.” Bulanda bo aumvwine bwamulengejile kuzhinauka mizhilo yobalondela yaamba pa bakana kutwela bushilikale.

Kyalo kya South Korea kyakana kunemeka luusa lwa bakana kutwela bushilikale kabiji kechi babikako mingilo ikwabo ya kwingila bakana kutwela bushilikale ne. Mitonyi ya mu kyalo kya South Korea kibakatazha bingi kukasa bakana kutwela bushilikale amba bambanzhi. Bamitonyi bayuka ne kuba’mba kochi mukatampe wa UN Human Rights Committee wachibile mambo a bansongwalume bena South Korea 501. Uno kochi wataine kuba’mba, kyalo kya South Korea byo kibena kukasa babena kukana kutwela bushilikale kabiji kyakana kulondela byo baumvwañene na byalo byavula pa luusa lwa ba bantu. Kino kyalengela bamitonyi bavula kuyanda na jiwi ja mu muchima pa kukasa bansongwalume bena Kilishitu bakana kutwela bushilikale na mambo a jiwi jabo ja mu muchima.

Makochi atanu na umo a mu makambi a mu kino kyalo luno abena kutwala mambo a bakana kutwela bushilikale ku kochi wa mukatampe wa Constitutional Court of South Korea, kuba’mba bosakwiachibanga, nangwa kya kuba uno kochi wa Constitutional Court waambile mu 2011 kuba’mba mwayila mizhilo kafwako wafwainwa kukana kutwela bushilikale ne. Bamitonyi bakana kuchiba ano mambo baji na bishinka.

• Kukasa bakana kuya kunkondo na mambo a jiwi jabo ja muchima.

  “Buku wa mizhilo uzhikijila luusa luji na muntu lwa kuba bintu mwayila jiwi janji ja muchima kabiji lwanema mambo luzhikijila jiwi ja muchima ja muntu ne kunemeka muntu ne kumupa mushingi. . . . Nangwa kya kuba kukana kutwela bushilikale kechi byo bilanguluka bantu bavula ne, bino kechi kyailamo kumona bafuukula bino amba basatukila kyalo nangwa’mba bambanzhi bo bafwainwa kukabisha bingi ne.”–Mutonyi aye Hye-won Lim, wa mu kochi wa Suwon District Court, pa 21 February mu 2013, 2012Chogi2381.

  “Kupusana mu milanguluko kwa bantu . . . [ne] kunemeka ‘bantu’ ke kintu kyanema bingi. Kabiji kino kyavwangamo ne bifuukula bantu mu bwikalo nangwatu pa bya bushilikale. Inge aba bakana bebakanjikizha kutwela bushilikale nangwa kwingijisha mata, kabiji inge bakana ke bebamanyike ko kuba’mba babena kukana kunemeka luusa lwabo lwa kwikala muntu wiimena. Kwambatu kine kuba bino ke kubula kunemeka bantu.”–Mutonyi Young-hoon Kang, wa mu kochi wa Seoul North District Court, pa 14 January mu 2013, 2012Chogi1554.

• Nanchi kunemeka luusa lwa bakana kutwela bushilikale kukokesha luzhikijilo lwa kyalo nyi?

  “Kechi kujipo bishinka ne bishiino nangwa byanembwa bimwesha kuba’mba kuswisha bakana kutwela bushilikale kwingila mingilo ikwabo kwakonsha kulengela kyalo kwikala mu kizumba kabiji kulengela bashilikale kwikala na mingilo yavula ne.”–Mutonyi Gwan-gu Kim, mu kochi wa Changwon Masan District Court, pa 9 August mu 2012, 2012Chogi8.

  “Kafwako bishinka bimwesha kuba’mba kyalo kyakonsha kwikala mu kizumba ne kukankalwa kuzhikijila bantu inge bantutu bacheche kubikapotu ne Bakamonyi ba kwa Yehoba, . . . bakana kwingijisha mata nangwa kwibafunjisha bya bushilikale ne. Kwambatu kine, nangwatu bebamanyike byepi . . . kechi baswa kutwela bushilikale ne. Inge kya kuba’mba byo baamba bya kine, ko kuba’mba kyalo ne bantu bonse biji mu kizumba.”–Mutonyi Seung-yeop Lee, wa mu kochi wa Ulsan District Court, August 27, 2013, 2013Godan601.

• Bya kupwisha luno lukatazho

  “Inge kochi wa Constitutional Court waamba’mba kwibapa mingilo ikwabo kechi bekwambapo mu mizhilo ne. Baluusa ba mu kafulumende ne ba mu Nzubo ya Mizhilo bafwainwa kutalapo pa luzhikijilo lwa kyalo ne pa luusa lwa bantu lwa kwifuukwila bintu ne kulenga mizhilo yafwainwa kuvwangamo bakana kutwela bushilikale kwa kubula kulubako luzhikijilo lwa kyalo. Mutonyi Young-sik Kim, wa mu kochi wa Seoul South District Court, pa 9 July mu 2013, 2013Chogi641.

  “Kupa mingilo ikwabo bakana kutwela bushilikale kechi kwakonsha kulengela bashilikale kukepa nangwa kubika kyalo mu kizumba ne, kikulutu banengezha bulongo kuchina kumona’mba bakana kutwela bushilikale bo balengela.”–Mutonyi Seong-bok Lee, wa ku kochi wa Seoul East District Court, pa 20 February mu 2014, 2014Chogi30.

Bamitonyi bakana kuchiba ano mambo bepuzha kochi wa Constitutional Court kwibakwasha pa ano mambo ebakatazha bingi a bakana kutwela bushilikale. Pa kino kimye, uno Kochi ubena kupembela kuchiba mambo 29, paji ne abiji muji banabalume 433.

Pano kochi wa Constitutional Court ukachiba byepi ano mambo? Nanchi uno kochi mukatampe mu kyalo kya South Korea ukanemeka luusa lwa bakana kutwela bushilikale, ne kulengela kupitulukamo jikwabo mu mizhilo nyi? Inge wauba bino, ukanemeka kino kyalo byo kyaumvwañene na byalo bikwabo, ukanemeka byaamba mizhilo ya kyalo ne kunemeka luusa lwa bantu lwa kwifuukwila bintu. Inge kyaikala bino bansongwalume bo bakasa kya lunkanankana bakebakasulula.