FORT LAUDERDALE, Fla.—Mu November pa 14 mu 2014, Bakamonyi ba kwa Yehoba bavilwiijile bantuntuluzhi ba mulaka wa kwamba na maboko wa kina America ku Fort Lauderdale, mu Florida kufuma ku Watchtower Educational Center ku Patterson, mu New York. Bakamonyi batendekele mu 1995 kuntuntulwila mavidyo alumbulula Baibolo mu mulaka wa kwamba na maboko wa kina America ku Patterson. Bakamonyi balengele maofweshi ne mwakukopela mavidyo mu kishimikwa kiji ku Fort Lauderdale mu bañondo bachechetu bapitapo. Bakamonyi batuntulula mulaka wa kwamba na maboko wa kina America batendekele kwingijila mu ano ma ofweshi mu May 2015.

Bakamonyi balenga mavidyo a mu mulaka wa kwamba na maboko wa kina America ne kwiabika pa keyala wa jw.org ne pa DVD. Kabiji banengezha ne mavidyo a kwingijisha mu bipwilo 500 pa mulungu pa mulungu, ne pa kupwila kukatampe kubikakotu ne kubuñana ne kushonkena kwa kijiji kwikalako pa mwaka pa mwaka.

Ba Jonathan Galvez bakwatakanya jibumba ja Bakamonyi batuntulula mulaka wa kwamba na maboko wa kina America mu Florida, baambile’mba: “Tukebesha bingi kuba’mba mavidyo a mu mulaka wa kwamba na maboko afikenga bantu pa muchima bekala mu byalo byapusana pusana, bafunda ne babula kufunda.” Baambile ne kuba’mba: “Kuji byalo 45 mo bamba mulaka wa kwamba na maboko. Kabiji byonkatu biji milaka ikwabo byo biji ne mulaka wa kwamba na maboko, naye wapusana pusana kwesakana na mpunzha. Pano byo kiji kuba’mba tusakwingijilanga ku Fort Lauderdale, bantuntuluzhi pano basakupwanañanga na bantu bavula baamba mulaka wa kwamba na maboko wa kina America bafuma mu byalo byapusana pusana.”

Mu 2014, ba Frank Bechter, bayuka bya kisemwa kabiji bayuka kwamba milaka yavula, batainwe ku kushonkena kwa kijiiji kwa mu mulaka wa kwamba na maboko kwa Bakamonyi ba kwa Yehoba ku Richmond, mu Virginia. Bayileko na kupesapesa mulaka wa kwamba na maboko wamba bantu bashinka matwi. Ba Bechter baambile’mba: “Jibumba jenu jibena kufunjisha bulongo bantu mulaka wa kwamba na maboko wa kina America kabiji kino kyamwekeshetu patoka pa kushonkena kwajinga ku Richmond, kikatakata mavidyo o banengezhe bulongo ne byepelo bya mu Baibolo byo bantuntulula bulongo. Namwene kuba’mba bayuka bingi kwamba uno mulaka wa kwamba na maboko wa kina America.” Kabiji baambile ne kuba’mba: “Ne basanchila bingi Bakamonyi pa kwibikako kutuntulula Baibolo bulongo mu mulaka wa kwamba na maboko wa kina America mambo ke buku wanema bingi mu bwikalo bwa bantu kufumatu ne kala. Kabiji naketekela kuba’mba, bantu bashinka matwi bakayuka bintu byanema byayuka bantu pano pa ntanda.”

Mabumba a bantuntuluzhi a Bakamonyi ba kwa Yehoba mwaya ntanda banemba ne kulenga mavidyo avula mu milaka ya kwamba na maboko 80 ne kwiiapana kyatutu ku bantu. Bakamonyi ba kwa Yehoba balenga balenga ne JW Library Sign Language app wa bakeba kukopolola, ne kutamba mavidyo mu mulaka wa kwamba na maboko pa Jw.org.

Media Contact(s):

International: J. R. Brown, Office of Public Information, tel. +1 718 560 5000