Kwa kubula kuketekela, Ndamakyalo Gurbanguly Berdimuhamedov wakasulwile Bakamonyi ba kwa Yehoba bo bakashile mu Turkmenistan na mambo kuba bintu byo baitabilamo. Bajinga pa bakaili bo bakasulwile pa 22 October mu 2014. Bakamonyi batanu na umo bebakashile na mambo a kukana kutwela bushilikale ne kwibapamo mambo a bubela abiji amba bealenga pa kuba byo baitabilamo.

Banyike babalume bajinga myaka pakachi ka 18 ne 23 bebakashile mu Seydi Labor Colony, mu muzhi waikela mu kiselebwa mu Turkmen. Merdan Amanov, Pavel Paymov, Suhrab Rahmanberdyyev, ne Amirlan Tolkachev bebatwajile ku kaleya ka bantu bonse. Matkarim Aminov ne Dovran Matyakubov (kechi baji pa kipikichala ne) abo bebatwajile ku kaleya ko bamanyika bingi bantu mambo bebapelemo mambo a kubula kuleka kuba kyo bebakanya. Byo bajinga mu kaleya, bano bansongwalume bebayanjishe bingi kabiji mo baikala mwatamine bingi.

Bakamonyi babiji bebakashile na mambo a kwibabepelatu. Bano ke ba Aibek Salayev baji na myaka ya kusemwa 35 ne ba Bahram Shamuradov baji na myaka 42. Bebakashijile mu kaleya ka bantu bonse ku Seydi. Bano bonse babiji bebakashile myaka ina na mambo a kulondela byo baitabilamo. Bebamanyikile bingi kimye kyo bajinga mu kaleya nangwa kya kuba bebakashile kya lunkanankana na mambo a kwibabepelatu. Mambo biishino byo baingishe pa kwibazhachishe bebibikimotu abo bene.

Kamonyi umotu, abo ba Ruslan Narkuliev, bo bakiji mu kaleya mu kyalo kya Turkmenistan. Bebakashile na mambo a kukana kutwela bushilikale byo kwashajiletu milungu icheche kukasulula bakwabo. Kyamweka jizhina jabo kechi jayile kwi Ndamakyalo kimye kyo bakasulwilenga bakwabo ne. Babena kwibemenako mu mambo abo babena kwisamba na bakulumpe ba mu kafulumende ku Turkmen kuba’mba bebakasulule.

Ndamakyalo Berdimuhamedov waubile bingi bulongo pa kukasulula bano Bakamonyi batanu na basatu bo bakashile na mambo a lwitabilo lwabo. Kino kyalengela bonse babena kukeba kukasuluka mu bya bupopweshi kuketekela kuba’mba bintu bikawama my kyalo kya Turkmenistan. Kino inge kyaubiwa kikalengela Bakamonyi ba kwa Yehoba kwikala mwayila jiwi jabo ja muchima kwakubula kuchina kwibatotolwesha nangwa kwibakasa.