Mu kochi wa mu Dashoguz, ku Turkmenistan, Nchibamambo Gagysyz Orazmuradov wapelemo mambo a bubela ba Bibi Rahmanova baji na myaka 33. Pa 18 mu ñondo wa Kasalakanduba, ba Bibi baji na mwana wa myaka ina bebapelemo mambo a “kupuma kapokola” ne “kuleta kiwowo.” * Nchibamambo wachibile kuba’mba basa kwibakasa myaka ina, mu kaleya kakatampe mo bakashila bambanzhi.

Lukatazho lwa ba Bibi lwatatwile mabanga pa 5 mu ñondo wa Mankumbinkumbi, mu 2014, kimye abo na bamwatawabo ba Vepa Tuvakov ne mwanabo wa mulume kyo bayile ku kiteshenyi kya shitima ku Dashoguz na kusenda mabuku ne bipe byatumine mulunda nabo wa ku Ashgabad. Ba Tuvakov ne bena kwabo byo balupwiletu bipe mu shitima, bakapokola batanu na umo bavwajile bivwalotu, bebasolomokele kuba’mba bayuke byajinga mu kyola. Byo bamwene kompyuta ne mabuku a Bakamonyi ba kwa Yehoba, bakapokola wibatukile ne kwibachinya’mba basakwibepaya ne mwanabo ashale wakishale.

Ba Bibi bakopele byonse byamwekele pa foni. Bakapokola byo bakebelenga kwibangata foni, bafile foni mu jilaya jabo. Bakapokola bebakwachile mu nsuki ne kwibapuma ne kwibapantaula, kabiji bebasendele saka bebakwata ku maboko nakwibatajangizha. Kimye kyo bebasendele, kapokola umo wibapimpwile jilaya ne kwibafinankanya kyabula kufwainwa amba ebangate foni. Ba Bibi belamwijile pano bino bakankelwe kunyema, nangwa byonkabyo, kechi bakainenga kwibakwata ne, kabiji kechi bobatendekejilepo kupumamo kapokola ne.

Ba Tuvakov ne kisemi kyabo byo bebatwajile ku ofweshi wa bakapokola, ba Vepa bebambijile kufwachika ku pepala wanengezhezhe bakapokola. Pano bino bakaine. Bebapumine bingi ku bakapokola, ba Bibi ne mwanabo saka baji mu kibamba kikwabo. Nangwa byonkabyo, ba Vepa kechi baswile kufwachika ku uno pepala ne. Ba Bibi nabo bakainetu nsalansala kunemba ku uno pepala kabiji nabo bebapumine bingi. Ba Bibi ne mwanabo balaajile mu kaleya, bebafumishemo juba jalondejilepo. * Ba Bibi byo bayile na kwijizhanya ku bakulumpe ba bakapokola, bamwatawabo ba Vepa nabo bebafumishemo pa 11 mu ñondo wa Mankumbinkumbi. Bakapokola ba mu Muzhi Mukatampe wa Dashoguz batatwile kupituluka mu mambo aba Bibi ne bamwatawabo.

Ba Bibi bebakwachile pa 6 mu ñondo wa Kasalakanduba, bebabikile mu kaleya pa 8, kabiji pa 18 bebatotolwesheshe. Kimye kyo bebatotolwesheshenga, kyamwesheshetu patoka kuba’mba Nchibamambo Orazmuradov kechi wachibile mambo bulongo ne. Waubilenga inge shabyambo wa ba Bibi ke ambe, wamuchibikizha. Bakapokola byo bapaine sawakya wa bubela, nchibamambo kechi waswishishe shabyambo wa ba Bibi kwipuzha bakapokola ne. Nchibamambo wakainye ne ba Vepa kulumbulula byaubile bakapokola ku ba Bibi kabiji wakaine ne kuteleka ku byambo byo bakopele pa foni. Nchibamambo wibapelemo mambo ba Bibi ne kwibakasa myaka ina.

Ba Bibi balomba kutotolola mambo abo jikwabo pa 28 mu ñondo wa Kasalakanduba po bakiji mu kaleya ka DZD-7. Inge bakebakaine kutotolola mambo abo jikwabo, bakebatwala ku kaleya kakatampe ku Seydi. Inge bebatwala kokwa, kechi bakekala na luusa lwa kuba kintu nangwa kulama mwanabo pa myaka yo bebatongwela ne.

Nangwa kya kuba ba Vepa kechi bebakwata ne, kyamweshatu patoka kuba’mba nabo bakebakwata, kwibatotolwesha ne kwibakasa pa kubula mambo. Umvwe kino kyaubiwa, mwanabo ukashala kwa kubula bashanji ne bainanji. Ino ke nshiji ya mulolo mambo kafwako mambo o balenga ne.

Kyalo kya Turkmenistan kyayukanyikwa kuba’mba kimanyika Bakamonyi ba kwa Yehoba ne kubula kwibaswisha kulondela byo baitabilamo. Bakamonyi ba kwa Yehoba mwaya ntanda ne bantutu bakwabo banemeka luusa lwa bantu ne byo baitabilamo, balomba kafulumende wa Turkmenistan kuba’mba achibe bulongo mambo.