Milukuchi ya bamulwila ntanda ne nkondo yajinga ku musela wa kyalo ya Ukraine yalengejile ndamakyalo kukambizha kutwezha bashilikale mu 2014. Ba Vitaliy Shalaiko, Bakamonyi ba kwa Yehoba bajinga bashilikale bayile na kwibatotolwesha ko bebechile. Byo bajinga mu mbokoshi mu kochi wa bashilikale wa Military Commissariat, ba Shalaiko baambile’mba jiwi jabo ja muchima kechi jakonsha kwibaswisha kutwela bushilikale ne, kabiji balombele kwibapako mingilo ikwabo.

Ba ku ofweshi wa bashilikale bakaine amba ba Shalaiko kechi baji na luusa lwa kukana kutwela bushilikale ne, ne kwibapamo mambo a kukana kutwela bushilikale. Kino kyo kyajinga kimye kitanshi kutotolwesha bakana kutwela bushilikale na mambo a bya bupopweshi byo baitabilamo.

Ba Shalaiko na mambo a kuba’mba bajingapo bashilikale, bayuka kuba’mba kafulumende ukeba kuzhikijila kyalo ne bangikazhi babo. Nangwa byonkabyo, ba Shalaiko balangulukile pa byakebelenga kafulumende ne byaamba Baibolo kuba’mba twafwainwa ‘kupana bintu bya kwa Kesala kwi Kesala, kabiji bintu bya kwa Lesa, kwi Lesa.’ * Byo baji bena Kilishitu, ba Shalaiko bashiinwa kuba’mba bafwainwa kunemeka bumi bwa bantu ne kwibatemwa kimye kyonse bantu bonse. *

Pa 13 November mu 2014, kochi wa Novomoskovsk District Court ku Dnipropetrovsk wapelemo mambo a bumbanzhi ba Shalaiko mambo bakaine kutwela bushilikale. Kyatainwe kuba’mba kechi banyemanga bashilikale nangwa bashabyambo inge bebeta kwiya na kutotolola ne. Kochi wachibile’mba ba Shalaiko baji na luusa lwa kukana kutwela bushilikale ne kwingilako mingilo ikwabo mambo baji mu bupopweshi bubula kuswisha kutwela bushilikale.”

Kabiji kochi waambile ne kuba’mba ba Shalaiko baji na luusa lwa kwingila mingilo ikwabo kwesakana na byaamba “buku wa mizhilo wa kyalo kya Ukraine.” Baambile ne kuba’mba kochi wa European Convention on Human Rights * ne wa European Court of Human Rights (ECHR) uzhikijila luusa lwa bantu lwa kukasuluka mu bya bupopweshi. Mutonyi wabingishe ba Shalaiko na mambo o bebapelengamo a kukana kutwela bushilikale kya nshiji.

Shabyambo wa kafulumende pa kubwezha ano mambo ku kochi waambile’mba, kuzhikijila kyalo kwesakana na byaamba mizhilo kwanema kukila luusa lwa bantu lwa kukasuluka mu bya bupopweshi nangwa lwa kusalapo kwingila mingilo ikwabo. Uno Shabyambo waambile’mba byachibile mambo kochi wa ECHR kechi bingila kimye kya kwinengezha kuya ku nkondo ne.

Pa 26 February mu 2015, kochi ko bambila mambo o bwezhapo jibiji wa Appeal Court wa ku Dnipropetrovsk wachibile’mba, “kukana kutwela bushilikale kimye kya kwinengezha kuya ku nkondo na mambo a jiwi ja mu muchima kechi kukainamotu kya nshiji ne.” Pa kuchiba ano mambo, kochi watajilepo ne pa byatabilamo ba Shalaiko ne pa byaachibile mambo kochi wa ECHR waambile’mba, “bino byatabilamo bantu bebyambapo mu muzhilo nambala 9 wa [European] Convention” * waamba pa luusa lwa kwifuukwila bintu, pa jiwi ja muchima ne pa bya bupopweshi. (Article 9 of the [European] Convention”)

Kochi kobabwezhezhe mambo waambile’mba muzhilo nambala 9 wa European Convention on Human Rights kechi waswisha, “‘Kuzhikijila kyalo’ . . . kulengela kubula kunemeka luusa lwa bantu ne.” Bamitonyi baambile’mba, “luusa lwa kukana kutwela bushilikale kechi twafwainwa kwilunyanchijila na mambotu a kuzhikijila kyalo ne.” Bachibile’mba, mizhilo ya kyalo kya Ukraine yaswisha bantu kusalapo kwingila mingilo ikwabo, ingila ne mu kimye kyakwinengezha kuya na kulwa nkondo. Kochi ko babwezhezhe ano mambo wabingishe ba Vitaliy Shalaiko, byonka byachibile kochi mutanshi.

Abino kochi uji ku musela wa kyalo kya Ukraine byobyo afuukwilepo, wanemekele luusa lwa bakana kutwela bushilikale ne kuswisha bantu kwingilako mingilo ikwabo nangwa kya kuba kyalo kyakebelenga bantu kutwela bushilikale bukiji bukiji. Byo bafuukwile pa mambo a ba Shalaiko byaijilemo na byaamba mizhilo ilondela byalo byonse mwaya ntanda yaamba pa bakana kutwela bushilikale. *

Nangwa byonkabyo, Shabyambo wa kafulumende wabwezhezhe jikwabo ano mambo ku kochi. Pano bino kochi utala pa mambo a bumbanzhi wa High Specialized Court of Ukraine for Civil and Criminal Cases watajilepo pa byo aambilenga ne kukana byachibile kochi mutanshi. Pa 30 April mu 2015, bashabyambo ba ba Shalaiko bakaine byalobele uno shabyambo wakebelenga kubwezhapo ano mambo jikwabo.

Ba Vitaliy Shalaiko baji pa Bakamonyi bavula bingi mu Ukraine bo baichile kuba’mba batwele bushilikale. Baya kimye kyonse inge bebeta ne kulomba mu mushingi kwibaswisha kwingilako mingilo ikwabo yaswañana na byo baitabilamo. Bakamonyi bavula balomba kwibapako mingilo ikwabo bebaswisha, bachechetu bobo babena kutotolwesha. Pa kino kimye kochi mukatampe wa mu kyalo kya Ukraine ye uji na luusa lwa kuswisha Bakamonyi bakana kutwela bushilikale kwingila mingilo ikwabo.