Ba Bibi Rahmanova bebafumishe mu kaleya pa 2 mu ñondo wa Kainyainya mu 2014, na kimye kya 20 koloko nangwa kya kuba mambo kechi apwile ne. Jonkaja juba lukelo banchibamambo ba mu Kochi Mukatampe wa Dashoguz baswile kwamba mambo abo jikwabo. Nangwa kya kuba mambo aba Bibi kechi apwile ne, bebakashijile pangye. * Bebambijile ponkapotu kufuma mu kaleya. Kije kyalondejile bijizhañenye ba Bibi kuba’mba baji na mwana wa mulume uji na myaka ina. Kabiji kyataine kuba’mba kechi bakilengapo kala mambo ne.

Ba Bibi byo bebapelemo mambo a bubela pa 18 mu ñondo wa Kasalakanduba kuba’mba “bapumine kapokola” ne kuba “kiwowo,” balombele kutotolola mambo abo jikwabo. Bakapokola bakwachile ba Bibi ne benakwabo ba Vepa pa 5 mu ñondo wa Mankumbinkumbi pa kiteshenyi kya shitima mu Dashoguz. Bebakwachile byo bayile na kusenda bipe byabo mwajinga ne mabuku a bya bupopweshi. Ba Vepa bebafumishe mu kaleya. Nangwa byonkabyo, ba Bibi bebakashile pa 8 mu ñondo wa Kasalakanduba. Mu oa moba o bajinga mu kaleya bebamanyikile bingi.

Shabyambo wa ba Bibi waambile’mba kyalengejile ba Bibi kwibakasula ke na mambo a kwijizhanya kwa bantu mu byalo bimo pa byo bebakashile pa kubula mambo.

Bakamonyi ba kwa Yehoba mu Turkmenistan kechi bakuminye byo bakashile ba Bibi ne. Bakamonyi javula bebamanyika bingi na mambo a lwitabilo lwabo. Batanu na basatu baji mu kaleya na mambo a kulondela byo baitabilamo. Pa bano batanu na umo, bebakasa na mambo a kukana kutwela mwingilo wa bushilikale, babiji bebakasatu pa kubula mambo. Babena kumanama bingi mu kaleya.

Kyawamakotu ke kya kuba’mba banchibamambo mu Kochi Mukatampe wa Dashoguz bebomvwijileko ba Bibi lusa, pano bino bakankalwa kuchibila mambo monka mo aolokela. Aba banemeka luusa lwa bantu baketekela kuba’mba kafulumende wa Turkmenistan ukapa bantu bwana bwa bene bwa kupopwela Lesa.