Mu January mu 2015, bashilikale baangachile bipwilo bitelwa’mba Mazubo a Bufumu 14 bya Bakamonyi ba kwa Yehoba mu Ukraine. Baangachile bipwilo ku Donetsk ne ku Luhansk ku musela wa kino kyalo kuji milukuchi pa bañondo bavula bingi. Bashilikale babena kulukuka Bakamonyi ba kwa Yehoba na mambo a kwibashikwa pa kubula mambo kabiji babena kunyanchijila luusa lwabo lwa kukasuluka kupopwela Lesa pamo.

Bakamonyi ba kwa Yehoba bapopwelanga Lesa mu mutende pa myaka kukila pa 20 mu kyalo kya Ukraine. Ba Vasyl Kobel bengijila pa ofweshi wa musampi mu muzhi wa Lviv, baambilako Bakamonyi ba kwa Yehoba, baambile’mba: “Tupwila pamo mu bishimikwa byetu na kutanga Baibolo ne kulomba, kabiji kechi tuletapo milukuchi mu mapunzha mo twikala ne. Bino pa bañondo bapitapo, milukuchi iji ku musela wa kyalo kya Ukraine yaikazha bantu bufinda. Ino milukuchi yalengela Bakamonyi ba kwa Yehoba nabo kubula kwikala bulongo.”

Ba Kobel baambijileko Bakamonyi ba kwa Yehoba 150,000 mu Ukraine. Pa bañondo bafumako, Bakamonyi bavula banyemamo mu mapunzha mwaangala milukuchi. Bakamonyi ba kwa Yehoba kukila pa 17,500 bakishala ku Donetsk ne Luhansk babena kwingila byonka byo bakelwa kwingila nangwa kya kuba mu ano mapunzha mwaswalala. Kwangata Mazubo a Bufumu kwalengela Bakamonyi bavula kubula pa kupwijila. Nangwa byonka byo babena kupwijila mu mazubo a bantu kya kwisomatu pa kwikala. Bakamonyi bamo benda jiola jimo nangwa abiji pa kuba’mba batanwe ku kupwila.

Kyalengela kwibangata Mazubo a Bufumu ke kwibashikwa pa kubula mambo na mambo a bupopweshi. Mukulumpe wa nzhita imo waambile’mba “tusakuzhiya Bakamonyi ba kwa Yehoba,” amba mambo kyo kipwilotu kya bwina Kilishitu kiji kuno. Mukulumpe wa nzhita mukwabo waambile’mba: “Bakamonyi ba kwa Yehoba kyapwa bunga bwapwila pa mpuki.” Nangwa kya kuba babena kwibapingila bino, Bakamonyi ba kwa Yehoba abo batwajijila kwingila mu kyalo kyonse kya Ukraine.

Nangwa kya kuba pa kwangata bishimikwa kafwako nangwa umo ye bakozhezhe ne, bino kechi bakasuluka kupwila pamo na bakwabo bamu lwitabilo ne. Ku taunyi wa Horlivka ku Donetsk bashilikale balukukile Bakamonyi mu Nzubo ya Bufumu saka babena kupwila, ne kupalañanya bonse baishile na kupwila, bakote ne baana babacheche. Kabiji ku mpunzha ikwabo Bakamonyi byo bafikilenga pa Nzubo ya Bufumu bakuminye bingi mambo bataine beyalwile ke kamba wa bashilikale, ku binzhilo babikako ne maloko angi.

Ba Kobel baambile’mba: “Ofweshi wa musampi mu Lviv wisamba na bipamo bya mu kafulumende ne babinemanga pa ano Mazubo a Bufumu o baangata kyalunkanankana. Kino kyalengela kafulumende kuyuka kuba’mba bansatuki byo babena kubila mu bishimikwa nangwa mambo o babena kulenga aba baji mu bino bishimikwa kechi bitukunza ne.” Kabiji ofweshi wa musampi watundaika bakulumpe mu bipwilo bya Bakamonyi ba kwa Yehoba mu Donetsk ne mu Luhansk kumona kuba’mba bazhikijila Bakamonyi bonse mu ano mapunzha. Bakulumpe mu bipwilo bebavulwilemo kuba’mba bumi bwanema kukila bishimikwa ne kuba’mba kechi bafwainwa kuba bintu byakonsha kubika bumi bwa Kamonyi nangwa umo mu kizumba ne.

Pa kino kimye kafwako nangwa kimo kyaubiwapo mwayila mizhilo kyakukwasha Bakamonyi kutambula Mazubo a Bufumu ne. Nangwa kya kuba pa kupwijila pakatazha kufumatu kimye kyo baangachile Mazubo a Bufumu, bino Bakamonyi batwajijila kwingijila Lesa mu ano mapunzha. Babena kupembelela kimye kyo bakebabwezha Mazubo a Bufumu ne kutwajijila na kupwila mu mutende na bakwabo ba mu lwitabilo.